ޖޭޕީ އަކީ ފުރުސަތުން ފުރިގެންވާ ޕާޓީއެއް، ގުޅިވަޑައިގަންނަވާ: ޤާސިމް
ޖުމްހޫރީ ޕާޓީއާއި ގުޅިވަޑައިގަތުމަށް އެޕާޓީގެ ރައީސް ޤާސިމް އިބްރާހިމް ގޮވާލައްވައިފި އެވެ.
ޖުމްހޫރީ ޕާޓީގެ 4 ވަނަ ގައުމީ ކޮންފަރެންސް ފައްޓަވާދެއްވާ ވާހަކަދައްކަވަމުން ޤާސިމް ވިދާޅުވީ ޖުމްހޫރީ ޕާޓީގެ ދޮރު ހުރީ ޕާޓީއާއި ގުޅިވަޑައިގަންނަވަން ބޭނުންފުޅުވާ ހަމަ ކޮންމެ ބޭފުޅަކަށްވެސް ހުޅުވިފައި ކަމަށެވެ.
އެ ޕާޓީއަކީ ތަފާތު ކުރުމެއްނެތި ހަމަ އުސޫލެއްގެ ތެރެއިން އެންމެންނަށްވެސް ފުރުސަތުތައް ފަހިކޮށްދޭނެ ޕާޓީއެއްކަމަށް ޤާސިމް ވިދާޅުވިއެވެ. އަދި އެހެން ޕާޓީތަކުގައި ތިއްބަވާފައި އަންނަ ފަރާތްތަކަށްވެސް ޖުމްހޫރީ ޕާޓީގައި މަސައްކަތް ކުރުމުގެ ފުރުސަތު އޮންނާނެކަމަށް ޤާސިމް ވިދާޅުވިއެވެ.
"ޖޭޕީއަކީ ފުރުސަތުން ފުރިގެންވާ ޕާޓީއެއް. އެހެން ޕާޓީތަކުގައި ތިބެފައި ވަޑައިގަންނަވާ ފަރާތްތަކަށްވެސް މިޕާޓީން ފުރުސަތުދޭނެ. މިއީ އެކަހެރިކޮށް، ތަފާތުކުރާނެ ޕާޓީއެއް ނޫން. މީހާ ކުރިއަރާނީ އޭނާގެ ހުނަރާއި ގާބިލްކަމުން"
ޖުމްހޫރީ ޕާޓީގެ ލީޑަރު ޤާސިމް އިބްރާހިމް
އެމަނިކުފާނު ވިދާޅުވީ ޝާމިލުވުމާއި ގުޅިގެން މަސައްކަތް ކުރުމަކީ ޕާޓީގެ ރޫހު ކަމަށެވެ.
އެގޮތުން ޒުވާނުންނާއި އަންހެނުންނާއި އަދި ހަރު މީހުންނަށްވެސް ޖޭޕީގައި ހަމަހަމަ ފުރުސަތުތަކެއް އޮންނާނެކަމަށް ޤާސިމް ވިދާޅުވިއެވެ. އަދި ވިދާޅުވީ އެ ފުރުސަތުތައް އަދަބުވެސް ޕާޓީގައި ތަނަވަސްކޮށްދީފައި އޮންނާނެ ކަމަށެވެ.
އެ ޕާޓީއިން އަބަދުވެސް މަސައްކަތް ކުރަނީ ރައްޔިތުންނަށް އެންމެ ފައިދާހުރި ގޮތަށްކަމަށް ޤާސިމް ވިދާޅުވިއެވެ. އަދި އިސްލާހަށް މަސައްކަތް ކުރަން ބޭނުންވާ ފަރާތްތައް ޖޭޕީއާއި ގުޅުމަށްވެސް އެމަނިކުފާނު ވަނީ ގޮވާލައްވާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
