ސިޔާސީ މަޝްރަހުގައި އެކި ބޭފުޅުންގެ ފަރާތުން އަނިޔާވެރިކަން ކުރިމަތިވި: ގާސިމް

ވޭތުވެދިޔަ ދުވަސްތަކުގައި ސިޔާސީ މަޝްރަހުގައި އެކިއެކި ބޭފުޅުންގެ ފަރާތުން އަނިޔާވެރިކަން ކުރިމަތިވި ނަމަވެސް، އެބޭފުޅުންނާ ދޭތެރޭ އެއްވެސް ހިތްބުރަކަމެއް ނެތް ކަމަށް ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެންބަރު ޤާސިމް އިބްރާހީމް ވިދާޅުވެއްޖެއެވެ.

ޖުމުހޫރީ ޕާޓީއިން ކުރިއަށް ގެންދާ ކޮންފަރެންސް ޝަރަފުވެރިކޮށްދެއްވައި ވާހަކަދައްކަވަމުން ގާސިމް ވިދާޅުވީ، 2018 ވަނަ އަހަރުގެ ތެރޭގައި ބޭއްވި އެ ޕާޓީގެ ގައުމީ ކޮންފަރެންސް ބޭއްވުނީ ވަރަށް އުނދަގޫ ހާލަތެއްގައި ކަމަށެވެ. އޭރުއޮތީ މާލޭގައި ކޮންފަރެންސް ބޭއްވޭ ކަހަލަ ހާލަތެއްގައި ނޫންކަމުން ކޮންފަރެންސް ބާއްވަން ޖެހުނީވެސް މާލެއިން ބޭރުގައި ކަމަށް ވިދާޅުވި އެވެ.

އެދުވަސްވަރު ތަފާތު އެކި ބާވަތްތަކުގެ ހުކުމްތަކާއި ބޮޑެތި އަދަބުތައް ރާއްޖޭގެ އެކި ސިޔާސީ ލީޑަރުންގެ ފަހަތުން ދިޔައީ ފުމެ އަރަމުން. މަނިކުފާނު (ރައީސް ނަޝީދު) އަކީވެސް އޭގެ ވިކްޓިމްއެއް. އިމްރާން އަކީވެސް އޭގެ ވިކްޓިމްއެއް. ފާރިސް މައުމޫން އަކީވެސް އޭގެ ވިކްޓިމްއެއް. އަޅުގަނޑަކީވެސް އޭގެ ވިކްޓިމްއެއް. މިހެންގޮސް ނަން ހުސްކޮށް އަޅުގަނޑުމެން ކިޔަމުން ހިންގަވާ.

ޖޭޕީގެ ލީޑަރު ގާސިމް އިބްރާހިމް

ގާސިމް ވިދާޅުވީ، ސިޔާސީ މަޝްރަހުގައި އުޅޭއިރު އެފަދަ ސިޔާސީ ކުޅިގަނޑު ތަކާއި ދިމާވާނެ ކަމަށާ، އެހެން ނަމަވެސް އެއީ އެކަމާއި މެދު ހިތްބޮޑު ކޮށްގެން، ހަސަދަލައިގެން، ފަހަތުންދުވެ، "ނުނެއްޓިގެން" އުޅެންވީ ސަބަބެއް ނޫން ކަމަށެވެ.

އަޅުގަނޑުމެންގެ ހަމަގައިމުވެސް ހިތް ޚަލާސް. އަޅުގަނޑުގެ ހަމަގައިމުވެސް ވަރަށް އިޚްލާޞްތެރި ކަމާއި އެކު ހިތް ޚަލާސް ކުރަން. އެއްވެސް ކަހަލަ ބުރަކަމެއް އަޅުގަނޑުގެއެއް ނެތް އެއިން އެއްވެސް ބޭފުޅަކާއި މެދުގަ

ޖޭޕީގެ ލީޑަރު ގާސިމް އިބްރާހިމް

ގާސިމް އިތުރަށް ވިދާޅުވީ، 2018 ވަނަ އަހަރުގެ ތެރޭގައި ގިނަ ސިޔާސީ ލީޑަރުން ތިބީ އެކި ސިޔާސީ ކަންކަމާއި ގުޅުވައި ހައްޔަރު ކުރެވިފައި ނުވަތަ ބޭރު ގައުމުތަކުގައި ނޫނީ ޖަލު ގޮޅިތަކެއްގައިކަމަށެވެ.

ގާސިމް ވިދާޅުވީ، އެމަނިކުފާނުވެސް ދޫނިދޫ ޖަލުގައިވެސް ހުންނަވަން ޖެހުނު ކަމަށާ، އަދި ނުހައްގުން ކުރި ހުކުމެއްގެ ސަބަބުން އެނާވެސް ބޭރުގެ ދެ ގައުމެއްގައި ހުންނަވަން ޖެހިވަޑައިގަތް ކަމަށެވެ.

އެހެންނަމަވެސް ޕާސް ޕޯޓު އަތުލުން ފަދަ ދަތިތައް ކުރިމަތިވެގެންދިޔަކަމަށާއި އެ ދުވަސްވަރު އުޅުއްވަންޖެހުނީ، "ދުނިޔެ މެދަށް އުފަންވެފައި ހުރި ގައުމެއް ނެތް މީހެއްގެ" ގޮތުގައިކަމަށް ވިދާޅުވިއެވެ.

ގާސިމް ވިދާޅުވީ، އެމަނިކުފާނު ސިންގަޕޫރުގައި ހުންނެވީ ޚާއްސަ ހުއްދައެއްގެ ދަށުން ކަމަށާ، އެތަނުގައި ހުރުމަށްވެސް އަދި ޖަރުމަނު ވިލާތަށް ފުރާވަޑައިގަތުމަށްވެސް އެހީތެރިވެވަޑައިގެންނެވީ އެމްޑީޕީގެ ރައީސް މުހައްމަދު ނަޝީދުކަމަށެވެ. އަދި ރައީސ  ނަޝީދު ކޮށްދެއްވި ކަންކަމަށް ރައީސް ނަޝީދަށް ޝުކުރުވެރިވެވަޑައިގަންނަވާކަމަށްވެސް ވިދާޅުވި އެވެ.

މީގެ އިތުރުންވެސް ގާސިމް ވަނީ، ރައީސް މައުމޫނުގެ ވެރިކަމުގައިވެސް އިސްލާހަށް މަސައްކަތް ކުރެއްވުމުގެ ތެރެއިން އެމަނިކުފާނާއި ރައީސް ނަޝީދަށް ވެސް ގިނަ ގުނަ ކަންކަމާއި ކުރިމަތިވެގެން ދިޔަ ކަން ފާހަގަ ކުރައްވައި، އެކަންކަމާއި މެދުވެސް އެއްވެސް ހިތް ބުރަކަމެއް ނެތް ކަމަށް ވިދާޅުވެފައެވެ.