ޖޭޕީގެ އަސާސީ ގަވައިދަށް ހުށައެޅި 3 އިސްލާހު ފާސްކޮށްފި
ޖުމްހޫރީ ޕާޓީގެ އަސާސީ ގަވައިދަށް ގެނައުމަށް އެޕާޓީގެ 148 ވަނަ ކައުންސިލް ބައްދަލުވުމުގައި ހުށައެޅި ތިން އިސްލާހު، މިހާރު ކުރިއަށްދާ އެޕާޓީގެ ގައުމީ ކޮންފަރެންސް ތެރެއިން ފާސްކޮށްފި އެވެ.
ޖުމްހޫރީ ޕާޓީން ބުނީ އެ އިސްލާހުތައް ފާސްވެފައިވަނީ މިހާރު ކުރިއަށްދާ އެ ޕާޓީގެ 4 ވަނަ ގައުމީ ކޮންފަރެންސްގައި ބައިވެރިވެވަޑައިގެން ހުރިހާ މަންދޫބުންގެ އިއްތިފާގުން ކަމަށެވެ.
އަސާސީ ގަވައިދަށް ކައުންސިލުން ހުށައެޅި އިސްލާހުތަކަކީ ޖުމްހޫރީ ޕާޓީ ރިފޯމް ކުރުމުގެ މަސައްކަތްތަކާއި ގުޅުންހުރި އިސްލާހުތަކެއްކަމަށް މީގެ ކުރިން ޖޭޕީއިން ވަނީ ހާމަކޮށްފަ އެވެ.
އެގޮތުން ގައުމީ ކޮންފަރެންސްގައި ވަނީ ޕާޓީގެ ރައީސް އަދި ނައިބު ރައީސްގެ މަގާމު އުވާލާފައެވެ.
ކައުންސިލުން ފާސްކުރި އިސްލާހާއެކު ދެން ތިއްބަވާނީ ލީޑަރާއި ނައިބު ލީޑަރުންގެ މަގާމުގެ ފަސް ބޭފުޅުންނެވެ. އަދި ލީޑަރު އައްޔަންކުރައްވާ އެޑްވައިޒަރުންގެ ފަސްބޭފުޅުންނެވެ.
ޖުމްހޫރީ ޕާޓީގެ ގައުމީ ކޮންފަރެންސްގައި ކުރިއަށް އޮތް ރިޔާސީ އިންތިޚާބާއި ގުޅޭގޮތުން ގޮތެއް ނިންމާނެއެވެ. އެގޮތުން ގޮތެއް ނިންމުމަށް ކޮންފަރެންސްއަށް ހުށައެޅި ގަރާރާއި ގުޅޭގޮތުން މާދަމާ ބަހުސްކުރެވޭނެ އެވެ.
މިއަދު ރަސްމީކޮށް ކޮނަފަރެންސް ފަށާފައިވާއިރު، ކޮންފަރެންސް ފައްޓަވާ ދެއްވާ ދެއްވި ވާހަކަފުޅުގައި ޕާޓީގެ ލީޑަރު ޤާސިމް އިބްރާހިމް ވަނީ އެ ކޮންފަރެންސްގެ ތެރެއިން ޖޭޕީގެ ކުރިމަގަށް މުހިންމު ނިންމުންތަކެއް ނިންމޭނެކަމަށް ގަބޫލުފުޅު ކުރައްވާކަމަށް ވިދާޅުވެފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
