އެމްޑީއޭ އިން ރައީސް ޞާލިހަށް ތާއީދު ކުރަން ނިންމައިފި

ކުރިއަށް އޮތް ރިޔާސީ އިންތިޚާބުގައި އެމްޑީޕީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ތާއީދުކޮށް، އެމަނިކުފާނާއިއެކު ކޯލިޝަން ހެދުމަށް އެމްޑީއޭއިން ނިންމައިފިއެވެ.

މިއަހަރު ބާއްވާ ރިޔާސީ އިންތިހާބުގައި ވާދަ ކުރައްވަން މީގެ ކުރިން އެމްޑީއޭގެ ރައީސް އަދި މީދޫ ދާއިރާގެ މެމްބަރު އަހުމަދު ސިޔާމް މުޙައްމަދު ނިންމެވިއެވެ. އެކަމަކު ފަހުން ވަނީ މިފަހަރުގެ ރިޔާސީ އިންތިހާބަށް ކުރިމަތިލުމުގެ ބަދަލުގައި އެހެން ޕާޓީއަކާއެކު ކޯލިޝަނެއްގެ ގޮތުގައި އިންތިހާބަށް ނިކުތުމަށެވެ.

އެގޮތުން ކޯލިޝަން ހެދުމުގެ ދައުވަތު އިދިކޮޅު ކޯލިޝަނުންނާއި ވެރިކަން ކުރާ އެމްޑީޕީގެ ފަރާތުންވެސް އެމްޑީއޭއަށް ވަނީ ދީފައެވެ.

އެމްޑީއޭއަށް ކޯލިޝަން ހެދުމަށް ދައުވަތު ދެއްވުމުގެ ކުރިން ރައީސް އޮފީހުގައި ރައީސް ޞާލިހާއި ސިޔާމް ބައްދަލުކުރައްވައި މަޝްވަރާތަކެއް ކުރައްވާފައިވެއެވެ. އެއަށްފަހު ރައީސް ޞާލިހް ގެ މަންދޫބުން އެމްޑީއޭގެ ވެރިންނާ ބައްދަލުކުރައްވައި މަޝްވަރާކުރައްވާފައިވެއެވެ.

އަދި ރިޔާސީ އިންތިޚާބުގައި ކޯލިޝަން ހެދުމާއި ގުޅިގެން އެމްޑީއޭއިން މިއަދު ބުނީ، ދިވެހި ރައްޔިތުންގެ ލާބަޔާއި މަންފާއަށްޓަކައި އަދި ދިވެހިރާއްޖޭގެ ސިޔާސީ މަސްރަހުގައި ހަމަޖެހުން ގާއިމް ކުރުމަށްޓަކައި، ރައީސް ޞާލިހަށް ދެވަނަ ދައުރެއް ހޯދައިދެއްވުމަށްޓަކައި އެމަނިކުފާނާއިއެކު ކޯލިޝަން ހަދައިގެން މަސައްކަތް ކުރުމަށް އެ ޕާޓީގެ ކައުންސިލުން މިއަދު ނިންމާފައިވާ ކަމަށެވެ.

ރައީސް ޞާލިހަށް ތާއީދުކުރަން ފެނިވަޑައިގަންނަވާކަމަށް ހުށަހެޅުއްވީ ޕާޓީގެ ރައީސް އަޙްމަދު ސިޔާމެވެ. ސިޔާމުގެ ހުށަހެޅުއްވުމަށް ކައުންސިލުގެ 38 މެންބަރުންގެ ތެރެއިން 36 މެންބަރުން ތާއީދުކުރެއްވިއެވެ.

އެމްޑީޕީއާއެކު ކޯލިޝަން ހަދަން ނިންމިކަން އިއުލާނު ކުރައްވަމުން މިއަދު އެމްޑީއޭއިން ބޭއްވި ނޫސްވެރިންގެ ބައްދަލުވުމުގައި އެމްޑީއޭގެ ނައިބު ރައީސް އަލީ މައުރޫފް ވިދާޅުވީ، އެމްޑީޕީގެ ރައީސް ސޯލިހާއެކު ކުރިއަށްދާން އެމްޑީއޭ އިން ނިންމީ ކޮވިޑް-19ގެ އާލަމީ ވަބާގެ ތެރޭގައި، ޓޫރިޒަމްގެ އިސް ބޭފުޅުންގެ މަޝްވަރާއެކު އެކަން މެނޭޖް ކުރެއްވީތީ ކަަމަށެވެ.

މައުރޫފް ވިދާޅުވީ، މިސަރުކާރުން ފަށާފައި ހުރި ޕްރޮޖެކްޓް ތައް ނިންމުމަށް ރައީސް ޞާލިހަށް ދިނުމަކީ މުހިންމު ކަމެއް ކަމަށް ސިޔާމު ގަބޫލު ކުރައްވާ ކަމަށެވެ.

"އަޅުގަނޑު ގަބޫލު ކުރާގޮތުގައި، އަޅުގަނޑުމެންގެ ޕާޓީގެ ރައީސް ގަބޫލުކުރާގޮތުގައި، ދެވަނަ ދައުރެއް ދިނުމަކީ ފެށިފައި ހުރި ޕްރޮޖެކްޓްތައް ނިމި ގައުމު ހަމަހިމޭން ކަމާއެކު ދަތުރު ކުރުމަށް، އަދި އިގްތިސޯދީ ގޮތުން، ދެވަނަ ދައުރެއް ދިނީމާ ރާއްޖޭގައި ބޮލަކަށް ޖެހޭ މިންވަރު އިތުރުވެ، ރާއްޖޭގެ އިގްތިސޯދު ތަނަވަސްވެގެން ދާނެ ކަމަށް އެމަނިކުފާނު ގަބޫލު ކުރަނީ އެހެންވެ، އެހެންވެ ރާއްޖޭގެ ރައީސް ސޯލިހާއި އެކީގައި ކޯލިޝަން ހެދީ". މައުރޫފް ވިދާޅުވިއެވެ.

އެމްޑީއޭއިން އެމްޑީޕީ އާއި އެކު ކޯލިޝަން ހެދުމަށް ނިންމާފައިވާއިރު، ސަރުކާރުގެ މިހާރުގެ ކޯލިޝަންގައި ހިމެނޭ އަދާލަތު ޕާޓީން ވެސް ވަނީ އެމްޑީޕީއާއި އެކު ކޯލިޝަން ހެދުމަށް ނިންމާފައެވެ.