ގާސިމްގެ ޝުކުރާއި ތައުރީފް ރައީސް ނަޝީދަށް އޮއްސާލައިފި

ޖުމްހޫރީ ޕާޓީގެ ލީޑަރު ޤާސިމް އިބްރާހިމް، ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދަށް ހާސް ފަށުން ޝުކުރު އަދާކުރައްވައި ތައުރީފް ކުރައްވައިފި އެވެ.

ޖުމްހޫރީ ޕާޓީގެ މިއަދު ފެށުނު ގައުމީ ކޮންފަރެންސްގައި އެމްޑީޕީގެ ރައީސް މުހައްމަދު ނަޝީދު ވަނީ ބައިވެރިވެވަޑައިގެންފައެވެ.

އެ ކޮންފަރެންސް ފަށްޓަވައި ދެއްވަމުން ވާހަކަދައްކަވަމުން ގާސިމް ވަނީ، 2018 ވަނަ އަހަރު ތެރޭގައި ބޮޑެތި ގޮންޖުންތަކެއް އެމަނިކުފާނާއި، އެމަނިކުފާނުގެ ޕާޓީ، ޖުމްހޫރީ ޕާޓީ އާއި، އަދި އެހެން ސިޔާސީ ޕާޓީތަކުގެ ލީޑަރުންނަށްވެސް ކުރިމަތިވެގެން ދިޔަ ކަމަށެވެ.

"އެދުވަސްވަރު ތަފާތު އެކި ބާވަތްތަކުގެ ހުކުމްތަކާއި ބޮޑެތި އަދަބުތައް ރާއްޖޭގެ އެކި ސިޔާސީ ލީޑަރުންގެ ފަހަތުން ދިޔައީ ފުމެ އަރަމުން. މަނިކުފާނު (ރައީސް ނަޝީދު) އަކީވެސް އޭގެ ވިކްޓިމްއެއް. އިމްރާން އަކީވެސް އޭގެ ވިކްޓިމްއެއް. ފާރިސް މައުމޫން އަކީވެސް އޭގެ ވިކްޓިމްއެއް. އަޅުގަނޑަކީވެސް އޭގެ ވިކްޓިމްއެއް. މިހެންގޮސް ނަން ހުސްކޮށް އަޅުގަނޑުމެން ކިޔަމުން ހިންގަވާ." ގާސިމް ވިދާޅުވިއެވެ.

ގާސިމް ވިދާޅުވީ، އެމަނިކުފާނުވެސް ދޫނިދޫ ޖަލުގައިވެސް ހުންނަވަން ޖެހުނު ކަމަށާ، އަދި ނުހައްގުން ކުރި ހުކުމެއްގެ ސަބަބުން ސިންގަޕޫރާއި ޖަރުމަނު ގައިވެސް ހުންނަވަން ޖެހިވަޑައިގަތް ކަމަށެވެ.

އެހެންނަމަވެސް ޕާސް ޕޯޓު އަތުލުން ފަދަ ދަތިތައް ކުރިމަތިވެގެންދިޔަކަމަށާއި އެ ދުވަސްވަރު އުޅުއްވަންޖެހުނީ، "ދުނިޔެ މެދަށް އުފަންވެފައި ހުރި ގައުމެއް ނެތް މީހެއްގެ" ގޮތުގައިކަމަށް ވިދާޅުވިއެވެ.

ގާސިމް ވިދާޅުވީ، އެމަނިކުފާނު ސިންގަޕޫރުގައި ހުންނެވީ ޚާއްސަ ހުއްދައެއްގެ ދަށުން ކަމަށާ، އެތަނުގައި ހުރުމަށްވެސް އަދި ޖަރުމަނު ވިލާތަށް ފުރާވަޑައިގަތުމަށްވެސް އެހީތެރިވެވަޑައިގެންނެވީ އެމްޑީޕީގެ ރައީސް މުހައްމަދު ނަޝީދުކަމަށެވެ. އަދި ރައީސް  ނަޝީދު ކޮށްދެއްވި ކަންކަމަށް ރައީސް ނަޝީދަށް ޝުކުރުވެރިވެވަޑައިގަންނަވާކަމަށްވެސް ވިދާޅުވި އެވެ.

"ސިންގަޕޫރުގެ ހުރި ހަރުދަނާ އުސޫލުތަކާއި ގަވާއިދުތަކުގެ ތެރެއިން، އަދި މަނިކުފާނުގެ (ރައީސް ނަޝީދުގެ) އެތީތެރިކަމާއި އެކު އެއްވެސް ލިޔެކިޔުމެއްނެތި 3 މަސްދުވަހަށްވުރެ ގިނަ ދުވަހު ހާއްސަ ހުއްދައެއްގެ އަޅުގަނޑު ސިންގަޕޫރުގައި ހުރީ. ހަމައެހެންމެ އަޅުގަނޑު ޖަރުމަނުވިލާތައް ފުރުމަށްޓަކައި އަނެއްކާވެސް މަސައްކަތް ފަށައިގެން، މަނިކުފާނު އާދެ އެމްޑީޕީގެ ރައީސް މުހައްމަދު ނަޝީދުގެ އެހީތެރިކަން އަޅުގަނޑަށް ލިބިފައިވޭ. އެކަމަށްޓަކައި އަޅުގަނޑު ރައީސް ނަޝީދަށް އިހްލާސްތެރި ކަމާއެކު ޝުކުރު ދަންނަވަން."

ޖުމްހޫރީ ޕާޓީގެ ލީޑަރު ގާސިމް އިބްރާހިމް

ގާސިމް ވިދާޅުވީ އެއީ ސިއްރު ކުރަންބޭނުންވާ ކަމެއްވެސް ނޫން ކަމަށާ އެވާހަކަ ދައްކަން މުނާސަބަތު ވަގުތުގައި ވާހަކަ ދައްކަން ޖެހޭކަމަށް ގަބޫލު ކުރައްވާކަަމަށެވެ. އަދި އެނާ ވަނީ ނަޝީދަށް ޝުކުރު ދަންނަވާކަން ތަކުރާރުކުރައްވާފައެވެ.

ގާސިމް އިތުރަށް ވިދާޅުވީ އެމަނިކުފާނު އަބަދުވެސް މަސައްކަތް ކުރައްވާނީ އިސްލާހަށް ކަމަށާ، މީގެ ކުރިންވެސް އިސްލާހަށް މަސައްކަތް ކުރައްވަން ފެށްޓެވިއިރު ރައީސް ނަޝީދާއިއެކު ވެސް މަސައްކަތް ތަކެއްކުރެވި، އެ ދެބޭފުޅުންވެސް ގިނަ ތަކްލީފް ތަކެއް އުފުއްލަވަން ޖެހިވަޑައިގަތް ކަމަށެވެ.

"ރައީސް ނަޝީދާއި އަޅުގަނޑަކީ ވަރަށް ބުރަ މަސައްކަތް ތަކެއް މިގައުމަށްޓަކައި ކޮށް، ވަރަށް ބޮޑެތި އަނިޔާތަކާއި ވޭން، ވަރަށް ބޮޑެތި ނިކަމެތިކަމާއި، އިހްސާސް ތައް އަޅުގަނޑުމެންނަށް ލިބިފައިވާ ބައެއް. މިވާހަކަ ދައްކާއިރު އަޅުގަނޑުގެ ލޮލުން ކަރުނަ ފޭދިގެން ދިޔަސް ތި ބޭފުޅުން އެއްޗެއް ހީ ނުކުރައްވާތި އެއްގޮތަކަށްވެސް. އެއީކީ އަޅުގަނޑު ހަދައިގެން އުޅޭ ފިލްމެއް ނޫން އިނގޭ މިއިކީ." ލޮލުން ކަރުނަ ފޮހެލައްވަމުން ގާސިމް ވިދާޅުވި އެވެ.

ގާސިމް ވިދާޅުވީ އިސްލާހުގެ މަސައްކަތް ކުރާއިރު އެފަދަ ގޮށްރާޅުތަކާއި ކުރިމަތި ވާނެކަން އެނގިވަޑައިގަތް ކަމަށާ، އެކަމާއި މެދު ހިތުގައި އެއްވެސް ބުރަ ކަމެއް އެއްވެސް މީހަކާއި ދޭތެރޭގައޮ ނެތް ކަމަށެވެ.