ރައީސް ޔާމީނުގެ ޝަރީއަތް ލަސްކުރަނީ، ރިޔާސީ ކެންޑިޑޭޓުންނަށް ފުރުސަތު ހަނިކުރަން: އަޒްލީނު

ކުރީގެ ރައީސް އަބްދުﷲ ޔާމީން އަބްދުލްގައްޔޫމުގެ ޝަރީއަތްތައް ލަސްކުރަމުންދަނީ، ކުރިއަށް އޮތް ރިޔާސީ އިންތިޚާބުގައި ވާދަކުރާނެކަން އިއުލާނުކޮށްފައިވާ ކެންޑިޑޭޓުންނަށް އޮތް ފުރުސަތުތައް ހަނިކުރުމަށް ކަމަށް ކުރީގެ ހޯމް މިނިސްޓަރު އަދި ޖުމްހޫރީ ޕާޓީގެ ލީޑަރުގެ ސްޕެޝަލް އެޑްވައިޒަރު އަޒްލީން އަހްމަދު ވިދާޅުވެއްޖެ އެވެ.

އަޒްލީން މިފަދައިން ވިދާޅުވެފައިވަނީ ޖުމްހޫރީ ޕާޓީގެ 158 ވަނަ ކައުންސިލް ބައްދަލުވުމުގައި ވާހަކަދައްކަވަމުން ނެވެ.

އަންނަ ސެޕްޓެމްބަރު މަހުގެ 9 ވަނަ ދުވަހު ރިޔާސީ އިންތިޚާބުގެ ވޯޓުލުން އޮންނާނެކަން އިލެކްޝަންސް ކޮމިޝަނުން އިއުލާނުކޮށްފައިވާކަން ފާހަގަކުރަވާ އަޒްލީނު ވިދާޅުވީ އިންސާފުވެރި ރިޔާސީ އިންތިޚާބެއް ބޭއްވޭނީ ވާދަވެރި މާހައުލެއްގެ ތެރެއިން ރިޔާސީ ކެންޑިޑޭޓުންނަށް ވާދަކުރުމުގެ ފުރުސަތު ދެއްވައިގެން ކަމަށެވެ. އަދި ކެމްޕޭނުކުރުމަށް ވެސް އެކަށީގެންވާ ފުރުސަތުތަކެއް ދެއްވައިގެން ކަމަށެވެ.

އެހެން ނަމަވެސް މިހާރު ފެނިގެންދާ މަންޒަރަކީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ނޫން އެހެން އެއްވެސް ރިޔާސީ ކެންޑިޑޭޓަކަށް ކެމްޕޭނު ކުރުމުގެ ފުރުސަތު ނުދީ އެކި ވަރުގެ ފިއްތުންތައް ކުރިމަތިކުރުވަމުންދާ މަންޒަރުކަން އޭނާ ފާހަގަކުރެއްވި އެވެ.

އެގޮތުން ކުރީގެ ރައީސް އަބްދުﷲ ޔާމީން އަބްދުލްގައްޔޫމުގެ ޝަރީއަތް ލަސްކުރަމުންދަނީ ވެސް ރިޔާސީ ކެންޑިޑޭޓަކަށް ވުމުން ކަމަށާއި، އެފަދައިން އެކަން ކުރަމުން ދިއުމަކީ ރިޔާސީ ކެންޑިޑޭޓުންނަށް ކެމްޕޭނު ކުރުމަށް އޮތް ފުރުސަތުތައް ހަނިކުރުމަށް ސަރުކާރުން ކުރަމުންދާ ކަމެއްކަމަށް އަޒްލީނު ވިދާޅުވި އެވެ. އަދި އެކަން އެގޮތަށް ނުކުރުމަށް އަޒްލީނު ވަނީ ގޮވާލައްވާފަ އެވެ.

އަޒްލީނު ވިދާޅުވީ ރައީސް ޔާމިނަށް ރިޔާސީ އިންތިޚާބުގައި ވާދަކުރުމުގެ ފުރުސަތު ހަނިކުރުމަށް ސަރުކާރުން މަސައްކަތް ކުރަމުން ދިއުމަކީ ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވަރަށް ބޮޑަށް ކަންބޮޑުފުޅުވާ ކަމެއް ކަމަށެވެ. އަދި ރައީސް ޔާމިނަށް ރިޔާސީ އިންތިޚާބުގައި ވާދަކުރެވެން ޖެހޭނެ ކަމަށާއި، އެމަނިކުފާނަށް ވެސް ނުހައްގުން އަނިޔާއެއް ދީގެން ނުވާނެކަމަށް ޤާސިމް ވިދާޅުވާކަމަށް އަޒްލީނުގެ ވާހަކައިގައި ފާހަގަކުރެއްވި އެވެ.

އެކަންކަން ފާހަގަކުރައްވާ އަޒްލީނު ވަނީ ސަރުކާރުން މިނިވަން މުއައްސަސާތަކަށް ނުފޫޒު ފޯރުވުން ހުއްޓާލުމަށް ގޮވާލައްވާފަ އެވެ. އަދި މިނިވަން އިންސާފިވެރި އިންތިޚާބެއް ބޭއްވުމަށް ހުރިހާ ރިޔާސީ ކެންޑިޑޭޓުންނަށް ވެސް ހަމަހަމަ ފުރުސަތުތަކެއް ދެއްވުމަށް އޭނާ ވަނީ ގޮވާލައްވާފަ އެވެ.