ދެ ސަރުކާރު ގެ މެދުގައި އޮތީ ކޮންކްރިޓް ރޭހުގެ ވާދަވެރިކަން: ވަހީދު
ދެ ސަރުކާރުގެ މެދުގައި އޮތީ ކޮންކްރިޓް އެޅުމުގެ ވާދަވެރިކަމެއް އުފެދިފައިކަމަށާއި، މައްސަލަތައް ހައްލުކުރުމަށް އެއްބަޔަކުވެސް ނުވިސްނާކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު(ވައްޑެ) ވިދާޅުވެއްޖެއެވެ.
ވަހީދު މިފަދައިން ވިދާޅުވެފައިވަނީ ނިލަންދޫ ދާއިރާގެ މެމްބަރު އަބްދުލްމުހުސިން ހަމީދު ހުށައަޅުއްވާފައިވާ، ފ.ނިލަންދޫގެ ނަރުދަމާގެ ނިޒާމު ހަލާކުވެ އެ މައްސަލަ ހައްލުނުވެ ގިނަ ދުވަސްތަކެއް ވެފައިވާތީ އެ މައްސަލަ ހައްލުކޮށްދެއްވުމަށް އެދި ސަރުކާރަށް ހުށައަޅާފައިވާ ގަރާރަަށް މަޖިލީހުގައި ވާހަކަދައްކަވަމުންނެވެ.
ވަހީދު ވިދާޅުވީ ފަހަކަށް އައިސް ރާއްޖޭގައި ފެންނަމުން ދަނީ ވަރަށް ބޮޑަށް ކޮންކުރީޓުގެ ވާދަވެރިކަމެއް އުފެދިފައިވާ މަންޒަރުކަމާއި، ކޮންމެ ސަރުކާރަކުންވެސް މަސައްކަތް ކުރަނީ ކުރިން ސަރުކާރަށްވުރެ ގިނައިން ކޮންކްރީޓު އެޅުމަށްކަމަށެވެ.
އުމްރާނީ ތަރައްގީ ނުވަތަ ކޮންކްރީޓު އަޅައިގެން ގެންނަ ތަރައްގީއަކީވެސް މުހިންމު ތަރައްގީއެއްކަމަށާއި، ރައްޔިތުންނަށް ބޭނުންވާ އުމްރާނީ ތަރައްގީގެ މަސައްކަތް ކުރަން ޖެހޭނެކަމަށް އޭނާ ވިދާޅުވިއެވެ.
އެއާއި އެކު ވަހީދު ވިދާޅުވީ ރައްޔިތުންގެ ފައިސާއިން އުމްރާނީ ތަރައްގީއަށް ޚަރަދުކުރާނަމަ ޚަރަދުކުރަންވާނީ ދެމެހެއްޓެވި ގޮތެއްގައި ތަންތަން ތަރައްގީކުރުމަށްކަމަށެވެ.
"މި ފަހަކަށް އައިސް އަޅުގަނޑުމެންނަށް ފެންނަމުން މި ދަނީ ވަރަށް ބޮޑަށް ކޮންކުރީޓުގެ ވާދައެއްގައި މުޅި ދައުލަތް ވަރަށް ފޯރީގައި އެއްބަޔަކަށް ވުރެ ގިނައިން އަނެއް ބަޔަކު ކޮންކުރީޓު އެޅުމުގައި އުޅޭތަން. އެކަމު އެކަން ކުރާއިރުގައި އަޅުގަނޑުމެން ޒިންމާދާރުކޮށްތޯ މިކަން މި ކުރަނީ؟ އެކި މީހުންނާއި އިނދެގެން ބަނޑަށް ކުދިން ވިހަމުން ވިހަމުން ދާހެން ކުރިން ވިހާ ކުއްޖާގެ ކަންކަން ނުބެލި ފަހުން ވިހާ ކުއްޖާގެ ކަންކަން ބަލަމުންދާހެން މިކަން މި ކުރަނީ. އަޅުގަނޑުމެން ޖެހޭނެ ދައުލަތުން މިހާ ބޮޑު ހޭދައެއް ކޮށްގެން ހިންގާ މަޝްރޫއެއް ބެލެހެއްޓޭނެ ގޮތެއްވެސް ހޯދަން" ވަހީދު ވިދާޅުވިއެވެ.
ވަހީދު ވިދާޅުވީ މުހިންމީ ގިނަ ކޮންކުރިޓް އަޅާ ރޭހުން ކުރި ހޯދުން ނޫންކަމަށެވެ.
އާ މަޝްރޫއަކަށް ދާއިރު، ކުރިން ނިންމި މަޝްރޫއުގެ ހަލާކުނުވެ ދެމެހެއްޓެނިވި ގޮތެއްގައި ކުރިއަށް ދާނެ ނިޒާމުތައް ގާއިމުކުރުމަކީ ކޮންމެހެން ކުރަން ޖެހޭ ކަމެއްކަން ވަހީދުގެ ވާހަކައިގައި ވަނީ ފާހަގަކުރައްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
