މިއަދު އަޅުގަނޑަކީ ކާޅެއް، ނޫނީ ބާޒެއް، ކޮށްދެވުނު އެއްވެސް ކަމެއް ނެތް: ޑރ ވަހީދު

މި ރާއްޖޭގައި އޮތް އެންމެ ބޮޑު ދެ ޕާޓީން ހަޑި ހުތުރު ވަނަންތަކުން މުޚާތަބުކުރަމުންދާ ކަމަށާއި، މިހާރު ގައުމާއި އެ ޕާޓީތަކުގެ ހައްގުގައި ކޮށްދެވުނު އެއްވެސް ކަމެއް ނެތްފަދަ މޭރުމަކުން އަބުރު ކަތިލަމުންދާކަމަށް ކުރީގެ ރައީސް އަދި ޕީޕީއެމްގެ އެޑްވައިޒަރުގެ ގޮތުގައި ހުންނެވުމަށް ފަހު ޖުމްހޫރީ ޕާޓީއާއި ގުޅިވަޑައިގެން ޑރ މުޙައްމަދު ވަހީދު ހަސަން މަނިކު ވިދާޅުވެއްޖެ އެވެ.

ނ. މަނަދޫގައި އޮތް ޤާސިމް އިބްރާހިމްގެ ރިޔާސީ ކެމްޕޭނު ޖަލްސާއެއްގައި ވާހަކަދައްކަވަމުން ޑރ ވަހީދު ވަނީ އެމަނިކުފާނުގެ ހަޔާތުގައި ގައުމާއި ރައްޔިތުންގެ ހައްގުގައި ކޮށްދެއްވާފައިވާ މުހިންމު މަސައްކަތްޕުޅުގެ އަގު ވަޒަންކުރުމުގެ ބަދަލުގައި، އެމަނިކުފާނު ކުޑައިމީސްކޮށް ސިޔާސީ ޕާޓީތަކުން ދައްކަވަމުންދާ ވާހަކަތަކާއި ގުޅިގެން އަމިއްލަ ދިފާއުގައި ރައްދުދެއްވާފަ އެވެ.

އެމަނިކުފާނުގެ ވާހަކަފުޅު ފެއްޓެވީ އެމެރިކާއިން ތައުލީމު ހާސިލުކޮށްގެން އަނބުރާ މާލެއަޑައިގެން ސިޔާސީ މަސައްކަތްޕުޅު ފެއްޓެވި ހިސާބުންނެވެ. ރައްޔިތުންގެ މަޖިލީހުގެ މެމްބަރެއްގެ ގޮތުގައި މަސައްކަތްޕުޅު ކުރައްވަން ފެއްޓެވުމުން އޭރުގެ ސަރުކާރުން ކުރިމަތިކުރުވި ދުއްތުރާތަކުގެ ވާހަކަ ޑރ ވަހީދު ވަނީ އެ ޖަލްސާގައި ވިދާޅުދެއްވާފަ އެވެ. އަދި އެފަހުން ރާއްޖެ ދޫކުރައްވާ ވަޑައިގަންނަވަން ޖެހުނު ސަބަބަށް ވެސް އަލިއަޅުވާލެއްވި އެވެ.

"އަޅުގަނޑުމެންގެ ހުރިހާ ކުދިން، އަޅުގަނޑުގެ ފަރާތުގެ ކުދިންނާއި އަޅުގަނޑުގެ އަންހެނުންގެ ފަރާތުގެ ހުރިހާކުދިން ބައެއް މީހުން އަނދަގޮޑީގައި އެތައް ޒަމާނެއް ވަންދެން ބައިތިއްބާފައި ތިބި. ހައެއްކަ އަށެއްކަ އަހަރުވަންދެން ޖަލުގައި އުޅުނު. އަޅުގަނޑަށް މަޖުބޫރުވީ ރައްޔިތުންގެ މަޖިލީހުން އިސްތިއުފާދީފައި 90 ވަނަ އަހަރު ރާއްޖެ ދޫކޮށް ދާން"

ޑރ މުހައްމަދު ވަހީދު

އެކަން ފާހަގަުރައްވާ ޑރ ވަހީދު ވިދާޅުވީ ދެން އަނބުރާ ރާއްޖެ ވަޑައިގަތީ އެމްޑީޕީ އުފެއްދުމަށް ކަމަށެވެ. އެ މަސައްކަތުގައި ވަރަށް މުހިންމު ދައުރެއް އަދާކުރެއްވި ކަމަށް ޑރ ވަހީދު ވިދާޅުވި އެވެ. އެހެން ނަމަވެސް، އެ ޕާޓީގެ ތެރެއިން ވެސް އެމަނިކުފާނު ބޭރުކޮށްލެއްވި ކަމަށާއި، އެފަހުން އެމްޑީޕީގެ ވެރިކަމުގައި ނަޝީދުގެ އަރިހުގއި މަސައްކަތްޕުޅު ފެއްޓެވީވެސް ގައުމަށް ޚިދުމަތްކުރުމުގެ ހެޔޮ ނިޔަތުގައި ކަމަށް ޑރ ވަހީދު ވިދާޅުވި އެވެ.

"އަޅުގަނޑު އަނބުރާ އައީ އެމްޑީޕީ އުފައްދަން.... އައިސް އެމްޑީޕީ އުފައްދާ ކޮންގްރެސް އަށް ވާދަކުރިން، އަޅުގަނޑު އޮތީ 26 ގޮފި 300 ގޮތްޕަށް އަޅުގަނޑުމެން ބަދަލުކުރިން. އެމްޑީޕީގެ އެންމެ ފުރަތަމަ މުޒާހަރާގައި އެންމެ ކުރީގައި ހުރީ އަޅުގަނޑާއި އިބްރާހިމް ހުސެއިން ޒަކީއާއި. ނަމަވެސް ކަން ދިމާވިގޮތުން އަޅުގަނޑުމެންނަށް ވަރަށް އުނދަގޫކޮށް އަޅުގަނޑުމެން އެ ޕާޓީން ވެސް ބޭރުކޮށްލީ"

ޑރ މުހައްމަދު ވަހީދު

ނަޝީދުގެ ވެރިކަމުގައި ކުރިމަތިވި ކަންތައްތަކުގެ ތެރެއިން، އިސްތިއުފާދެއްވުމުން ވެރިކަމާއި ހަވާލުވެވަޑައިގަތީ ގާނޫނީ ހަމަތަކުގެ ތެރެއިން ކަމަށާއި، އެހެން ނަމަވެސް އޭރުވެސް ރީތި ނަންފުޅެއް ލިބިވަޑައިގެންފައި ނުވާކަމަށް ޑރ ވަހީދު ވިދާޅުވި އެވެ. އަދި އެމަނިކުފާނުގެ ވެރިކަމަށް ޖެއްސުންކުރުމަށް އެމްޑީޕީން އެތައް ކަމެއް ކޮށްފައިވާކަމަށް ޑރ ވަހީދު ވިދާޅުވި އެވެ.

"21 ރޭ ވަންދެން މުޒާހަރާކޮށްގެން ރައީސް އިސްތިއުފާދެއްވީމާ އަޅުގަނޑު މި ގައުމުގެ ކަންކަމާއި ހަވާލުވީ. ހަވާލުވުމުން އަނެއްކާވެސް އަޅުގަނޑު ވެއްޖެ ބޮޑު ވާގީއަކަށް. އަޅުގަނޑު ބާގީއަކަށް ހަދާފައި މުޅި ރާއްޖޭގެ އެންމެންގެ ކުރިމަތީގައި އަޅުގަނޑު ގަން ހިންގާ، އަޅުގަނޑު އަރާހާ ރަށަކުން، ތިބޭފުޅުން ހަނދުމަފުޅު ހުންނާނެ އަޅުގަނޑު އަރާހާ ރަށަކުން އަޅުގަނޑު ފަހަތުން ދުވެ، ކާޅު ކަތިލާ، މި ހުރިހާ ސަކަރާތެއް ގަތް. އެހެންވީމަ އަޅުގަނޑު މީ އެއްވެސް ކަމެއް ކުރި މީހަކަށް ވެސް ނުވޭ. އަޅުގަނޑު އައިސްލާފަ ދިޔަ މީހެއް ދެން"

ޑރ މުހައްމަދު ވަހީދު

އެކަންކަން ފާހަގަކުރައްވާ ޑރ ވަހީދު ވިދާޅުވީ ވެރިކަމުގައި ހުންނަވައިގެން އެމަނިކުފާނު އެ ހައްސާސް ވަގުތުގައި އަމަލުކުރެއްވީ ގައުމާއި ރައްޔިތުންނަށް އެންމެ ފައިދާ ބޮޑު ގޮތަށް ކަމަށެވެ. އެގޮތުން ރައްޔިތުން އެދުނު ގޮތަށް އިންޑިއާގެ ޖީއެމްއާރު ކުންފުނީގެ އަތުން ދިވެހިންގެ އެއާޕޯޓު އަނބުރާ ހޯދައިދީ، އިންޑިއާއަށް ދައްކަން ޖެހުނު ފައިސާ ދެއްކުމުގެ ކަންކަން ހަމަޖައްސައިދެއްވި ކަމަށާއި، އެއީ ގައުމީ މަސްލަހަތު އިސްކުރައްވާ ކޮށްދެއްވި ކަމެއްކަން ޑރ ވަހީދު ފާހަގަުރެއްވި އެވެ.

"ގިނަ ބޭފުޅުން ގަބޫލުކުރާ ގޮތުގައި އަޅުގަނޑަކީ އެއްވެސް ކަމެއް ކުރި މީހެއް ނޫން. އެކަމަކު ތިޔަ ބޭފުޅުން ހަނދުމަފުޅު ހުންނާނެ، ދިވެހިރާއްޖޭގެ ވައިގެ ބަނދަރު، ވެލާނާ އިންޓަނޭޝަނަލް އެއާޕޯޓު.. އަޅުގަނޑު ޖީއެމްއާރު އަތުން އެ އިންޓަނޭޝަނަލް އެއާޕޯޓު އަތުލީ. އޭގެ ބަދަލުގައި ވަރަށް ބޮޑެތި ދަތިތަކާއި ކުރިމަތިލާން ޖެހުނު"

ޑރ މުހައްމަދު ވަހީދު

ރައީސް ޔާމިނުގެ ވެރިކަމުގައި އަޅުއްވާދެއްވި ބޮޑެތި ބިނާތަކުގެ މަޝްވަރާ ފެށިގެން އައީވެސް ޑރ ވަހީދާއި ހަމައިންކަން އެމަނިކުފާނުގެ ވާހަކަފުޅުގައި ފާހަގަކުރެއްވި އެވެ. އެގޮތުން ރައީސް ޔާމިނުގެ އެންމެ ބޮޑު ކާމިޔާބީކަމަށް ވާ ސިނަމާލެ ބްރިޖު އެޅުމުގެ މަޝްވަރާ ޗައިނާއާއެކު އެންމެ ފުރަތަމަ ކުރެއްވީ ޑރ ވަހީދުކަމަށް އެމަނިކުފާނު ވިދާޅުވި އެވެ. އަދިވެސް އެ ވެރިކަމުގައި ކުރެވުނު ތަރައްގީގެ ބައެއް މަސައްކަތްތަކުގެ މަޝްވަރާ ފެއްޓުނީ ރައީސް ވަހީދުގެ ވެރިކަމާއި ހަމައިންކަން ފާހަގަކުރެއްވި އެވެ.

"އަޅުގަނޑު ހަނދާންއެބަހުރި، އަދީބުވެސް ހަނދާން ހުންނާނެ، މަރިޔަމް ޝަކީލާ ވެސް ހަނދާން ހުންނާނެ، އަޅުގަނޑު ޗައިނާއަށް ގޮސް ޗައިނާގެ ބޮޑު ވަޒީރާއި ބައްދަލުކުރި ޖަލްސާގައި ހުޅުމާލެ ބްރިޖުގެ ވާހަކަ ދެއްކީ. އެ ބްރިޖުއަޅަން އެއްބަސް ވީ، އެޖްރިމެންޓެއްގައި އަދި ސޮއި ނުކުރިޔަސް، އެ ޖަލްސާގެ ޔައުމިއްޔާގައި އޮންނާނެ އެ ވާހަކަ. ލ އަތޮޅުގެ މަގު، ރާއްޖޭގައި އޮތް އެންމެ ދިގު މަގު، 23 ކިލޯ މީޓަރު އަޅުގަނޑު އޭތި ހަމަޖެއްސީ. މިހެން ގޮސް ދަންނަވަން ވެއްޖެއްޔާ ކިތަންމެ ކަމެއް އެބަހުރި ދަންނަވަން"

ޑރ މުހައްމަދު ވަހީދު

އެހުރިހާ ކަންކަން ފާހަގަކުރައްވާ ޑރ ވަހީދު ވިދާޅުވީ، އެމަނިކުފާނުގެ ހަޔާތުގައި ގައުމާއި ރައްޔިތުންނަށްޓަކައި އެތައް ޚިދުމަތްތަކެއް ފޯރުކޮށްދެއްވި ނަމަވެސް މިއަދު އެމަނިކުފާނު ކޮށްދެއްވި އެއްވެސް ކަމެއް ނެތްފަދަ ގޮތަކަށް ވާހަކަދައްކަވަމުން ގެންދަވާ ކަމަށެވެ.

މިއަދު އެމަނިކުފާނަކީ އެއްބަޔަކަށް "ކަޅު ކާޅަކަށް"، އަނެއް ބަޔަކަށް "ބާޒަކަށް" ވެފައިވާތީ، އަދި އެފަދައިން މުޚާތަބު ކުރަމުންދާތީ ރައްޔިތުންނަށް އެމަނިކުފާނުގެ ވާހަކަ ގަބޫލުކުރަން ދަތިފުޅުވެސް ވެދާނެ ކަމަށެވެ.

"އަޅުގަނޑުމީ މި ގައުމަށް އެއްވެސް ޚިދުމަތެއް ނުކުރާ ކާޅަކަށް ވެފައި، ބާޒަކަށް ވެފައި، ހުރީމާ އަޅުގަނޑު ދައްކާ ވާހަކަ ތިޔައިން ބައެއް ބޭފުޅުން ގަބޫލުނުކުރުމަކީ އެކަށީގެންވާ ކަމެއް"

ޑރ މުހައްމަދު ވަހީދު

ޑރ ވަހީދު ވިދާޅުވީ ތަފާތު ވަނަންތަކުން ގޮވި ނަމަވެސް، އަދި ކޮށްދިން ޚިދުމަތެއް ނެތްކަމަށް ބުނި ނަމަވެސް މިއަދުވެސް ސިޔާސީ މަސައްކަތްޕުޅަށް ނިކުމެ ހުންނަވާ މި ރިޔާސީ އިންތިޚާބުގައި ޤާސިމް އިބްރާހިމަށް ތާއީދުކުރައްވަން ނިންމެވީ ފަހަރެއްގައިވެސް އިތުރު ގޮތެއް ނެތިގެން ނޫންކަމަށެވެ.

އެމަނިކުފާނަށް ރާއްޖެއިން ބޭރުގައިވެސް އާއިލާއާއެކު އުފާވެރިކަމާއެކު އުޅެވޭނެ ގޮތްތައް އެބަހުރި ކަމަށާއި، އެހެން ނަމަވެސް ރާއްޖޭގެ ރައްޔިތުން އުޅެން އޮތް ތަނަކީ ދިވެހިރާއްޖެ ކަމަށްވެފައި ގައުމުގެ ހާލަތު މިއަދު އޮތީ ވަރަށް ނާޒުކު ފައްތަރެއްގައި ކަމަށް ވާތީ، މިއަދުވެސް އިޚްލާސްތެރިކަމާއި އެކު ކުރައްވަމުން ގެންދަަވާ މަސައްކަތްޕުޅަކީ ގައުމާއި ރައްޔިތުންގެ ހައްގުގައި ކުރައްވާ މަސައްކަތްޕުޅު ކަމަށް ޑރ ވަހީދު ވިދާޅުވި އެވެ.

އަދި އެ މަސައްކަތްޕުޅު ކުރައްވާއިރު، މީހުންގެ ފަރާތުން ކުރިމަތިވާ ފުރައްސާރައަށް މީގެކުރިން ވެސް ބައްލަވާފައި ނުވާނެކަމަށާއި، ކުރިއަށް ވެސް އެކަންކަމަށް ފަރުވާލެއް ނުބަހައްޓަވާނެކަމަށް ޑރ ވަހީދު ވިދާޅުވި އެވެ.