"އަޅުގަނޑުގެ ވެރިކަމެއްގައ ތަހުގީގާއި ޝަރީއަތުގެ މަރުހަލާތަކަށް މުއްދަތެއް ކަނޑައަޅާނަން؛ ވާނުވާގަ ނުބައިތިއްބާނަން"

ކުރިއަށް އޮތް ރިޔާސީ އިންތިހާބު ކާމިޔާބު ކުރައްވައި ވެރިކަމަށް އިންތިޚާބުވެވަޑައިގެންފި ނަމަ، މައްސަލަތައް ތަހުގީގު ކުރުމަށާ، ޝަރީޢަތުގެ މަރުހަލާ ތަކަށް ވަކި މުއްދަތެއް ކަނޑައަޅުއްވާނެ ކަމަށާ، މީހުން ވާނުވާ ނޭނގޭހާލު ޖަލުގައި ބަންދު ކޮށްފައި ނުބައިތިއްްބާނެ ކަމަށް ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމް ވިދާޅުވެއްޖެއެވެ.

ރިޔާސީ އިންތިހާބުގެ ކެމްޕެއިނަށް ނ އަތޮޅަށް ކުރައްވަމުންދާ ދަތުރުފުޅުގައި އެ އަތޮޅު އެ އަތޮޅު ކުޑަފަރިއަށް ވަޑައިގެން އެރަށުގެ ރައްޔިތުންނާ ބައްދަލުކުރައްވާ ވާހަކަދައްކަވަމުން ގާސިމް ވިދާޅުވީ، އެމަނިކުފާނު ސިޔާސީ މައިދާނުގައި މީގެ ކުރިން ކުރެއްވި މަސައްކަތްތަކާއި އަދި މިހާރު ރީޔާސީ އިންތިހާބުގައި ވާދަކުރައްވަން ނިންމަވައި ކުރައްވަމުންދާ ކަންކަމަކީ ދިވެހި ގައުމުގެ އިސްތިގުލާލާއި، މިނިވަންކަމާއި އަމާންކަން ދެމެހެއްޓުމަށްޓަކައި މަސައްކަތް ކަމަށެވެ.

އަދި މިއަދުވެސް މިނިވަންކަމުގެ ވާހަކަ ދައްކަވަނީ، އަޅުވެތި ކަމުގެ ތެރެއަށް ދާން ބޭނުންވާނެ އެއްވެސް ދިވެއްސަކު ރާއްޖޭގައި ނޫޅޭނެކަން ދަންނާތީ ކަމަށްވެސް ގާސިމް ވިދާޅުވި އެވެ.

މިއާއެކު ގާސިމް ވިދާޅުވީ، މިނިވަންކަމުގެ އިތުރުން އެމަނިކުފާނާއި ޓީމުން ދައްކަވަމުންދަނީ ތަރައްގީއާއި އިޖްތިމާއީ އަދާލަތުގެ ވާހަކަ ކަމަށެވެ.

ދެންމެ އަކު އަޅުގަނޑު ކައިރީ އަންހެން ކަނބަލެއް ދެއްކެވީ، އޭނާގެ ދަރިފުޅު ޖަލަށް ލާފައި، ތިން އަހަރު ދުވަސް ވެގެންދާއިރު، ވާނުވާ ޖަހާފައި ހުއްޓޭ ދަންނަވަނީ. އެއީ ޝަރީއަތުގެ ހުކުމް ނިމެންދެން ޖަލުގައި ބާއްވާ ވާހަކަ އެއީ.

ގާސިމް އިބްރާހިމް

ގާސިމް ވިދާޅުވީ، މިސަރުކާރުން ވެރިކަމަށް އައީ އެފަދައިން ވާނުވާގައި މީހުން ޖަލުގައި ނުބައިތިއްބަވާނެ ކަމަށް ވައުދުވެގެން ކަމަށެވެ. އަދި ތަހުގީގު މަރުހަލާ އާއި ޝަރީއަތުގެ މަރުހަލާ އަވަސް ކުރާނެ ކަމަށް ބުނެ މި ސަރުކާރު ވެރިކަމަށް އައި ނަމަވެސް އެކަން ނުކުރައްވާ ކަމަށް އެމަނިކުފާނު ވިދާޅުވި އެވެ.

"ގާނޫނުގައި ނުބެނޭ އެކަންކަން (ޝަރީއަތުގެ ކަންކަން) ވަކި މުއްދަތެއްގައި ނިންމަން ޖެހޭ ވާހަކައެއް. އަޅުގަނޑު މި ވަޢުދުވަނީ، اللهގެ ވާގިފުޅާއެކު، އަޅުގަނޑުގެ ވެރިކަމެއްގައި، އެގޮތަށް އަންނަ މައްސަލަ ތަކުގައި، ކޯޓުތަކަށް މައްސަލަ ދަމަހައްޓާފައި ބޭއްވޭނީ، ފުލުހުން ތަހުގީގު ކުރަންވެސް ދެވޭނީ، ޕްރޮސެކިއުޓާ ޖެނެރަލްއަށް މައްސަލަ ހުށަހެޅުމަށްވެސް ދެވޭނީ، ވަކި މިންވަރެއްގެ ވަގުތު ތަކެއް. ހަމައެއާއެކު ކޯޓުތަކަށް އަޅުގަނޑުމެން ދޭނީ، ކޯޓުގެ ކޮންމެ މަރުހަލާ އަކަށްވެސް ވަކި މުއްދަތެއް.

ގާސިމް އިބްރާހިމް

ގާސިމް ވިދާޅުވީ ތަހުގީގީ މަރުހަލާއާއި ކޯޓު މަރުހަލާތައް ވަކި މުއްދަތެއްގެ ތެރޭގައި ނިންމުމަށްޓަކައި، އެމަނިކުފާނުގެ ވެރިކަމެއްގައި ގާނޫނުތައް ހައްދަވާނެ ކަމަށެވެ.