ޑިމޮކްރެޓްސްގެ ރައީސް ކަމަށް ހަސަން ލަތީފާއި އަމްރު ވާދަކުރައްވަނީ

އެމްޑީޕީގެ ކުރީގެ ރައީސް މުހައްމަދު ނަޝީދު އަށް ވަފާތެރި ގިނަ ބަޔަކު އެޕާޓީން ވަކިވެގެން އުފެއްދި އާ ޕާޓީ "ދަ ޑިމޮކްރެޓްސް"ގެ ރައީސް ކަމަށް އެ ޕާޓީގެ ވަގުތީ ޗެއާޕާސަން އަދި ރައްޔިތުންގެ މަޖިލިހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފާއި އެސްޓީއޯ ގެ ކުރީގެ މެނޭޖިންގ ޑިރެކްޓަރ އަދި އިލްޔާސް ލަބީބު ގެ ރަނިންމޭޓަކަށް ކަނޑައެޅުނު ހުސައިން އަމްރު، ވާދަކުރައްވަން ނިންމަވައިފިއެވެ.

‏ދަ ޑިމޮކްރެޓްސް ގެ އިންޓަރިމް ކައުންސިލުން އިއްޔެ ވަނީ އެ ޕާޓީގެ އެތެރޭގެ އިންތިޚާބު 2 ޑިސެމްބަރުގައި ބާއްވަން ނިންމާފައެވެ.

އިންތިޚާބު އިއުލާން ކުރުމާއެކު އަމްރު ކުރެއްވި ޓުވީޓެއްގައި އޭނާ ވަނީ އެ ޕާޓީގެ ރައީސް ކަމަށް ކުރިމަތިލާފައިވާ ކަން އިއުލާން ކުރައްވައި އެކަމުގަ އެންމެހާ ޑިމޮކްރެޓުންގެ އެއްބާރުލުމާ ތާއީދު ދެއްވުން އެދި ދަންނަވާފައެވެ.

އަމްރުގެ އިތުރުން ހަސަންވެސް ކުރެއްްވި ޓުވީޓެއްގައި އޭނާ ވަނީ ޑިމޮކްރެޓްސް ގެ ރައީސް ކަމުގެ މަގާމަށް ކުރިމަތިލުމަށް ނިންމާފައިވާ ކަމަށް ވިދާޅުވެ ހުރިހާ ޑިމޮކްރެޓުންގެ ތާއީދާއި އެހީތެރިކަން އެކަމުގައި ދެއްވުން ވަރަށް ބޮޑަށް އެދޭ ކަމަށް ވިދާޅުވެފައެވެ.

ދަ ޑިމޮކްރެޓްސް ރަޖިސްޓްރީ ކުރަން 3،560 މީހުންގެ ފޯމް ހުށަހަޅީ ޖޫން އެއް ވަނަ ދުވަހުއެވެ. އެއަށްފަހު އެ ޕާޓީ ރެޖިސްޓާރ ކޮށް، ރިޔާސީ އިންތިހާބުގައި ވެސް ޕާޓީގެ ފަރާތުން ކެންޑިޑޭޓެއް ނެރެފައިވާއިރު، ޑިމޮކްރެޓްސް ގެ ކެންޑިޑޭޓް އިލްޔާސް ލަބީބު ވަނީ އިންތިހާބުން ތިންވަނަ އަށް އެންމެ ގިނަ ވޯޓު ހޯއްދަވާފައެވެ.

މިހާރު އެ ޕާޓީއާ ގުޅުނު މެންބަރުންގެ އަދަދު އިތުރުވެފައިވާއިރު، އެ ޕާޓީއަށް ނިސްބަތްވާ 13 މަޖިލީސް މެންބަރުންވެސް ތިއްބަވައެވެ. އެއާއެކު ރައްޔިތުންގެ މަޖިލީހުގެ މައިނޯރިޓީ އަކީވެސް ޑިމޮކްރެޓްސް އަށް ވަނީ ވެފައެވެ.