ޗާގޯސް މައްސަލާގައި ރާއްޖޭގެ ވިސްނުން ބަދަލުކުރުމާއި ގުޅިގެން ކުއްލި މައްސަލައެއް

ޗާގޯސް މައްސަލައިގައި މޮރިޝަސް އާއި އެއްކޮޅަށް ރާއްޖެއިން ވޯޓުދޭން ސަރުކާރުން ނިންމާފައިވަނީ ގާނުނު އަސާސީއިން ނުލިބޭ ބާރެއްގެ ބޭނުން ނަހަމަގޮތުގައި ހިއްޕަވައިގެން ކަމަށްވާތީ، ބަންޑާރަ ނައިބު އިބްރާހިމް ރިއްފަތާއި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މަގާމުން އަޒުލުކުރުމަށް އިދިކޮޅު އިއްތިހާދުގައި ހިމެނޭ ޕީއެންސީގެ ޕީޖީ ލީޑަރު އާދަމް ޝަރީފު އުމަރު ގޮވާލައްވައިފިއެވެ.

ޗާގޯސް މައްސަލައާއި ގުޅިގެން ރާއްޖޭގެ ވިސްނުން ބަދަލުކުރުމާއި ގުޅިގެން ހުށައެޅި ކުއްލި މައްސަލައަށް ބަހުސްކުރައްވަމުން އާދަމް ޝަރީފް ވިދާޅުވީ ޗާގޯސް މައްސަލައިގައި ސަރުކާރުގެ ވިސްނުން ބަދަލުކުރި ސަބަބު ސާފުނުވާކަމަށެވެ.

އެފަދަ ނިންމުމެއް ސަރުކާރަށް ނިންމޭނީ މަޖިލީހަށް ހުށައަޅާ މަޖިލީހުގެ ރުހުން ލިބިގެން ކަމަށް އާދަމް ޝަރީފް ވަނީ ވިދާޅުވެފައެވެ. އެހެން ނަމަވެސް ސަރުކާރުން އެ ނިންމުން ނިންމާފައިވަނީ ގާނޫނާއި ޚިލާފަށްކަން ތަކުރާރުކޮށް އާދަމް ޝަރީފް ވިދާޅުވިއެވެ.

އާދަމް ޝަރީފް ވިދާޅުވީ، ދިވެހިރާއްޖޭގެ ސަރަހައްދުން ބޮޑު ބައެއް ގެއްލުމުގެ ފުރުސަތު އޮންނަ ގޮތަށް ސަރުކާރުން އެ ނިންމުން ނިންމާ އެކަން އިއުލާނުކޮށްފައިވާއިރު، އެ މައްސަލައިގައި ބައިންލަ އަގުވާމީ ކޯޓުގައި ވަކާލާތު ކުރި ބަންޑާރަ ނައިބު ހުންނެވީ ރިޝްވަތު ނަންގަވައިގެން ތޯ ނޫން ތޯ މަޖިލީހުން ޔަގީންކުރަން ޖެހޭކަމަށެވެ.

ބަންޑާރަނައިބުގެ ނަޒާހަތްތެރި ކަމާމެދު ސުވާލު އުފެދިފައި ވާތީއާއި، އަދި ބަންޑާރަނައިބު ގާނޫނާއި ޚިލާފުވެފައިވާތީ އޭނާ އަޒުލު ކުރުމަކީ މިއަދު މަޖިލީހުން ކުރަން ޖެހޭ ކަމެއްކަމަށް އާދަމް ޝަރީފް ވަނީ ވިދާޅުވެފައެވެ.

"މަޖިލިސް މިހާރު އެބަ ޖެހޭ ސަރުކާރު ޒިންމާދާރު ކުރުވުމަށް އޮއްޓަރު ހުރި މަސައްކަތްތަކެއް ކުރަން. އެޓާނީ ޖެނެރަލް ރިއްފަތު މިހާރު އެ ހުންނެވީ ރިޝްވަތު ނަގައިގެން ތޯ ނުވަތަ ނޫންތޯ އެކަން އަޅުގަނޑުމެން ކަށަވަރުކުރަން ޖެހޭ. ރައީސުލްޖުމްހޫރިއްޔާ ގާނޫނު އަސާސީގެ 3 ވަނަ މާއްދާއާއި 93 ވަނަ މާއްދާއާއި ޚިލާފުވީ ކީއްވެގެންތޯ ބަލަން ޖެހޭ، އަޅުގަނޑުމެންނަކީ ހަރުދަނާ ރަނގަޅު ރައްޔިތުންގެ މަޖިލީހެއް ކަމަށް ވެއްޖެއްޔާ މިއަދު ޖެހޭނީ އަޒުލުކުރަން އެ ފަރާތްތައް"

މަޑުއްވަރީ ދާއިރާގެ މެމްބަރު އާދަމް ޝަރީފް އުމަރު

ޗާގޯސް މައްސަލައާއި ގުޅިގެން އާދަމް ޝަރީފު މަޖިލީހަށް ހުށައެޅުއްވި ކުއްލި މައްސަލައަށް އެންމެ މެމްބަރަކު ފިޔަވައި ހުރިހާ މެމްބަރުން ވަނީ ތާއީދު ކުރައްވާފައެވެ.

އާދަމް ޝަރީފް ވަނީ އެ މައްސަލައިގައި ހުރިހާ މެމްބަރުން ވާހަކަ ދެއްކުމަށް ވަގުތު ދެއްވުމަށް އެދިވަޑައިގެންފައެވެ. އަދި މަޖިލީހުގެ ހުރިހާ ސިޔާސީ ޕާޓީތަކެއް ހިމެނޭހެން ކޮމެޓީއެއް ނަގާ އިންކުއަރީއެއް ހެދުމަށްވެސް ހުށައަޅުއްވާފައެވެ.

ޗާގޯސް މައްސަަލައާއި ގުޅިގެން ސަރުކާރުން މޮރިޝަސްއާއި އެއްކޮޅަށް ވޯޓުދިނުމަށް ނިންމި ނިންމުމަށް މަޖިލީހުގެ ގިނަ މެމްބަރުން ވަނީ ނުރުހުން ފާޅުކޮށްފައެވެ. އަދި އެކަމަކީ ރާއްޖޭގެ މަސް ކަނޑުން ބޮޑު ސަރަހަދެއް މޮރިޝަސްއަށް ދިއުމުގެ ފުރުސަތު އޮތްކަން ފާހަގަކުރައްވާ މެމްބަރުން ވަނީ ނުރުހުން ފާޅުކުރައްވާފައެވެ.