އަޅުގަނޑުމެންނަނީ ފ އަތޮޅު ވިއްކާލުމާއި ދެކޮޅަށް ނިކުތް މީހުން، މިއަދު ކީއްތޯ މި ކުރީ؟:އީވާ

ރާއްޖޭގެ ސަރަހައްދުން ބޮޑު ބައެއް ގެއްލިގެން ދިއުމަށް މަގުފަހިވާގޮތަށް ޗާގޯސް މައްސަލައިގައި ރާއްޖެއިން މޮރިޝަސްއާއި އެއްކޮޅަށް ވޯޓުދޭން ނިންމި ނިންމުމާއި ގުޅިގެން މަޖިލީހުގެ ނައިބުރައީސް އަދި ގަލޮޅު އުތުރު ދާއިރާގެ މެންބަރު އީވާ ނުރުހުން ފާޅުކުރައްވައިފިއެވެ.

ޗާގޯސް މައްސަލައާއި ގުޅޭގޮތުން މަޖިލީހަށް ހުށައެޅި ކުއްލި މައްސަލައަށް ވާހަކަދައްކަވަމުން އީވާ ވިދާޅުވީ ޗާގޯސް މައްސަލައިގައި ސަރުކާރުން މަޖިލީހާއި އެއްވެސް މަޝްވަރާއެއް ނުކޮށް، އަދި ރައްޔިތުންގެ ރުހުން ހޯދާ ނިންމާލި ނިންމާލުމަކީ ވަރަށް ހައްސާސް ނިންމުމެއްކަމަށެވެ.

އެއީ މަޖީދީ މަގުގެ ގަސްތައް ނެގުން ފަދަ މައްސަލައެއް ނުވަތަ ވެންޓިލޭޓަރުތައް ނުގެނެވުން ފަދަ މައްސަލައަކަށް ވުރެ ބޮޑު ރައްޔިތުންގެ މަސްލަހަތު އިންތިހާއަށް އޮތް ކަމެއްކަމަށް އީވާ ވިދާޅުވިއެވެ.

މިހާތަނަށް އައިރުވެސް، ސަރުކާރުގެ ވިސްނުން ބަދަލުވި ސަބަބު ސާފުކޮށްދެވިފައި ނުވަނީ އިންތިހާއަށް ކަންބޮޑުވުން އޮތް ކަމެއްގެ ގޮތުގައި އީވާ ފާހަގަކުރެއްވިއެވެ.

" މި ދައްކަނީ ދިވެހިރާއްޖޭގެ ސަރަހައްދުގެ، ރާއްޖޭގެ އިކޮނޮމިކް ޒޯނުގެ ވާހަކައެއް. އަޅުގަނޑަށްވެސް އެނގޭ ފޮރިން ޕޮލިސީއަކީ ރައީސުލްޖުމްހޫރިއްޔާގެ އިޚްތިޔާރު، އެހެން ނަމަވެސް ދިވެހިރާއްޖޭގެ ސަރަހައްދުން ބައެއް ގެއްލޭވަރުގެ ނިންމުމެއް، ކޮންމެސް ދުވަހަކު ގެއްލިދާނެ ވަރުގެ ނިންމުމެއް، އެއީ އެމްއޯޔޫއަކުން ވިޔަސް ބައިނަލްއަގުވާމީ މުއާހަދާއަކުންކަމަށް ވިޔަސް، އދ ގެ ވޯޓަކުންކަމަށް ވިޔަސް، ކޯޓަކުން ވިޔަސް ޓްވީޓަކުން ވިޔަސް، ސިޓީއަކުން ވިޔަސް ދިވެހިރާއްޖޭގެ ސަރަހައްދުގެ ބައެއް ގެއްލޭވަރުގެ ނިންމުމެއް ނިންމަން ޖެހޭނީ އެ ހިސާބަށް ދާ ވަރުގެ ކަމެއްވެސް އަންނަން ޖެހޭނީ ރައްޔިތުންގެ މަޖިލީހާއި މަޝްވަރާކޮށްފަ"

މަޖިލީހުގެ ނައިބުރައީސް އީވާ

އެއާއެކު އީވާ ވިދާޅުވީ އެމްޑީޕީއަކީ 2018 ގައި ކުރީގެ ރައީސް ޔާމީން އަބްދުލްގައްޔޫމުގެ ވެރިކަމުގައި ފ އަތޮޅު ވިއްކާލަން މަސައްކަތްކުރިކަމަށް ތުހުމަތުކޮށް އެކަން ހުއްޓުވުމަށް މަގުމައްޗަށް ނިކުން މީހުންކަމަށެވެ. އެހެން ނަމަވެސް މިއަދު ވެރިކަމުގައި ތިބެގެން ރާއްޖޭގެ ސަރަހައްދުން ބައެއް ގެއްލޭގޮތަށް ނިންމުންތައް ނިންމަމުންދާއިރު މި ކުރެވެނީ ކޮން ކަމެއްތޯ އީވާ ވަނީ ސުވާލު އުފައްދާފައެވެ.

"އަޅުގަނޑުމެންނަކީ 2018 ގައި ރައީސް ޔާމީން ފ އަތޮޅު ވިއްކާލަން ވީމާ ނިކުތް މީހުން. 'ވަޓް ދަ ފާފު' ވިޔައިފަ ނިކުތް މީހުން. އޭރު ދެކޮޅު  ހެދީ ރައީސް ޔާމީން ފ އަތޮޅު ވިއްކާލަން އުޅުނީމަ އެއް ނޫން، ދެކޮޅު ހެދީ ފައިސާއަށް އެކަނި ވިއްކާލަން އުޅޭތީއެއްވެސް ނޫން. އަޅުގަނޑުމެން ދެކޮޅު ހެދީ މި ސަރުކާރުން ވިޔަސް ރައީސް ޔާމީންގެ ސަރުކާރުން ވިޔަސް ވިއްކާލަން ވިޔަސް، ހިލޭ ސާބަހަށް ދޭން ވިޔަސް ދިވެހިރާއްޖޭގެ ސަރަހައްދުން ބައެއް ދޫވާތީވެ"

މަޖިލީހުގެ ނައިބު ރައީސް އީވާ

އީވާ ވިދާޅުވީ އެ ކަންކަމާއި ދެކޮޅަށް ވަކާލު ކުރި މީހުން މިއަދު ވެރިކަމުގައި ތިބެގެން ޗާގޯސް މައްސަލައިގައި މި ނިންމި ނިންމުމަކީ މުޑުދާރު ސިފަ ޖެހިފައިވާ ނިންމުމެއްކަމަށެވެ.

ރައްޔިތުންގެ ރުހުން ހޯދުމަކާއި ނުލާ އެވަރުގެ ނިންމުމެއް ނިންމުގެ ބާރު ގާނޫނުން ސަރުކާރަށް ލިއްބައިދީފައި ނުވާކަމަށާއި، ސަރުކާރުގެ އެ ނިންމުމާއި ދެކޮޅު ކަމަށް އީވާ ވިދާޅުވިއެވެ. އަދި އެ މައްސަލައަކީ ޚާއްސަ އަހަންމިއްޔަތުކަމެއް ދީގެން މަޖިލީހުން ބަލަން ޖެހޭ މައްސަލައެއްގެ ގޮތުގައި އީވާގެ ވާހަކައިގައި ވަނީ ވިދާޅުވެފައެވެ.