ސަރުކާރު ފެއިލްވެއްޖެ، މަޖިލީހުން ގައްދާރުނުވެ ގޮތް ނިންމަން ޖެހޭ: ޒާހިރު

ރައްޔިތުންނާއި ގައުމު ހިމާޔަތްކުރުމަށް ސަރުކާރު ފެއިލްވެއްޖެކަމަށާއި، ދެން އޮތީ ރައްޔިތުންނަށް ގައްދާރު ނުވެ މަޖިލީހުން ނިންމަން ޖެހޭ ކަންކަން ނިންމުމުގެ މަރުހަލާކަމަށް މަޖިލީހުގެ ގައްދޫ ދާއިރާގެ މެމްބަރު އަހުމަދު ޒާހިރު ވިދާޅުވެއްޖެއެވެ.

މެމްބަރު ޒާހިރު މިފަދައިން ވިދާޅުވެފައިވަނީ ރާއްޖޭގެ ސަރަހައްދުން ބައެއް ގެއްލޭގޮތަށް ޗާގޯސް މައްސަލައިގައި ސަރުކާރުން މޮރިޝަސްއާއި އެއްކޮޅަށް ވޯޓު ދިނުމަށް ނިންމި ނިންމުމާއި ގުޅިގެން މަޖިލީހުގައި ނުރުހުން ފާޅުކުރައްވަމުންނެވެ.

ޒާހިރު ވިދާޅުވީ ސަރުކާރެއް ވުޖޫދަށް ގެންނަނީ ރައްޔިތުންނާއި ގައުމުގެ ހައްގުތައް ހިމާޔަތްކުރުމުގެ މާތް މަގްސަދުގައިކަމަށެވެ. އެހެން ނަމަވެސް ޗާގޯސް މައްސަލައިގައި ސަރުކާރުން އަމަލުކޮށްފައިވާގޮތުން މި ސަރުކާރަށް އޮތް އިތުބާރު ގެއްލިފައިވާކަމަށް އޭނާ ވިދާޅުވިއެވެ.

އޭނާ ވިދާޅުވީ، މިއީ ކުޑަ ކަމެއް ނޫންކަމަށެވެ. އަދި މިއީ އާންމު އުސޫލުން ހިންގާ ކަމެއް ނޫންކަމަށެވެ. ރައްޔިތުންގެ ރުހުން ހޯދަން ޖެހޭ ކަންކަން ރައީސުލްޖުމްހޫރިއްޔާގެ ސިޓީފުޅަކުން ނިންމާލުމަކީ ސަރުކާރު ފެއިލްވުންކަމަށް ޒާހިރު ވަނީ ތަކުރާރުކޮށް ވިދާޅުވެފައެވެ.

އެއާއެކު އޭނާ ވަނީ ސަރުކާރު ފެއިލްވީމާ ދެން މަޖިލީހުން އަދާކުރަން ޖެހޭ ޒިންމާ ރައްޔިތުންނަށް ގައްދާރުނުވެ އިޚްލާސްތެރިކަމާއެކު އަދާކުރެއްވުމަށް މަޖިލީސް މެމްބަރުންނަށް ގޮވާލައްވާފައެވެ.

"މިއީ ކުޑަ ކަމެއް ނޫން. އިތުބާރު ގެއްލޭ ވަރުގެ ކަމެއް މީ، އިތުބާރު ގެއްލިއްޖެ. އެހެންވީމާ ދެން ކަންކުރަންވީ ގޮތް މި އިއްޒަތްތެރި މަޖިލީހުގެ ހުރިހާ މެމްބަރުން ރަނގަޅަށް ވިސްނަވައިގެން ކަންކުރެއްވުން އަޅުގަނޑު އެދެނީ. މި މަޖިލީސް ރައްޔިތުންނަށް ގައްދާރު ނުވާނެކަން އަޅުގަނޑު ޔަގީންކުރަން. ސަރުކާރުން ހީކުރީ 65 މެމްބަރުން ތިބީމާ ބޭނުންހާ ގޮތެއް ހެދޭނެކަމަށް، ރައްޔިތުންނަށް ރޭކާވެސް ނުލާނެ ގޮތަށް ކަންކަން ކުރެވޭނެ ކަމަށް، އެހެންނެއް ނުވާނެ"

ގައްދޫ ދާއިރާގެ މެމްބަރު އަހުމަދު ޒާހިރު

ޒާހިރު އިތުރަށް ވިދާޅުވީ ސަރުކާރުން ބޭނުންވާ ގޮތަށް މަޖިލީހުން ކަންކަން ދީލައިގެން ނުވާނެކަމަށެވެ.

ޗާގޯސް މައްސަލައިގައި ސަރުކާރުން ގާނޫނާއި ގަވައިދާއި ޚިލާފަށް ނިންމުންތައް ނިންމާފައިވާއިރު، އެ ނިންމުންތަކުގެ ޒިންމާ އުފުލަން ޖެހޭނެކަމަށާއި، އެ ފަރާތްތަކާއި ދޭތެރޭ ފިޔަވަޅު އެޅުމަށް މަޖިލީހުން ފަސްޖެހިގެން ނުވާނެކަމަށް ޒާހިރު ވަނީ ވިދާޅުވެފައެވެ.