"މޮރިޝަސް ކޮޅަށް ބުރަވެ ރައީސް ޞާލިހު ސިޓީ ފޮނުވީ ތަންދޮރު އެނގިނުލައްވާތީ"
މޮރިޝަސްއަށް ޗާގޯސްގެ ސިޔާދަތީ ބާރުތައް ލިބެންޖެހޭކަމަށް ގަބޫލުފުޅުކުރައްވާ މޮރިޝަސްގެ ބޮޑުވަޒީރަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ސިޓީފުޅެއް ފޮނުއްވީ އެމަނިކުފާނަށް ތަންދޮރު އެނގިވަޑައިނުގަންނަވާތީކަމަށް ރާއްޖޭގެ ބަންޑާރަނައިބުގެ މަގާމު 10 އަހަރު ފުރިހަމަކުރައްވާފައިވާ އަދި ރާއްޖޭގެ ސަރަހައްދު ކަނޑައެޅުމުގައި އިސްކޮށް ހަރަކާތްތެރިވެފައިވާ ޑރ މުހައްމަދު މުނައްވަރު ވިދާޅުވެއްޖެއެވެ.
ޑރ މުނައްވަރު މިފަދައިން ވިދާޅުވެފައިވަނީ ޗާގޯސް މައްސަލައިގައި މޮރިޝަސްކޮޅަށް ސަރުކާރުން ވޯޓުދޭން ނިންމުމާއި ގުޅިގެން ހޫނު ބަހުސެއް އުފެދިފައިވާ ދަނޑިވަޅެއްގައި ނޫސްވެރިންނަށް ދެއްވި ޕްރެސް ކޮންފަރެންސްއެއްގައި ވާހަކަދައްކަވަމުންނެވެ.
އެގޮތުން ޑރ މުނައްވަރު ވިދާޅުވީ ޗާގޯސްގެ ސިޔާދަތު މޮރިޝަސްއަށް ލިބެން ނުޖެހޭކަން ބަޔާންކޮށް ބައިނަލްއަގުވާމީ ކޯޓެއްގައި ރާއްޖެއިން ދިފާއުކުރަމުންދަނިކޮށް، އަދި ވަކިން ޚާއްސަކޮށް އެ މައްސަލަ މިހާތަނަށް ނުނިމި އޮތްވާ، މޮރިޝަސްއަށް ޗާގޯސްގެ ސިޔާދަތު ދޭން ޖެހޭކަމަށް ގަބޫލުކޮށް ސިޓީފުޅު ފޮނުވުމަކީ ކޮށްގެންވާނެ ކަމެއް ނޫންކަމަށެވެ. އަދި މިއީ އެފަދައިން ވިދާޅުވާންވީ ވަގުތުވެސް ނޫންކަމަށެވެ.
މޮރިޝަސްއަށް ޗާގޯސްގެ ސިޔާދަތު ދޭން ޖެހޭކަމާމެދު އޮތީ ބަހުސެއް ކަމަށާއި، ބައިނަލް އަގުވާމީ އެއްވެސް އިދާރާއަކުން އެކަން އެގޮތަށް ވާން ޖެހޭކަން ކަނޑައަޅާފައި ނުވާކަމަށް ޑރ މުނައްވަރު ވިދާޅުވިއެވެ. އަދި މި ހާލަތުގައި ރައީސްގެ ސިޓީފުޅެއް މޮރިޝަސްގެ ބޮޑު ވަޒީރަށް ފޮނުވުމުން، ދުނިޔޭގެ ކަންކަން ހިނގާގޮތް އެމަނިކުފާނަށް އެގިވަޑައިނުގަންނަވާކަން ހާމަވާކަމަށް ޑރ މުނައްވަރު ވިދާޅުވިއެވެ.
"މޮރިޝަސްއަށް އެތާގެ މައްޗަށް ސިޔާދަތު ލިބިގެންވާކަން އެއީ ބަހުސެއް، ހީއެއް، އިބްރާހިމް މުހައްމަދު ސޯލިހު ރައީސުލްޖުމްހޫރިއްޔާ ކަމުގެ މަގާމުގައި ހުންނަވައިގެން މޮރިޝަސްގެ ބޮޑުވަޒީރަށް އެކަން ގަބޫލުކުރާނެކަމަށް ސިޓީއެއް ފޮނުވުމަކީ އަޖައިބެއް. އެހެންނާ ދުނިޔެ ހިނގާގޮތް އެނގިވަޑައިނުގަންނަވަނީ، އެހެން ނޫނީ ހަމަ ތަންދޮރު ނުފިލަނީ، ބޮޑަށް ބުރަވެވެނީ އެހެން ކަމަށް"
ޑރ މުހައްމަދު މުނައްވަރު
ޑރ މުނައްވަރު ވިދާޅުވީ ގައުމަކާއި ދެކޮޅަށް ޝަރުއީ ކޯޓެއްގައި ވަކި ގޮތަކަށް ވަކާލާތު ކުރައްވަމުން ގޮސް ވަކި ހިސާބަކުން ދައުލަތުގެ ސްޓޭންޑް ބަދަލުކޮށް، އެ ގައުމަށް ތާއީދުކުރުމަކީ ރާއްޖެއާއި މެދު އޮންނަ ސީރިއެސްކަން ގެއްލިގެންދާނެ ކަމެއްކަމަށެވެ. އަދި އެއީ ރާއްޖެއަށް މަލާމާތް ރައްދުވާނެ ކަމެއްކަމަށެވެ.
ރައީސް ސޯލިހުގެ ސިޓީފުޅަކީ މިހާރު ކޯޓުގައި ކުރިއަށްދާ މައްސަލަ މޮރިޝަސްއަށް ދޫކޮށްލުމާއި އެއްފަދަ ކަމެއްކަމަށް ޑރ މުނައްވަރު ވިދާޅުވިއެވެ. އަދި އެކަމުގެ ސަބަބުން އެ މައްސަލައިގައި ކުރި ހޯދަން އުނދަގޫވާނެކަމަށް ޑރ މުނައްވަރުގެ ވާހަކައިގައި ވަނީ ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
