ކޮފީ ހައްދައި، "ޒުވާން ދަނޑުވެރިޔާ" ތާރީޚީ ކާމިޔާބީއަކާ ދިމާލަށް

ދިވެހިރާއްޖޭގެ ދަނޑުވެރިކަމުގެ ޞިނާޢަތަކީ ޤައުމީ ފުދުންތެރިކަމާއި ކާބޯތަކެތީގެ ރައްކާތެރިކަމަށްޓަކައި ނުހަނު މުހިންމު ދާއިރާއެކެވެ. މި ދާއިރާއިން އާންމުންގެ ބޮޑު މަޤްބޫލުކަމެއް ހޯދާފައިވާ އައްޑޫ މީދުއަށް އުފަން ޢަބްދުﷲ ރަމްޒީ (ޒުވާން ދަނޑުވެރިޔާ) މިވަނީ ރާއްޖޭގެ ދަނޑުވެރިކަމުގެ ތާރީޚުގައި ފާހަގަކޮށްލެވޭނެ ފަދަ ނަތީޖާއެއް ހޯދާފައެވެ. އޭނާ ދެކެމުން އައި ހަތަރު ހުވަފެން މިހާރު މިވަނީ ޙަޤީޤަތަކަށް ހަދާފައެވެ. އެއީ ފުޅާ ދާއިރާއެއްގައި ޑްރެގަންފްރުޓް، ކިއުކަމްބާ އަދި މޭބިސްކަދުރު ހެއްދުމުގެ އިތުރުން، ރާއްޖޭގެ ތާރީޚުގައި ވެސް އަލަށް ކޮފީ ގަސް ހެއްދުމުގެ މަސައްކަތެވެ. ކޮފީ ހެއްދުމަކީ ރަމްޒީ ވަރަށް ކުރިންސުރެ ކަނޑައަޅައިގެން ހުރި އެންމެ ބޮޑު ޢަޒުމެވެ.

ކޮފީގަސް ހެއްދުމަށް ޝައުގުވެރިކަން އުފެދުނީ ކިހިނެތް

ރަމްޒީ މި ދާއިރާއަށް ޝައުޤުވެރިވީ އޭނާގެ ކާފައާއި، މާމަ އަދި ބޭބެމެން ކުރި ބުރަ މަސައްކަތްތައް ފެނި، އަމިއްލަ ފަސްގަނޑުގައި ދިރިއުޅެން ބޭނުންވުމުންނެވެ. އެގޮތުން 2019 ވަނަ އަހަރު ދަނޑުވެރިކަމުގެ ތެރެއަށް ނުކުމެ، ފުރަތަމަ ޑްރެގަންފްރުޓް ހައްދަން ފެށުމަށްފަހު، ވިޔަފާރި އުސޫލުން ކިއުކަމްބާ އަދި މޭބިސްކަދުރު ވެސް ކާމިޔާބުކަމާއެކު ހެއްދިއެވެ. ނަމަވެސް، އޭނާގެ ހިތުގައި އަބަދުވެސް އޮތް އެންމެ ބޮޑު ހުވަފެނަކީ ރާއްޖޭގެ ބިމުގައި ކޮފީ ގަސް ހައްދައި، ކޮފީ އޮށް އުފެއްދުމެވެ. މި ވާހަކަ 2021 ވަނަ އަހަރު ޓީވީ މޯލްޑިވްސްއަށް ދިން އިންޓަވިއުއެއްގައި ވެސް އޭނާ ހާމަކުރިއެވެ. އަދި މިފަހުން އޭނާ ސޯޝަލް މީޑިއާގައި ކުރި ޕޯސްޓަކާއެކު މި ޚަބަރު ވަނީ މުޅި ރާއްޖެއަށް ވައިރަލްވެގެން ގޮސްފައެވެ.

ކޮފީގަސް ހެއްދުމަށް ކުރި ދަތުރު

ވޮއިސްއަށް މި ވާހަކަ ކިޔައިދެމުން ރަމްޒީ ބުނީ މި އުންމީދު ޙަޤީޤަތަކަށް ހެދުމަށް އޭނާ ކުރި ދަތުރަކީ ފަސޭހަ ދަތުރެއް ނޫންކަމަށެވެ. އެގޮތުން 2021 ވަނަ އަހަރު ޕާކިސްތާނުން ކޮފީ ގަސް ގެނެސްގެން ކުރި ފުރަތަމަ މަސައްކަތް ދިޔައީ ނާކާމިޔާބު ވެގެންނެވެ. އެހެންނަމަވެސް، ކެތްތެރިކަމާއެކު އުންމީދު ކަނޑާނުލައި، 2022 ވަނަ އަހަރު އަނެއްކާވެސް ސްރީލަންކާއިން 4-5 އިންޗީގެ ޅަ ކޮފީ ގަސް ގެނައެވެ. ރާއްޖޭގެ ހޫނުގަދަ މާހައުލަށް އެ ގަސްތައް ހޭނުވުމަށްޓަކައި، ގާތްގަނޑަކަށް 80 އިންސައްތަ ހިޔާވާނެހެން ގަސްމުށީގައި އިންދައިގެން ރަމްޒީ ބެލެހެއްޓިއެވެ. އަދި ދޭތެރެދޭތެރެއިން އަވީގައި ބަހައްޓަމުންނާއި، ފަސްގަނޑުގެ ޕީ.އެޗް ލެވެލް (pH 6) އެސިޑިކް މިންވަރުގައި ހިފަހައްޓައިގެން އަހަރެއްހާ ދުވަހު ނުހަނު ފަރުވާތެރިކަމާއެކު މަސައްކަތް ކުރިއެވެ. އޭގެ ނަތީޖާއެއްގެ ގޮތުން، 2024 ވަނަ އަހަރު ނިމެން އުޅެނިކޮށް، ސީދާ އަވީގެ ތެރޭގައި އެ ގަސްތައް ހެދިބޮޑުވާ މިންވަރަށް ހާނުވައިލެވުނެވެ.

އޭގެ ނަތީޖާއެއްގެ ގޮތުން، 2025 ވަނަ އަހަރުގެ ކުރީކޮޅު ގަހުގައި މާ އަޅަން ފެށި. ނަމަވެސް، ޤުދުރަތީ ގޮތުން ޕޮލިނޭޓް ނުވާތީ މާތައް ކޮފީ އޮށަކަށް ބަދަލެއް ނުވި. އެހެންވެ، ޕޮލިނޭޓަރުން ޝައުޤުވެރި ކުރުވުމަށްޓަކައި ގަސް ކައިރީގައި މާގަސްތައް އިންދައި، އަދި އަމިއްލައަށް (މެނުއަލްކޮށް) ޕޮލިނޭޓް ކުރަން ކުރި މަސައްކަތް ވެސް ފުރަތަމަ ތިން ފަހަރު ދިޔައީ ނާކާމިޔާބު ވެގެން

އެހެންނަމަވެސް، ހިތްވަރު އެލުވާނުލައި، ބޮޑުވެފައިވާ ގަސްތަކުން އެއަރ ލޭޔަރިންގ (air layering) ހަދައިގެން އިތުރު ގަސް އުފައްދައި، ކުރި މިންނެތް މަސައްކަތުން މިހާރު ވަނީ މި ޢަޒުމް ކާމިޔާބު ވެފައެވެ. ރަމްޒީ ބުނީ މިއީ ވަރަށް ގިނަ ގޮންޖެހުންތަކާއި، އެކި ފާޑުކިޔުންތަކާ ކުރިމަތިލައި ހޯދި ތާރީޚީ ކާމިޔާބީއެއް ކަމަށެވެ.

މިހާރު އޭނާ ހައްދާ ކިއުކަމްބާ ފަދަ ތަކެތި ކާމިޔާބުކަމާއެކު ބާޒާރަށް ނެރެވެމުންދާ ފަދައިން، އައްޑޫ ސިޓީގެ އިތުރުން މުޅި ރާއްޖެއަށް ބޭނުންވާ މިންވަރަށް ވިޔަފާރި އުސޫލުން ކޮފީ އުފެއްދުމަކީ ރަމްޒީގެ އެންމެ ބޮޑު އުންމީދެވެ. އޭނާގެ ކުރިމަގުގެ އަމާޒަކީ މި ކޮންމެ ގަހަކުން އިތުރު 10 ގަސް އުފައްދައި، ރާއްޖޭގައި އަލަށް ތަޢާރަފުކުރި މި ކޮފީ އުފެއްދުން ވިޔަފާރީގެ ފުޅާ ދާއިރާއަކަށް ފުޅާކޮށްލުމެވެ. ޒުވާން ދަނޑުވެރިޔާ މި ދައްކުވައިދިން ސާބިތުކަމަކީ ދިވެހިރާއްޖޭގެ ދަނޑުވެރިކަމަށް އިންޤިލާބީ ބަދަލެއް ގެނުވައި، ދިވެހި ޒުވާނުންނަށް މަސައްކަތްތެރިކަމުގެ ރިވެތި ނަމޫނާއެއް ދައްކުވައިދިން އުންމީދީ ފެށުމެއްކަމަށް މިއަދު ގިނަ ބަޔަކު ގަބޫލުކުރެއެވެ.