ކޯލިޝަނާއި މަޝްވަރާ ނުކުރިޔަސް ރައީސް ކަންކަން ނިންމަވަނީ ގައުމަށް އެންމެ ފައިދާވާ ގޮތަށް: މިއުވާން

ރައީސުލްޖުމްހުރިއްޔާ އިބްރާހީމް މުހައްމަދު ޞާލިހު، ކޮންމެ ދުވަހަކު ރައްޔިތުންގެ ކަންކަމުގައި ނިންމުންތައް ނިންމަވާ ކަމަށާ، އެއިން ކޮންމެ ދުވަހަކު ކޯލިޝަނާ މަޝްވަރާ ނުކުރި ކަމުގައިވިޔަސް އެމަނިކުފާނުގެ ނިންމެވުންތަކަކީ ޤައުމަށް އެންމެ ފައިދާވާނެގޮތަށް ނިންމަވާ ނިންމުންތަކެއްކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.

ރައީސް އޮފީހުގައި މިއަދު އޮތް ނޫސްވެރިންގެ ބައްދަލުވުމުގައި ކޯލިޝަން ޕާޓްނަރުންނާއި ރައީސް ސާލިހާ އެކު ބައްދަލުވުން ނުބާއްވަނީ ކީއްވެގެންތޯ އާއި ބައްދަލުވުން ބާއްވާ މަންޒަރު ނުފެންނަނީ ކީއްވެތޯ ނޫސްވެރިއެއް ކުރެއްވި ސުވާލަށް ޖަވާބު ދެއްވަމުން މިއުވާން ވިދާޅުވީ، ކޯލިޝަންގައި ހިމެނޭ ލީޑަރުންނާއި އެކު ރައީސް ސާލިހު އާ އެކު މަޝްވަރާތައް ކުރެވި ކަންކަމުގައި ވާހަކަ ދެކެވި ލަފާއަރުވާ ކަމަށެވެ.

މިއާއެކު މިއުވާން ވިދާޅުވީ، ރައީސުލްޖުމްހުރިއްޔާ އަކީ ކޮންމެ ދުވަހަކު ރައްޔިތުންގެ ކަންކަމުގައި ނިންމެވުންތައް ނިންވަމާ ބޭފުޅެއް ކަމަށާ، އެހެންކަމުން އެއިން ކޮންމެ ފަހަރަކު، ކޯލިޝަނާ މަޝްވަރާކޮށްގެން ނިންމާ ނިންމުންތަކެއް ނޫންނަމަވެސް، ރައީސްގެ ނިންމެވުންތަކަކީ ޤައުމަށް އެންމެ ފައިދާވާނެގޮތަށް ނިންމަވާ ނިންމުންތަކެއްކަމަށެވެ. އެހެންނަމަވެސް، ބޮޑެތި ނިންމުންތައް ނިންމަވާއިރު ކޯލިޝަނުގެ ލަފާވެސް އެމަނިކުފާނު ހޯއްދަވާކަމަށް މިއުވާން ވިދާޅުވިއެވެ.

މީގެ އިތުރުން މިއުވާން ވިދާޅުވީ، ސަރުކާރު 4 އަހަރު ފާއިތުވެގެން ދިޔައިރު، ކޯލިޝަން ދެމެހެއްޓެވިދާނެކަން ރައީސް އިބްރާހީމް މުޙައްމަދު ޞާލިޙް ސާބިތުކޮށްދެއްވާފައިވާކަމަށެވެ.

"އެކި ސިޔާސީ ޕާޓީތައް އުޅޭތީ ޚިޔާލުތަފާތުވާ ކަންތައްތަކެއްވެސް ހުރޭ. އެކަމަކު ކޯލިޝަން މިއަދާހަމައަށް ވެސް ދެމި މިއޮތީ ވަރަށް ބަދަހިކަމާ އެކީގައި." މިއުވާން ވިދާޅުވިއެވެ.

2018ގައި ރައީސް އިބްރާހީމް މުޙައްމަދު ޞާލިޙް ވެރިކަމަށް ވަޑައިގަތީ، އެމްޑީޕީ އިސްވެ އޮވެ އުފެއްދެވި ކޯލިޝަން ސަރުކާރަކާއެކުއެވެ. މި ކޯލިޝަންގައި ހިމެނެނީ އެމްޑީޕީގެ އިތުރުން އަދާލަތު ޕާޓީއާއި، އެމްއާރްއެމްއާއި، ޖުމްހޫރީ ޕާޓީއެވެ. އަދި ދައުރުގެ މިހާތަނަށް އައިއިރު، ސަރުކާރުން ކުރާ މުހިންމު ކަންކަމުގައި ކޯލިޝަނާއި މަޝްވަރާ ނުކުރާ ކަމުގެ ޝަކުވާ ކޯލިޝަންގެ ލީޑަރުން ދޭތެރެއިން އަންނަނީ ކުރަމުންނެވެ.