އަދަބީ މުބާރާތްތަކުގައި ބައިވެރިވާ ބައެއް ދަރިވަރުންނާއި މިނިސްޓަރު ނަސީރު ބައްދަލުކުރައްވައިފި

ދިވެހިބަހުގެ އެކެޑަމީން އިންތިޒާމު ކޮށްގެން ބާއްވާ އަދަބީ މުބާރާތްތަކުގައި ބައިވެރިވާ ބ.ތުޅާދޫ މަދަރުސާގެ ދަރިވަރުންގެ ބައެއް ފަރިތަކުރުންތައް ދިވެހި ބަހާއި ސަގާފަތާ ތަރިކައާބެހޭ ވަޒީރު އާދަމް ނަޞީރު އިބްރާހީމް ބައްލަވައިލައްވައިފިއެވެ.

ތުޅާދޫ ކައުންސިލުގެ ދަޢުވަތަކަށް އެރަށަށް ކުރެއްވި ދަތުރުފުޅުގެ ތެރެއިން އެރަށު މަދަރުސާގެ ބައެއް ދަރިވަރުންނާއި ބައްދަލު ކުރައްވައި މިނިސްޓަރ ވަނީ އަދަބީ ރޮގުން ކުރިއަށްދާން ބޭނުންވާ ދަރިވަރުންނަށް މުހިންމު 4 ނަސޭހަތެއް ދެއްވާފައެވެ.

އެއީ، އަޑުއެހުމާއި، ކިޔުމާއި، ލިޔުމާއި އަނގަބަހުން ބަޔާންކުރުމެވެ. އެގޮތުން ވަޒީރު ވަނީ ސިޔަރަތު ފަދަ އަދަަބީ އުފެއްދުންތައް އަޑުއެހުމަށާއި ގިނަ ލިޔުންތައް ކިޔުމަށް ނަސޭހަތްތެރިވެވަޑައިގެންފައެވެ.

މީގެ އިތުރުން މިނިސްޓަރ ވަނީ އަދަބީ މުބާރާތްތައް އިންތިޒާމުކޮށް ބޭއްވުމުގައި ދިވެހިބަހުގެ އެކެޑަމީގެ ރައީސް ޑރ. އަޝްރަފް އަބްދުޢްރަޙީމާއި އެކެޑަމީގެ މުވައްޒަފުން ކުރައްވާ ބުރަ މަސައްކަތް ފާހަގަކުރައްވާފައެވެ. އަދި މިފަދަ މުބާރާތްތަކަށް ދަރިވަރުން ފަރިތަކޮށްދެއްވުމަށް މުދައްރިސުން ކޮށްދެއްވާ މަސައްކަތްތަކަށްޓަކައި މިނިސްޓަރު ވަނީ ޝުކުރު އަދާކުރައްވާފައެވެ.

މިނިސްޓަރ ވަނީ އަދަބިއްޔަތާއި ޤައުމިއްޔަތުގެ ކަންކަން ދިރުވުމަށް އަވަސް ހައްލެއް ގެނައުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަޞައްވަރުގައި ވަރަށް އިސްކަން ދެވިފައިވާ ކަމެއްކަން ފާހަގަކުރައްވައި އެކަމުގެ ނަތީޖާ ފެންނަނިވި ގޮތަށް އެކަންކަން ކުރިއަށްދާނެކަމަށް ވިދާޅުވެފައެވެ.

‎