މި ސަރުކާރަކީ އިންޑިޔާކަނޑަށް ޖެހިފައޮތް 'ބޮޑު މުސީބާތެއް': ސައީދު
މި ސަރުކާރަކީ އިންޑިޔާކަނޑަށް ޖެހިފައޮތް 'ބޮޑު މުސީބާތެއް' ކަމަށް ޕީއެންސީގެ ނައިބު ރައިސް އަދި ރައްޔިތުންގެ މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ވިދާޅުވެއްޖެއެވެ.
ސައީދު މިހެން ވިދާޅުވީ، އިދިކޮޅު ކޮންގްރެސް ކޯލިޝަންގެ ފަރާތުން މިވަގުތު ކުރިއަށް ގެންދާ 'ފެލާލައިފި' ޖަލްސާގައި ވާހަކަ ދައްކަވަމުންނެވެ.
ސައީދު ވިދާޅުވީ، މި ސަރުކާރުން ދިވެހިންގެ ތަކެތި ވިއްކަމުން ވިއްކަމުން ގޮސް، ދިވެހި ކަނޑުވެސް ވިއްކާލާފައިވާ ކަމަށެވެ.
"އަޅުގަނޑުމެން އިހަވަންދުއަށް ރައީސްޔާމީނުގެ އަރިހުގަ ދާދިފަހުން ދިޔައީމަ މަސްވެރިން މި ބުނަނީ، ފައްޔާޒު އިސްމާއީލް ވިދާޅުވެއްޖޭ، ކުރިއަށް އޮތް 15 ވަރަކަށް އަހަރުގެތެރޭ މަސްވެރިކަމުގެ ބޭނުމެއް ދެން މި ރާއްޖޭގަ ނޯންނާނޭ. އޭގެ ކުޑަ ދުވަސްކޮޅެއް ފަހުން ފިޝަރީޒް މިނިސްޓަރު ހުސެން މަޖިލީހުގަ މި ބުނަނީ، މަސް ބޭނޭނީ ވަކި ވަރަކަށޭ،" ސައީދު ވިދާޅުވިއެވެ.
ދިވެހިން ބާނާ މަސް ގަތުމުގެ ނަމުގައި ބޭރުގެ ބޯޓުފަހަރަށް ދިވެހި ކަނޑަށް ވަނުމުގެ ހުއްދަ ސަރުކާރުން ދީފައިވާ ކަމަށާއި ނަމަވެސް އެފަދައިން ރާއްޖޭގެ ކަނޑުގެ ސަރަހައްދަށް ވަނުމަށް ބޭރުގެ ބޯޓުތަކަށް އޮތީ ކޮން އުސޫލަކާ ހަމައެއްތޯ ސައީދު ވަނީ ސުވާލު ކުރައްވާފައެވެ.
އެފަދައިން ރާއްޖެ އަންނަ ބޯޓުފަހަރު ގެންގުޅެނީ ކޮންކަހަކަ އާލާތްތަކެއްތޯއާއި އެބޯޓުފަހަރުގައި ކިތައް ދާ އޮވޭތޯވެސް ސައީދު ވަނީ ސުވާލު އުފައްދާފައެވެ.
ދިވެހިންގެ ބަދުނަސީބަކީ އިންޑިިޔާ ކަނޑުގައި އޮތުންތޯ ސުވާލު ކުރައްވައި ވާހަކަ ދައްކަވަމުން ސައީދު ވިދާޅުވީ ރައީސް ސާލިހުވަނީ ދިވެހިންނާއި މުޅި ދުނިޔެއާއި ޖައްސާފައިކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
