މި ސަރުކާރުގެ ޚާރިޖީ ސިޔާސަތަކީ ކަސްބީ ސިޔާސަތެއް: ރައީސް ޔާމީން

މި ސަރުކާރުގެ ޚާރިޖީ ސިޔާސަތަށް ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު ވަރަށް ބޮޑަށް ފާޑުވިދާޅުވެއްޖެ އެވެ.

މި ސަރުކާރުގައި އޮތީ ވަރަށް ވަރުގަދަ ޚާރިޖީ ސިޔާސަތެއްކަމަށް ސަރުކާރުގެ ވަޒީރުންނާއި ސަރުކާރަށް ތާއީދުކުރައްވާ ބައެއް މަޖިލީސް މެންބަރުން ދައްކަވަމުންދާ ވާހަކަތަކަށް އިދިކޮޅުން ބޭއްވި "ފެލާލައިފި" ޖަލްސާގައި ރައީސް ޔާމީން ވަނީ ހޫނު ރައްދެއް ދެއްވާފައެވެ.

އެމަނިކުފާނު މި ސަރުކާރުގެ ޚާރިޖީ ސިޔާސަތު ސިފަކުރެއްވީ "ކަސްބީ ޚާރިޖީ ސިޔާސަތު" ގެ ގޮތުގައެވެ.

އެފަދައިން އެމަނިކުފާނު ސަރުކާރުގެ ޚާރިޖީ ސިޔާސަތަކަށް ފާޑުވިދާޅުވި ސަބަބަށްވެސް ރައީސް ޔާމީންގެ ވާހަކަފުޅުގައި ވަނީ އަލިއަޅުވާލައްވާފަ އެވެ.

އެންމެ ފުރަތަަމަ ކަމެއްގެ ގޮތުގައި ރައީސް ޔާމީން ފާހަގަކުރެއްވީ، ވަރުގަދަ ޚާރިޖީ ސިޔާސަތެއް އޮންކަމަށް ސަރުކާރުން ދައުވާކުރި ނަމަވެސް އަންދާޒާ ކުރި އަދަދާއި ގާތްކުރާ އަދަދަށްވެސް ސަރުކާރަށް ހިލޭ އެހީ ހޯދުފައި ނުވުމެވެ.

ސަރުކާރުން ބޮޑެތި ޚަރަދުތައްކޮށްގެން ދުނިޔޭގެ އެކި ގައުމުތަކަށް ހިލޭ އެހީ ހޯދުމަށް "ނާށިގަނޑު" ހިފައިގެން ގޮސްގެންވެސް މިހާތަަނަށް ހޯދުނީ ހިލޭ އެހީގެ ގޮތުގައި އަންދާޒާ ކުރި މިންވަރުގެ އެންމެ 11 އިންސައްތަކަމަށް ރައީސް ޔާމީން ވިދާޅުވިއެވެ.

"މިހާރު ހުސްވެގެން މިދާ އަހަރު ބަޖެޓުގައި ޖަހާފައި އޮތް ބޭރުގެ އެހީ 2.9 ބިލިއަން ރުފިޔާ ހޯދާނެކަމަށް. މިހާވަރެއްތޯ ލިބުނީ އެންމެ 320 މިލިއަން. އެހެންވީމަ ވާ މި އޮތީ ޗާލު ޚާރިޖީ ސިޔާސަތެއް ތާ؟ 290 މިލިއަން ހޯދަން ޖެހި ބަޔަކަށް މި އުޅެނީ އެންމެ 320 މިލިއަން، ގާތްގަނޑަކަށް 11 ޕަސެންޓު ހޯދިގެން މި އުޅެނީ. އެހެންވީމަ ޚާރިޖީ ސިޔާސަތަކީވެސް ހަމަ ކަސްބީ ސިޔާސަތެއް"

ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން

ދެން އެމަނިކުފާނު ވިދާޅުވީ މި ސަރުކާރުން އެކުލަވާލި ޚާރިޖީ ސިޔާސަތުގެ ސަބަބުން ދިވެހިރާއްޖެ މިހާރު އޮތީ އެއް ގައުމަކަށް ބަރޯސާވެފައި ކަމަށެވެ.

"އަޅުގަނޑުމެންނަށް ހުޅަނގަކަށް ދަތުރެއް ނުކުރެވޭ. ދެކުނަކަށް ދަތުރެއް ނުކުރެވޭ. އިރަކަށް ދަތުރެއް ނުކުރެވޭ. ހަމައެކަނި ޖެހެނީ އުތުރަށް ދަތުރުކުރަން. އެހެންވީމަ ޚާރިޖީ ސިޔާސަތު މިހާ ކޮރު މިހާ ކަސްބީ ސިޔާސަތަކަށް ވެގެން މި ދަނީ އަޅުގަނޑުމެންގެ ހުރިހާ ހައްގުތަކެއް ވިއްކާލާފައި އޮތީމަ.

ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން

ރައީސް ޔާމީންގެ ވާހަކަފުޅުގައި ވަނީ ފޮރިން މިނިސްޓަރު ޝާހިދަށްވެސް ގިނަ ފާޑުކިޔުންތަކެއް އަމާޒުކުރައްވާފަ އެވެ.

އެމަނިކުފާނު ވިދާލުވިގޮތުގައި ޝާހިދަކީ ޖީއެމްއާރު އެއަރޕޯޓު އިންޑިއާގެ އަތްދަށުގައި ބޭއްވުމަށް އިންޑިއާ ސިފައިން މި ގައުމުގައި ހަރަކާތްތެރި ނުވެގެން ކަންބޮޑުވުން ފާޅުކުރި ބޭފުޅެވެ. ޝާހިދު އެކަމުގެ ކަންބޮޑުވުން އިންޑއާގެ ތީވީ ޗެނަލެއްގައި ފާޅުކުރެއްވިކަމަށް އެމަނިކުފާނު ވިދާޅުވިއެވެ.

އެކަން ފާހަގަކުރައްވާ ރައީސް ޔާމީން ވިދާޅުވީ ޝާހިދަކީ ދިވެހިރާއްޖޭގެ ޚާރިޖީ ވަޒީރު ނޫންކަމަށެވެ. އެމަނިކުފާނު ތަމްސީލު ކުރައްވަނީ ބޭރުގެ ކޮންމެސް ގައުމެއްގެ ނައިބުކަމުގެ މަގާމުަކަމަށް އެމަނިކުފާނު ވިދާޅުވިއެވެ.

މި ސަރުކާރުގެ ޚާރިޖީ ސިޔާސަތުގެ ސަބަބުން ރައްޔިތުންނާއި ގައުމަށް އެއްވެސް ފައިދާއެއް ނުލިބޭއިރު، އަބްދޫފ ޝާހިދު މަގާމުން އިސްތިއުފާދެއްވަން ޖެހޭކަމަށް އެމަނިކުފާނު ވަނީ ވިދާޅުވެފައެވެ.