އޮޕަރޭޝަން ޑެވިލް ހަންޓް: ހަސީނާއަށް ތާއީދުކުރާ 1308 މީހުން ހައްޔަރުކޮށްފި

ބަންގްލަދޭޝްގެ ކުރީގެ ބޮޑުވަޒީރު ޝެއިހް ހަސީނާއަށް ތާއީދުކުރާ 1308 މީހުން ހައްޔަރުކޮށްފި އެވެ.

ބަންގްލަދޭޝްގެ އިންޓީރިއާ މިނިސްޓަރ ޖަހަންގިރް އާލަމް ޗައުދަރީއާއި ހަވާލާދީ އޭޕީ އިން ރިޕޯޓްކުރި ގޮތުގައި ބަންގްލަދޭޝްގެ ވަގުތީ ސަރުކާރުން މި މީހުން ހައްޔަރުކޮށްފައިވަނީ ހަސީނާ (77އ) ގެ ވެރިކަމުގައި ހަރަކާތްތެރިވަމުންދިޔަ ގޭންގްތަކުގެ މީހުން ހައްޔަރުކުރުމަށް ފަށާފައިވާ އޮޕަރޭޝަން "ޑެވިލް ހަންޓް" ގެ ދަށުންނެވެ. ބަންގްލަދޭޝް އިން މި އޮޕަރޭޝަން ފަށާފައިވަނީ ނިމިދިޔަ ހޮނިހިުރު

"ހުރިހާ ޝައިތާނުން އުފުރާލެވެންދެން މި އޮޕަރޭޝަން ނުހުއްޓާނެ"

ބަންގްލަދޭޝްގެ އިންޓީރިއާ މިނިސްޓަރ ޖަހަންގިރް އާލަމް ޗައުދަރީ

މި ސަލާމަތީ އޮޕަރޭޝަންތައް ހިންގަނީ މިމަހުގެ ކުރީކޮޅު ފުޅާދާއިރާއެއްގައި ހިނގި ހަމަނުޖެހުމަކަށްފަހުގައެވެ.

ހަސީނާއާ ދެކޮޅު މުޒާހަރާގެ ބައިވެރިންނާއި އެކަމަނާގެ އަވާމީ ލީގު ޕާޓީގެ މެމްބަރުންނާ ދެމެދު ހަމަނުޖެހުންތަކެއް މި މަސްތެރޭގައި ހިނގާފައިވެ އެވެ. ރިޕޯޓްތައް ބުނާގޮތުގައި މި ހަމަނުޖެހުން އިތުރުވެފައިވަނީ ދާދި ފަހުން ހަސީނާ ފޭސްބުކް މެދުވެރިކުރައްވައިގެން ދެއްވި ވީޑިއޯ ހިތާބަކަށްފަހުއެވެ.

ބަންގްލަދޭޝްގެ ވަގުތީ ސަރުކާރުން ވަނީ އެ ހަމަނުޖެހުންތަކުގެ ޒިންމާ، ހަސީނާގެ ބޮލުގައި އަޅުވާފައެވެ.  ބަންގްލަދޭޝްގެ ވަގުތީ ސަރުކާރުގެ ލީޑަރ މުޙަައްމަދު ޔޫނުސް ހުކުރު ދުވަހު ވަނީ މި ހަމަނުޖެހުންތައް ހުއްޓުމަށް އެދިވަޑައިގެންފައެވެ. އެމަނިކުފާނު އެހެން ވިދާޅުވުމުގެ ގަޑިއިރެއްފަހުން ހަސީނާއަށް ތާއީދުކުރާ ބައެއް ފަރާތްތަކުން ވަނީ ހަސީނާގެ ވެރިކަން ވައްޓާލުމުގެ އެންމެ އިސްކޮށް ހަރަކާތްތެރިވީ ދަރިވަރުންތަކަކަށް ހަމަލާދީފައެވެ. އެ ދަރިވަރުންނަށް ހަމަލާ އަމާޒުކޮށްފައިވަނީ ބަންގްލަދޭޝްގެ ވެރިރަށް ދާކާގެ ގާޒީޕޫރް އަވަށުގައެވެ.

20 އަހަރު ވަންދެން ބަންގްލަދޭޝްގައި ވެރިކަން ކުރެއްވި ހަސީނާގެ ވެރިކަން ނިމިފައިވަނީ ނިމިދިޔަ އަހަރުގެ އޮގަސްޓް މަސް ތެރޭގައި ބަންގްލަދޭޝް ޔުނިވާސިޓީތަކުގެ ދަރިވަރުންތަކެއް ކުރި މުޒާހަރާތަކަކަށްފަހުއެވެ. އެ މުޒާހަރާތަކުގައި ދަރިވަރުންނާއި ދެކޮޅަށް ހަސީނާގެ ސަރުކާރުން ލާއިންސާނީ ޖަރީމާތައް ހިންގުމުގެ ދައުވާ ހަސީނާގެ މައްޗަށް ވަގުތީ ސަރުކާރުން އުފުލާފައި ވެއެވެ. ވެރިކަމުން ފައިބައިވަޑައިގަތުމަށްފަހު ހަސީނާ މިހާރު ދިރިއުޅުއްވަނީ އިންޑިޔާގައެވެ.