ނައިބު ރައީސް ބަންގްލަދޭޝްގެ ބޮޑުވަޒީރާ ނިއުޔޯކުގައި ބައްދަލުކުރައްވައިފި
ލިޔުންތެރިޔާ
އަޙްމަދު އާހިލް ސަޢީދު
އދ. ގެ އާންމު މަޖިލީހުގެ 81 ވަނަ ސެޝަނާއި ގުޅިގެން ރައީސުލްޖުމްހޫރިއްޔާގެ ނައިބު ހުސައިން މުހައްމަދު ލަތީފް ނިއު ޔޯކަށް ކުރަށްވަމުންދާ ދަތުރުގައި ބަންގްލަދޭޝްގެ ބޮޑުވަޒީރު ތާރިގު ރަހްމާނާ ބައްދަލުކުރައްވައިފިއެވެ. ނައިބު ރައީސް ބަންގްލަދޭޝްގެ ބޮޑުވަޒީރާ ބައްދަލުކުރަށްވައިފާވަނީ އިއްޔެގެ ވަގުތެއްގައި ނިއު ޔޯކްގައެވެ.
މި ބައްދަލުކުރެއްވުމުގައި ނައިބު ރައީސް ވަނީ ދެ ޤައުމުގެ ރައްޔިތުންގެ މެދުގައި އޮންނަ ގުޅުން އިތުރަށް ބަދަހިވެގެންދާނެ ކަމަށް އުންމީދުކުރައްވާ ކަމަށް ވިދާޅުވެފައެވެ. އެކި ދާއިރާތަކުން ދެ ޤައުމުން ގުޅިގެން ހަރުދަނާ މަސައްކަތްތައް ކުރުމުގެ މުހިންމުކަމުގެ މައްޗަށް ވެސް އެ މަނިކުފާނު އަލިއަޅުއްވައިލެއްވިއެވެ. މީގެ އިތުރުން އދ. ގެ އާންމު މަޖިލީހުގެ 81 ވަނަ ސެޝަންގެ ރިޔާސަތާ ހަވާލުވެވަޑައިގެންނެވި ބަންގްލަދޭޝްގެ ޚާރިޖީ ވަޒީރު ޑރ. ހަލީލުއްރަހްމާނަށް ނައިބު ރައީސް ވަނީ މަރުހަބާ ވިދާޅުވެފައެވެ. ދިވެހި ސަރުކާރާއި ރައްޔިތުންގެ ނަމުގައި ބަންގްލަދޭޝްގެ ސަރުކާރާއި ރައްޔިތުންނަށް ހެޔޮ އެދުންތައް ވެސް އެ މަނިކުފާނު އަރިސްކުރެއްވިއެވެ.
ބޮޑުވަޒީރު ތާރިގު ރަހްމާނު ވަނީ ނައިބު ރައީސް އަރިސްކުރެއްވި ތަހުނިޔާއާއި ހެޔޮ އެދުންތަކަށް ޝުކުރު އަދާކުރައްވައިފައެވެ. އަދި ބައިނަލްއަޤުވާމީ އެކި މަންސަތަކުގައި ދެ ޤައުމު ގުޅިގެން މަސައްކަތްކުރުމުގެ މުހިންމުކަން ފާހަގަކުރައްވައި ދެ ފަރާތުގެ މަސްލަހަތުތައް ކުރިއެރުވުމަށްޓަކައި ރާއްޖެއާ ގާތުން މަސައްކަތްކުރެއްވުމަށް ބަންގްލަދޭޝް ތައްޔާރަށް ތިބި ކަމުގެ ޔަގީންކަން ބޮޑުވަޒީރު ދެއްވިއެވެ.
ރާއްޖެއާއި ބަންގްލަދޭޝަކީ ދެކުނު އޭޝިއާ ސަރަހައްދަށް ނިސްބަތްވާ ޒަމާންވީ ގާތް ގުޅުމެއް އޮންނަ ދެ ޤައުމެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
