ދެ އިންތިހާބު އެއްކޮށް ނުބޭއްވުމަކީ ގާނޫނުއަސާސީ ފަރުމާކުރި މުސައްނިފުންގެ ވިސްނުމެއް ނޫން.: ނާޒިމް

ރިޔާސީ އިންތިހާބާއި ރައްޔިތުން މަޖިލީހުގެ އިންތިހާބު އެކުއެކީ ނުބޭއްވުމަކީ ޤާނޫނު އަސާސީ ފަރުމާކުރި މުސައްނިފުންގެ ވިސްނުން އޭރުހުރި ގޮތް ނޫންކަމަށް ރައްޔިތުން މަޖިލީހުގެ ނައިބުރައީސް އަދި ދިއްގަރު ދާއިރާގެ ރައްޔިތުން މަޖިޅީސް ތަމްސީލް ކުރައްވާ މެމްބަރު އަހުމަދު ނާޒިމް ވިދާޅުވެއްޖެއެވެ.

ކޮންގްރެސް ޕާޓީން ބޭއްވި މައްޗަންގޯޅި ދެކުނު ދާއިރާގެ ޖަގަހަ ހުޅުވުމުގެ ޖަލްސާގައި މިރޭ ވާހަކަދައްކަވަމުން ޤާނޫނު އަސާސީ އެކުލަވާލި ދުވަސްވަރާއި އަދި ކުރީގެ ރައީސް މައުމޫން އެކުލަވާލި ހާއްސަ މަޖިލީހުގެ މެމްބަރެއްގެ ގޮތުގައި ހުންނެވި ނާޒިމް ވިދާޅުވީ އެދުވަސްވަރުވެސް ދެ އިންތިހާބު އެއްކޮށް ބޭއްވުމާ ގުޅޭ ގޮތުން ހާއްސަ މަޖިލީހަށް ހުށަހެޅުމެއް ހުށަހަޅާ، އެ ހުށަހެޅުމަށް ތާއީދު ލިބި، އެ ހުށަހެޅުމަށް ވޯޓަށް ވެސް އެހިކަމަށެވެ.

އެހެންކަމުން މިއީ މިއީ ކުރެވި، ނިމިފަ އޮތް ބަހުސެއް ކަމަށާއި، އެއީ އޭރު ރައްޔިތުން ގޮތް ނިންމި ކަމެއްކަމަށްވެސް ނާޒިމްގެ ވާހަކަފުޅުގައި ފާހަގަކުރެއްވިއެވެ.

ދެ އިންތިހާބުގެ ތާރީހު ފަރަގުވެގެން ފުށުއަރައިގެން ދިޔައީ ކީއްވެގެންތޯ ވެސް އަޅުގަނޑުމެން އެބަޖެހޭ ބަލާލަން. އާދެ، އާ ގާނޫނުއަސާސީ އިސްލާހުކޮށް ތަސްދީގު ކުރުމާ އެކު، މިނިވަން މުއައްސަސާތަކެއް އުފަންވި. އޭގެ ތެރޭގައި މިނިވަން މުސްތަގިއްލު އިލެކްޝަންސް ކޮމިޝަނެއް ހަދަންޖެހޭ. އިންތިހާބާ ބެހޭ އާ ގާނޫނުތަކެއް ހަދަންޖެހޭ. އެ ގާނޫނުގެ ދަށުން ހަދާ ގަވާއިދުގެ ދަށުން މި އިންތިހާބީ ދާއިރާތައް ކަނޑައަޅަންޖެހޭ. އެ ގާނޫނުތައް ފަރުމާކޮށް، އެ ގާނޫނުތައް ފާސްކޮށް ނިމުމަށް ނެގި ވަގުތުގެ ސަބަބުން ދެ އިންތިހާބު ބާއްވާ ތާރީހު ފަރަގުވެގެން ދިޔައީ. މަޖިލިސް އިންތިހާބު 2008 ވަނަ އަހަރު ބާއްވާފަ، 2009 ވަނަ އަހަރުގެ މޭ މަހާ ހިސާބަށް މަޖިލިސް އިންތިހާބު ލަސްވެގެން ދިޔައީ މިދެންނެވި ގާނޫނުތައް ހެދުން ލަސްވުމުގެ ސަބަބުން

ނާޒިމް ވިދާޅުވިއެވެ.

ނާޒިމް ވިދާޅުވީ ދެ އިންތިހާބާ ގުޅޭގޮތުން އެމްޑީޕީން ރައްޔިތުންނަށް އޮޅޭގޮތަށް ވާހަކަތައް ދައްކަމުންގެންދާކަމަށެވެ. އެގޮތުން ދެ އިންތިހާބު އެއްކޮށްލަން އުޅޭކަމަށް ބުނެ ދައްކަމުންދާ ވާހަކަތަކަކީ އޮޅުވާލުމުގެ ނިޔަތުގައި ދައްކަމުންގެންދާ ވާހަކަތަކެއްކަމަށް ނާޒިމް ވިދާޅުވިއެވެ.

ދެ އިންތިހާބު އެއްދުވަހަކާ ބޭއްވީމައި އެކަމުން ލިބޭނެ ފައިދާތަކެއް ހުރިކަން ފާހަގަކުރައްވަމުން ނާޒިމް ވިދާޅުވީ ރާއްޖޭގެ ތަފާސްހިސާބުތަކުން ފެންނަ ގޮތުގައި މަޖިލީސް އިންތިހާބުގައި ވޯޓުލާން ނިކުންނަ މީހުންނަށްވުރެ ރިޔާސީ އިންތިހާބުގައި ވޯޓުލާން ނިކުންނަ މީހުންގެ އަދަދު ގިނަކަމަށެވެ. އެހެންކަމުން އެއްދުވަހާ ދެ އިންތިހާބު ބޭއްވުމުން މަޖިލިސް އިންތިހާބަށް މަޖިލިސްގެ މެންބަރުން ހޮވުމަށްވެސް ގިނަ ރައްޔިތުންގެ ޝާމިލުވުން ލިބިގެންދާނޭކަމަށް ނާޒިމް ވިދާޅުވިއެވެ.

މީގެ އިތުރުން ދުނިޔޭގެ އެންމެ މުސްލިމުންގިނަ އިންޑޮނޭޝިއާގައިވެސް މި ދެ އިންތިހާބު ބާއްވަނީ އެއްދުވަހުން ކަމަށާއި، ލެޓިން އެމެރިކާގެ ބައެއް ގައުމުތައް ކަމަށްވާ މެކްސިކޯ، އުރުގުއޭ އަދި ސީޝެލްސްގައިވެސް މިކަން ކާމިޔާބުކަމާއެކު ބާއްވަމުންގެންދާކަން ނާޒިމް ފާހަގަކުރެއްވިއެވެ.

ނާޒިމް ވިދާޅުވީ މިކަމަކީ ހެޔޮ ހިތުން އިހްލާސްތެރިކަމާއެކު ރައްޔިތުންނަށްޓަކާ ކޮށްދޭކަމަކަށް ވާތީ ރައްޔިތުން އެކަން ބަލައިގަންނާނެ ކަމަށާއި، ފެންނަ ނުފެންނަ ވޯޓެއް ނަގަނީ ރައްޔިތުންގެ އަޑުއެހުމަށްޓަކައި ކަމަށެވެ. އެހެންކަމުން މިއީ ލަދުގަނެ ކަންބޮޑުވާންޖެހޭ ކަމެއް ނޫންކަމަށްވެސް ނާޒިމް ވަނީ މިރޭ ވިދާޅުވެފައެވެ.