ޔޫއޭއީގެ 3.5 ބިލިއަން ޑޮލަރުގެ ދަރަނި މި މަހު އަނބުރާ ދެއްކުމަށް ޕާކިސްތާނުން ނިންމައިފި

ޕާކިސްތާނުން ޔުނައިޓެޑް އަރަބް އެމިރޭޓްސް (ޔޫއޭއީ) އަށް ދައްކަންޖެހޭ 3.5 ބިލިއަން ޑޮލަރުގެ ދަރަނި މި މަސް ނިމުމުގެ ކުރިން އަނބުރާ ދެއްކުމަށް ނިންމައިފި ކަމަށް އެ ގައުމުގެ އިސް އޮފިޝަލަކު ހުކުރު ދުވަހު ހާމަކުރައްވައިފިއެވެ.

މި ނިންމުމަކީ ގައުމުގެ ބޭރު ފައިސާގެ ރިޒާވަށް ބޮޑު ނުފޫޒެއް ފޯރާނެ ކަމެއް ނަމަވެސް، "ގައުމީ ކަރާމާތް" ދެމެހެއްޓުމަށްޓަކައި ސަރުކާރުން އުފުލަން ބޭނުންވާ ބުރައެއް ކަމަށް އޮފިޝަލް ސިފަކުރެއްވިއެވެ.

މި ފައިސާ އަނބުރާ ދެއްކުމަށް ނިންމާފައިވަނީ އެ ފައިސާ ވަގުތުން އަނބުރާ ދެއްކުމަށް އަބޫދާބީން އެދުމާ ގުޅިގެންނެވެ. އޮފިޝަލް ވިދާޅުވި ގޮތުގައި، މާލީ މަންފާއަކަށްޓަކައި ގައުމުގެ ކަރާމާތަށް ދޫދެވޭކަށް ނެތެވެ. އެހެންކަމުން، ވީ އެންމެ އަވަހަކަށް އެ ފައިސާ ދައްކައި ހަލާސްކުރާނެ ކަމުގެ ޔަގީންކަން އޭނާ ވަނީ ދެއްވާފައެވެ.

ޔޫއޭއީން މި ފައިސާ ޕާކިސްތާނަށް ދީފައިވަނީ 2019 ވަނަ އަހަރު، އެ ގައުމުގެ އިގްތިސާދީ ހާލަތު ރަނގަޅުކޮށް ބޭރު ފައިސާގެ ތަފާތުތައް ކުޑަކުރުމަށް އެހީތެރިވުމުގެ ގޮންގުންނެވެ. އަބޫދާބީ ފަންޑް ފޯ ޑިވެލޮޕްމަންޓް މެދުވެރިކޮށް ދީފައިވާ މި ޑިޕޮސިޓްތައް މީގެ ކުރިން އެތައް ފަހަރަކު ވަނީ އައުކޮށްދީފައެވެ. ނަމަވެސް، ފަހަކަށް އައިސް މި މުއްދަތު އިތުރުކޮށްދެނީ ވަރަށް ކުރު މުއްދަތަކަށް ކަމަށްވުމުން، މި އިންތިޒާމު ކުރިއަށް ގެންދިއުމަށް ޔޫއޭއީން ބޭނުން ނުވާކަން ހާމަވާ ކަމަށް އޮފިޝަލުން ފާހަގަކުރެއެވެ.

ޕާކިސްތާނުގެ މަރުކަޒީ ބޭންކުގެ ރިޒާވްގައި މިހާރު ހުރީ ގާތްގަނޑަކަށް 16.3 ބިލިއަން ޑޮލަރެވެ. މީގެ ތެރެއިން 3.5 ބިލިއަން ޑޮލަރު ދެއްކުމުން، ރިޒާވްގެ 18 އިންސައްތަ އެއްފަހަރާ މަދުވެގެންދާނެއެވެ. މީގެ ސަބަބުން ޕާކިސްތާނުގެ ފައިސާގެ އަގު ދަށްވެ، އައިއެމްއެފް ޕްރޮގްރާމްގެ ދަށުން އެ ގައުމުން ފުރިހަމަކުރަންޖެހޭ ޝަރުތުތަކަށް އިތުރު ގޮންޖެހުންތަކެއް ކުރިމަތިވެދާނެ ކަމަށް އިގްތިސާދީ މާހިރުން އިންޒާރުދެއެވެ.

މި މައުޟޫޢުގައި ޕާކިސްތާނުގެ ފައިނޭންސް މިނިސްޓްރީން އެކްސްގައި ކުރި ޕޯސްޓެއްގައި ބުނެފައިވަނީ:

ޕާކިސްތާނުގެ ފައިނޭންސް މިނިސްޓްރީން ކުރި ޕޯސްޓް

ފައިނޭންސް މިނިސްޓްރީން އިތުރަށް ބުނެފައިވަނީ، ބޭރުގެ މާލީ އިލްތިޒާމްތައް ފުރިހަމަކުރުމުގައި ގައުމުން ދެމިއޮންނާނެ ކަމަށެވެ. އަދި ބޭރު ފައިސާގެ ރިޒާވް އެއްވަރެއްގައި ހިފެހެއްޓުމަށްޓަކައި ބޭރުގެ ފައިސާގެ މުއާމަލާތްތައް މިނިސްޓްރީން ވަރަށް ގާތުން މޮނިޓަރ ކުރަމުންދާ ކަމަށްވެސް އެ މިނިސްޓްރީން ވަނީ ހާމަކޮށްފައެވެ.