ހިލްޓަން މޯލްޑިވްސްގެ ތިން ރިސޯޓަކާ އެކު އެމްއެންޔޫއިން އެއްބަސްވުންތަކެއްގައި ސޮއިކޮށްފި

ދިވެހިރާއްޖޭގެ ޤައުމީ ޔުނިވާސިޓީ (އެމްއެންޔޫ) އިން ހިލްޓަން މޯލްޑިވްސްގެ ތިން ރިސޯޓަކާ އެކު ފަހުމުނާމާ (އެމްއޯޔޫ) ތަކެއްގައި ސޮއިކޮށްފިއެވެ.

މި އެއްބަސްވުންތަކުގައި ސޮއިކޮށްފައިވަނީ ކޮންރެޑް މޯލްޑިވްސް ރަންގެލި އައިލެންޑާއި ހިލްޓަން މޯލްޑިވްސް އަމިނގިރި ރިސޯޓް އެންޑް ސްޕާ އާއި ވެލްޑޯފް އެސްޓޯރިއާ މޯލްޑިވްސް އިތާފުށްޓާ އެކުގައެވެ.

މި ރަސްމިއްޔާތު ބާއްވާފައިވަނީ އާދީއްތަ ދުވަހު އެމްއެންޔޫގެ ސެންޓްރަލް ބިލްޑިންގުގައެވެ. އެމްއެންޔޫގެ ފަރާތުން އެ އެއްބަސްވުންތަކުގައި ސޮއިކުރެއްވީ ޑރ. ޢާއިޝަތު ޝެހެނާޒް އާދަމް އާއި ފެކަލްޓީ އޮފް ހޮސްޕިޓެލިޓީ އެންޑް ޓޫރިޒަމް ސްޓަޑީޒްގެ ޑީން ޒުލައިޚާ ރީޝާ ރަޝާދެވެ.

ކޮންރެޑް މޯލްޑިވްސް ރަންގެލި އައިލެންޑުގެ ފަރާތުން ސޮއިކުރީ އެ ރިސޯޓުގެ ޖެނެރަލް މެނޭޖަރު ނިކް ފްލީން އެވެ. ހިލްޓަން އަމިނގިރީގެ ފަރާތުން ސޮއިކުރީ ޖެނެރަލް މެނޭޖަރު މާކް އެލެޓްރެވެ. ވެލްޑޯފް އެސްޓޯރިއާ އިތާފުށީގެ ފަރާތުން ސޮއިކުރީ މެނޭޖިން ޑައިރެކްޓަރު ޓީޖޭ ޖޫލަކެވެ.

އެމްއެންޔޫއިން ބުނީ މި ފަހުމުނާމާތަކުގެ ސަބަބުން ދަރިވަރުންނަށް އިންޓާންޝިޕާއި ޢަމަލީ ތަޖުރިބާ އާއި ފަންނީ ތަރައްޤީ އާއި ބައިނަލްއަޤުވާމީ ފެންވަރުގެ ފަތުރުވެރިކަމުގެ ދާއިރާގެ ތަޖުރިބާ ލިބުމުގެ ފުރުޞަތުތައް ހުޅުވިގެންދާނެ ކަމަށެވެ. މީގެ އިތުރުން ޔުނިވާސިޓީ އާއި ސިނާޢީ ދާއިރާއާ ދެމެދު އޮތް ގުޅުން ވަރުގަދަވެ ދަރިވަރުން ފަތުރުވެރިކަމުގެ ދާއިރާއަށް ތައްޔާރުކުރުމަށް ބާރު ލިބޭނެ ކަމަށް ވެސް އެ ޔުނިވާސިޓީން ބުނެފައިވެއެވެ.

ޝުކުރު ދެންނެވުމުގެ ވާހަކަފުޅުގައި ޒުލައިޚާ ރީޝާ ރަޝާދު ވިދާޅުވީ މި ސޮއިކުރުމަކީ އައު ގުޅުމެއް ފެށުމެއް ނޫން ކަމަށާއި ކުރިންސުރެ ދެމެހެއްޓެމުން އައި ގުޅުން ރަސްމީ ސިފައެއްގައި ބަލައިގަނެ އިތުރަށް ހަރުދަނާ ކުރުމެއް ކަމަށެވެ. އޭނާ ވަނީ ތިން ރިސޯޓުގެ ލީޑާޝިޕާއި ހިއުމަން ރިސޯސަސް ޓީމުތަކާއި އެމްއެންޔޫގެ މެނޭޖްމަންޓާއި ލީގަލް އޮފީހާއި ޔުނިވާސިޓީ ސެކެޓޭރިއެޓަށް ވެސް ޝުކުރު އަދާކުރައްވައިފައެވެ.

މި އެއްބަސްވުންތަކަކީ ސިނާޢީ ދާއިރާ އާއި ތަޢުލީމީ ދާއިރާގެ ގުޅުން ވަރުގަދަ ކުރުމަށް އެމްއެންޔޫއިން ކުރަމުންދާ މަސައްކަތުގެ މުހިންމު ފިޔަވަޅެއް ކަމަށް އެ ޔުނިވާސިޓީން ފާހަގަކޮށްފައިވެއެވެ.