ބައިނަލްއަގުވާމީ ފަރާތްތަކުން އެމްޑީޕީއަށް ކުރި އިތުބާރު ގެއްލިއްޖެ: އިދިކޮޅު

ދިވެހިރާއްޖޭގައި ޑިމޮކްރެޓިކް ވެރިކަމަށް ކުރާނެކަމަށް ބުނެ ބައިނަލްއަގުވާމީ މުޖުތަމައުގައި އެމްޑީޕީއިން ހެދީ ދޮގުކަން ފަޅާއަރާ، އެ ފަރާތްތަކުން އެމްޑީޕީއަށް ކުރި އިތުބާރު ގެއްލިފައިވާކަމަށް އިދިކޮޅުން ބުނެފިއެވެ.

ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމުގެ މައްޗަށް ކްރިމިނަލް ކޯޓުން ކޮށްފައިވަނީ ސިޔާސީ ހުކުމެއްކަމަށާއި، އެމަނިކުފާނަށް ސަރުކާރުން އަނިޔާކުރަމުންދަނީ ސަރުކާރުގެ ވާދަވެރި ލީޑަރަށްވުމުންކަން ހާމަކޮށް އިދިކޮޅުން ވަނީ މިއަދު ދިވެހިރާއްޖޭގައި ހުންނަ ޔޫކޭގެ ހައިކޮމިޝަންއަށް ވަޑައިގެން އެތަނުގެ އޮފިޝަލުންނާއި ބައްދަލުކުރައްވާފައެވެ.

އެ ބައްދަލުވުމަށްފަހު ނޫސްވެރިންނަށް ދެއްވި ބަސްދީގަތުމެއްގައި އިދިކޮޅު ކޯލިޝަންގައި ހިމެނޭ ޕީއެންސީގެ ނައިބުރައީސް އަދި މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ވިދާޅުވީ ރައީސް ޔާމީނުގެ މައްޗަށް ކޮށްފައިވަނީ ނުހައްގު ހުކުމެއްކަން ބޭރުގެ ފަރާތްތަކަށްވެސް އެނގޭކަމަށެވެ.

އޭގެ އިތުރުން ދިވެހިރާއްޖޭގައި މިހާރު ހިނގަމުންދާ ޑިމޮކްރަސީއާއި ބީރައްޓެހިކަންކަން ބައިނަލްއަގުވާމީ އެކި އެކި ޖަމުއިއްޔާ ޖަމާއަތްތަކުން ގާތުން ބަލަމުންދާކަމަށާއި، މީގެ ކުރިން އެމްޑީޕީއިން އެމީހުންގެ ގާތުގައި ދެއްކި ވާހަކަތަކާއި، ބަހާއި އަމަލާއި ދިމާ ނުވާކަމަށް ސައީދު ވިދާޅުވި އެވެ.

އަދި އެ ސަބަބައްޓަކައި މިހާރު އެފަރާތްތަކުން އެމްޑީޕީއަށް އިތުބާރު ނުކުރާކަމަށް ސައީދު ވިދާޅުވި އެވެ.

"އެއްގޮތަކަށްވެސް ހީކޮށްގެން ނުވާނެ ދިވެހިރާއްޖޭގައި މި ހިނގާ ކަންތައްތައް ބޭރު ދުނިޔޭގެ ސަމާލުކަމަށް ނުގެނެވޭނެވަރުގެ ބަޔެކޭ ދެން ތިބީ އެމްޑީޕީ ފިޔަވާ.. އެމްޑީޕީއާއި ދޭތެރޭ ނެތް ބޭރުގެ ޓްރަސްޓެއް މިއަދަކު.. އެވާހަކަ ރައީސް ނަޝީދުވެސް އެ ދައްކަނީ. ޑިމޮކްރެޓިކް ތާޖެއް އަޅައިގެން ވަރަށް މަގުބޫލުބައެއްކަމަށް ބޭރު ދުނިޔޭގައި ދައްކަމުން އައި ބައެއް އެމްޑީޕީއަކީ.. އެހެން ނަމަވެސް ހުރިހާ ބާރެއް ލިބުނީމަ ކަންކޮށްލި ގޮތް މިފަހަރު މުޅި ދުނިޔެއަށް ފަޟީހަތްވެގެން އެ ދިޔައީ"

ޕީއެންސީގެ ނައިބުރައީސް މުހައްމަދު ސައީދު

ސައީދު އިތުރަށް ވިދާޅުވީ ރައީސް ޔާމީނަށް ކުރިއަށް އޮތް އިންތިޚާބުގައި ވާދަކުރުމުގެ ފުރުސަތު ހޯދުމަށް އިދިކޮޅުން ކުރަމުންދާ މަސައްކަތް ކާމިޔާބުކަމަށެވެ.

އެމްޑީޕީއިން ކުރަމުންދާ ޚުދުމުހުތާރު ވެރިކަން ދުނިޔެއަށް ފަޟީހަތްވެ ބޭޒާރުވުމަކީ ދިވެހިންނަށް ލިބުނު ކުރިއެރުމެއްކަމަށް ސައީދުގެ ވާހަކައިގައި ސިފަކުރެއްވި އެވެ.