އިޒްރާއިލް ސިފައިން ފަލަސްޠީނުގެ ފުލުހަކު ޝަހީދުކޮށްލައިފި

އިޒްރާއިލް ސިފައިން ހުޅަނގު އައްސޭރީގެ ދެކުނުގައި ފަލަސްޠީނުގެ ޒުވާން ފުލުހެއްގެ ގަޔަށް ބަޑިޖަހައި ޝަހީދުކޮށްލައިފިއެވެ.

އުމުރުން 22 އަހަރުގެ މުހައްމަދު ޖަވާބިރް ޝަހީދު ކޮށްލައިފައިވަނީ އަރުއްބާ ރެފިޔުޖީ ކޭމްޕްގައި ހިންގި ލޭއޮހޮރުވުންތަކުގައެވެ. އިޒްރާއިލް ސިފައިން ބަޑިޖަހައި ފައިވަނީ މުހައްމަދުގެ ބޮލަށެވެ. އޭނާ މަރުވެފައިވަނީ ވަޒަން އަރައިގެން ފަރުވާ ހޯދަމުން ދަނިކޮށް ހުކުރު ދުވަހުގެ ފަތިހު ހޮސްޕިޓަލްގައެވެ.

އޭނާ އެޑްމިޓްކޮށްފައި އޮތީ އަލް އަހްލީ ހޮސްޕިޓަލުގެ އިންޓެންސިވް ކެއަރ ޔުނިޓްގައެވެ.

މުޙައްމަދު އަކީ ފަލަސްޠީނުގެ ޕޮލިސް ފޯސްގައި މަސައްކަތް ކުރާ ޒުވާނެކެވެ. އޭނާ މަސައްކަތް ކުރަނި ބެތެލްހަމް ސިޓީގައެވެ. މުޙަމަދް އަކީ ފަލަސްޠީނުގެ ޓެކްނިކަލް ޔުނިވާސިޓީ އިން މީޑިއާ ޓެކްނޮލޮޖީގެ ދާއިރާއިން ތައުލީމު ހާސިލް ކޮށްފައިވާ ޒުވާނެއްކަމަށް އަލްޖަޒީރާގައި ބުނެފައިވެއެވެ.

މިއަހަރުގެ މިހާތަނަށް އިޒްރާއިލްގެ ސިފައިން ފަލަސްޠީނުގެ 65 މީހަކު ޝަހީދުކޮށްލައި ފައިވެއެވެ. އޭގެ ތެރޭގައި 13 ކުޑަކުދިންވެސް ހިމެނެއެވެ.

"މިއަހަރުގެ ފެށުމަކީ 2000 ވަނަ އަހަރުގެ ފަހުން ހުޅަނގު އައްސޭރި ދުށް އެންމެ ލޭ އޮހޮރުވުން ގިނަ ދަވަސްވަރު، މި ފާއިތުވި 22 އަހަރުގެ ތެރޭގައި އަހަރުގެ ފުރަތަމަ ދެމަހުން މިހާ ގިނަ ޝަހީދުންގެ ޢަދަދު ރިކޯޑު ކުރެވިފައެއް ނުވޭ" ފަލަސްޠީނުގެ ހެލްތް މިނިސްޓްރީ އިން ވިދާޅުވެފައިވެއެވެ.

އިޒްރާއިލް ސިފައިން ނާބުލުސްގައި ހިންގި މިލިޓަރީ ރެއިޑްގައި ފަލަސްޠީނުގެ 11 މީހަކު ވަނީ ޝަހީދުކޮށްލައިފައެވެ. އަދި މިކަމުގެ ސަބަބުން ފަލަސްޠީނުގެ ޒުވާނުން ވަނީ ހަތިޔާރު ނެތަސް އިޒްރާއިލް ސިފައިންނާއި ކުރިމަތިލާން ފަށައިފައެވެ. މުހައްމަދު ޝަހީދުވެފައި މިވަނީ މިފަދަ ކުރިމަތި ލުމެއްގައެވެ. އިޒްރާއިލް ސިފައިން ނާބުލުސް ގައި ހިންގ ރެއިޑްގައި 85 މީހަކަށް ސީދާ އަމަޒުކޮށް ބަޑިން ހަމަލާ ދީފައި ވެއެވެ. އަދި 100 އަށް ވުރެ ގިނަ މީހުން އެކި ވަރުގެ ޒަހަމްތަކަށް ފަރުވާ ހޯދައިފައިވެއެވެ.