ކެތްތެރިވެ ރައީސް ޔާމީންގެ ފަހަތްޕުޅުގައި ސާބިތުކަމާއެކު ތިބޭނަން: ޣައްސާނު

އެމްޑީއޭއިން ރައީސުލްޖުމްހޫރިއްޔާ އިބްރާޙިމް މުހައްމަދު ޞާލިހާއެކު ކޯލިޝަން ހަދަން ނިންމިޔަސް ކެތްތެރިކަން އިސްކޮށް ރައީސް އަބްދުالله ޔާމީން އަބްދުލްގައްޔޫމު އަނބުރާ ވެރިކަމަށް ގެނައުމުގެ މަސައްކަތުގައި ސާބިތުވެ ތިއްބަވާނެކަމަށް ޕީޕީއެމްގެ ނައިބު ރައީސް ޣާއްސާސް މައުމޫނު ވިދާޅުވެއްޖެ އެވެ.

ޣައްސާނު މިފަދައިން ވިދާޅުވެފައި ވަނީ އެމްޑީއޭއިން އެމްޑީޕީއާއި ކޯލިޝަން ހަދަން ނިންމުމާއި ގުޅިގެން ކުރެއްވި ޓްވީޓެއްގަ އެވެ.

އެގޮތުން ޣައްސާނު ވިދާޅުވީ މުޅި ޕީޕީއެމް އޮތީ އެޕާޓީގެ ލީޑަރު ރައީސް އަބްދުالله ޔާމީން އަބްދުލްގައްޔޫމުގެ ލަފާފުޅާއި އިރުޝާދުގެ މަތިން ރިޔާސީ އިންތިޚާބު އެމަނިކުފާނަށް ކާމިޔާބުކޮށްދިމުގެ އަޒުމުގައި ކަމަށެވެ. އަދި އެ މަސައްކަތުގައި ސާބިތުކަމާއެކު ޕީޕީއެމް އޮންނާނެކަމަށް ޣައްސާނު ވިދާޅުވި އެވެ.

"ރައީސް ޔާމީންގެ ލަފާފުޅާއެކު މުޅި ޕީޕީއެމް ކެތްތެރިކަމާ އިޚްލާސްތެރިކަމާއެކު އެއް އަޒުމެއްގައި ގަދަ ހިތްވަރުގައި ސާބިތުގެ މަސައްކަތުގައި އެބަތިބީން. إِنْ شَاءَ ٱللَّٰهُ އިންތިޚާބު ކާމިޔާބު ކުރައްވާނީ ރައީސް ޔާމީން"

ޕީޕީއެމްގެ ނައިބުރައީސް ޣައްސާނު މައުމޫނު

ޣައްސާނު ވިދާޅުވީ ރައީސް ޔާމީން ކުރިއަށް އޮތް ރިޔާސީ އިންތިޚާބު ކާމިޔާބު ކުރައްވާނެކަމުގެ ޔަގީންކަން އޮތް ކަމަށެވެ.

އެމްޑީއޭއިން ރައީސް ޞާލިހާއެކު ކޯލިޝަން ހަދަން ނިންމާފައިވަނީ އިއްޔެ އެ ޕާޓީގެ ކައުންސިލް ބައްދަލުވުމަށްފަހުގަ އެވެ. އެފަދައިން އެ ޕާޓީން ނިންމާފައިވަނީ ކައުންސިލު ބައްދަލުވުމުގައި ބައިވެރިވި މެމްބަރުންގެ ސާފު އަގުލަބިއްޔަތުންނެވެ.

އެހެން ނަމަވެސް ކައުންސިލުގެ ނިންމުމާއި ދޭތެރޭ ހިތްހަމަ ނުޖެހިގެން ސޯޝަލް މީޑިއާގައި ޕާޓީގެ ބައެއް އާންމު މެމްބަރުން ދަނީ ނުރުހުން ފާޅުކުރަމުންނެވެ. އަދި ޕާޓީގެ އާންމު މެމްބަރުންގެ ޝަކުވާތަކާއި ގުޅިގެން އެ ފަހުން އެމްޑީއޭއިން ވަނީ އާންމު މެމްބަރުން މި ދަނޑިވަޅުގައި ރުޅި އިސް ނުކުރުމަށް އިލްތިމާސް ކޮށްފައެވެ.