އާޒިމްގެ އިންޒާރެއް: ނަޝީދު ވަކިކުރަން އުޅެފި ނަމަ, ރައީސްގެ އިތުބާރު ނެތްކަމުގެ ވޯޓު ނަގާނަން!
މަޖިލީހުގެ ރައީސްކަމުން ޕާޓީގެ ރައީސް މުހައްމަދު ނަޝީދު ވަކިކުރަން މަސައްކަތް ކުރާނަމަ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ އިތުބާރު ނެތްކަމުގެ ވޯޓުނަގަން މަޖިލީހަށް ހުށައަޅުއްވާނެކަމަށް މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް އިންޒާރު ދެއްވައިފި އެވެ.
އެމްޑީޕީއެ އެތެރޭގެ އިންތިޚާބުގައި އުފެދުނު ކޯޅުންތަކުގައި ޕާޓީ ބައިވެ ދެ ފެކްޝަނަށް ބެހިފައިވާއިރު، ދެ ބައިމީހުންގެ ދެމެދުގައި އޮތް ނުތަނަވަސްކަން ދުވަހެއް ދުވަހަށް ދަނީ އިތުރުވަމުން ނެވެ.
ދެ ފެކްޝަނުންގެ މެމްބަރުންގެ މެދުގައި ހޫނު ބަހުގެ ހަމަލާތަކެއް ބަދަލުކުރެވެމުންދާއިރު، އެންމެ ގަދައަށް ދެކެވޭ އެއް ވާހަކައަކީ މަޖިލީސް ރައީސްގެ މަގާމުން ނަޝީދު ވަކިކުރާ ވާހަކައެކެވެ.
އެގޮތުން ނަޝީދު ވަކިކުރުމަށް ބޭނުންވާ ގާނޫނީ އަދަދަށް މެމްބަރުންގެ ތާއީދު ލިބިފައިވާކަމަށް އެމްޑީޕީގައި ތިއްބަވާ ސަރުކާރަށް ތާއީދުކުރައްވާ މެމްބަރުން މީގެ ކުރިން ވަނީ ވިދާޅުވެފައެވެ. އަނެއްކާވެސް އެ ބަހުސް ހޫނުވެފައިވާ މި ފަނޑިވަޅުގައި އަލީ އާޒިމް ކުރެއްވި ޓްވީޓެއްގައި ވަނީ އެ މަސައްކަތް ހުއްޓާ ނުލާނަމަ ރައީސް ޞާލިހުގެ އިތުބާރު ނެތްކަމުގެ ވޯޓުނަގަން މަޖިލީހަށް ހުށައަޅާނެކަމަށް ވިދާޅުވެ އިންޒާރު ދެއްވާފަ އެވެ.
އާޒިމްގެ ޓްވީޓުގައި ވަނީ މަޖިލީސް ރައީސްކަމުން ނަޝީދު ވަކިކުރުމަށް މަޖިލީހުގައި އެމްޑީޕީގައި ތިބި ސަރުކާރަށް ތާއީދުކުރާ މެމްބަރުން މަސައްކަތް ކުރާކަަށް އިޝާރާތް ކުރައްވާފަ އެވެ. އަދި އެކަން ހުއްޓާނުލައިފި ނަމަ ރައީސް ޞާލިހުގެ މައްސަލަވެސް މަޖިލީހަށް ވައްދާނެކަމަށް ވިދާޅުވެފަ އެވެ.
"މަޖިލީހުގެ ރައީސް ވަކިކުރަން ވޯޓު ހަމަކުރަން މަސައްކަތް ފަށައިފިނަމަ ރައީސް ޞާލިހުގެ އިތުބާރު ނެތްކަމުގެ ވޯޓު ހަމަކުރުމުގެ މަސައްކަތް އަޅުގަނޑުމެން ފަށާނަން"
މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް
މިދިޔަ ހަފްތާގައި އޮތް ރައްޔިތުންގެ މަޖިލީހުގެ ޖަލްސާތަކުގައި، ރައީސް ޞާލިހަށް ތާއީދުކުރައްވާ ބައެއް މެމްބަރުން ވަނީ ނަޝީދު މިހާރު މަޖިލީހުގައި ކަންކަން ކުރައްވާގޮތާއި ގުޅިގެން ވަރަށް ބޮޑެތި ނުރުހުން ފާޅުކޮށްފަ އެވެ.
އެގޮތުން ރައްޔިތުންގެ މަޖިލީހުގެ މީދޫ ދާއިރާ މެމްބަރު ރޮޒައިނާ އާދަމް އާއި އައްޑޫ މަރަދޫ ދާއިރާގެ މެމްބަރު ޝަރީފު ވަނީ ނަޝީދު މިހާރު މަސައްކަތް ކުރައްވަނީ ރިޔާސަތުގައި އިންނަވާ ސަރުކާރަށް ޖެއްސުން ކުރެއްވުމަށްކަމަށް ވިދާޅުވެފައެވެ.
އިދިކޮޅުން ހުށައަޅާ ކުއްލި މައްސަލަތައް އެޖެންޑާކުރަނީވެސް މެމްބަރުން ލައްވާ ސަރުކާރަށް އެއްޗެހި ކިޔުމަށްކަމަށް ސަރުކާރަށް ތާއީދު ކުރައްވާ ބައެއް މެމްބަރުން ވިދާޅުވެފައި ވެއެވެ.
އެމްޑީޕީގެ ދެ ފެކްޝަނުގެ ދެމުގައި އޮތް ނުތަނަވަސްކަން ރައްޔިތުންގެ މަޖިލީހުގެ ތަޅުމުން ވަރަށް ސާފުކޮށް ފެނިގެންދެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
