ގޮތް ނިންމާ ޤަރާރުގެ ބަހުސް ފަށައިގެން ކުރިއަށް!

ކުރިއަށް އޮތް ރިޔާސީ އިންތިޚާބުގައި ޖުމްހޫރީ ޕާޓީން ވާދަކުރާނެ ގޮތަކާއި ގުޅޭގޮތުން ގޮތް ނިންމުމަށް އެދި ހުށައެޅި ޤަރާރަށް ބަހުސްކުރަން ފަށައިފި އެވެ.

ޖުމްހޫރީ ޕާޓީ އިން ރިޔާސީ އިންތިހާބުގައި ވާދަކުރުން ނުވަތަ އެ ޕާޓީ އިސްވެ އޮވެ އެހެން ޕާޓީތަކާއެކު ކޯލިޝަން ހަދައިގެން ނިކުތުމާމެދު ގޮތް ނިންމުމަށް މިހާރު ކުރިއަށްދާ އެ ޕާޓީގެ ގައުމީ ކޮންފަރެންސްއަށް ޤަރާރު ހުށައެޅުއްވީ ތިނަދޫ އުތުރު ދާއިރާގެ ކުރީގެ މެންބަރު އަބްދުﷲ އަހްމަދެވެ.

އެ ޤަރާރަށް ބަހުސްކުރުން މިހާރު ފޯރިއާއެކު ކުރިއަށްދާއިރު މިހާތަނަށް ބަހުސްކުރެއްވި ގިނަ ބޭފުޅުންގެ ވިސްނުންފުޅު ހުރީ ޖޭޕީން ރިޔާސީ ރޭހަށް ނިކުމެ، ބައެއްގެ ފަހަތަށް ނާރާ އިންތިޚާބުގައި ވާދަކުރުމަށް ބޭނުންވާކަމަށެވެ.

އެގޮތުން ރައްޔިތުންގެ މަޖިލީހުގެ ފުވައްމުލަކު އުތުރު ދާއިރާގެ މެމްބަރު އަލީ ޝާހު ވިދާޅުވީ ޖުމްހޫރީ ޕާޓީން ރައްޔިތުންނަށް ޚިދުމަތްކޮށްދިނުމަށް އިސްވެ އޮވެ ނިކުންނަން ޖެހޭ ކަމަށެވެ. އިސްވެ އޮވެ ސަރުކާރު ހިންގާނެ ގާބިލުކަން ޖުމްހޫރީ ޕާޓީގެ ކިބައިގައި އޮތްކަމަށް ޝާހު ވިދާޅުވިއެވެ.

ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސެއިންވެސް ވަނީ ރިޔާސީ އިންތިޚާބުގައި ވާދަކުރަން ނިކުތުމަށް ގޮވާލައްވާފަ އެވެ. ކޮންމެ ރިޔާސީ އިންތިޚާބެއްގައި ބައެއްގެ ފަހަތަށް އެރުމަކީ އެންމެ ރަނގަޅު ގޮތް ނޫން ކަމަށާއި، އިންތިޚާބުގައި ވާދަކޮށް މޮޅުވުމުގެ ރޫހު ޖޭޕީގައި އުފެދިފައިވާކަމަށް އޭނާ ވިދާޅުވިއެވެ.

ރިޔާސީ އިންތިޚާބުގެ ރޭހަށް ނިކުތުމަށް ބައެއް މެމްބަރުން ގޮވާލައްވާފައިވާއިރު، މިހާރު މިއޮތް ކޯލިޝަންގައި ތިބެގެން ގައުމަށް ޚިދުމަތް ކުރުމަކީ އެންމެ ރަނގަޅު ގޮތްކަމަށް ޖުމްހޫރީ ޕާޓީގެ ކުރީގެ ސެކެޓްރީ ޖެނެރަލް އަހުމަދު ސަމީރު ވަނީ ވިދާޅުވެފަ އެވެ.

ސަމީރު ވިދާޅުވީ މިހާރު ވެރިކަން ކުރަމުންދާ ރައީސް އިބްރާހިމް މުހައްމަދު ޞާލިހުގެ ސަރުކާރަކީ ރައްޔިތުންގެ ލާބަޔާއި މަންފާއަށް މަސައްކަތް ކުރާ ސަރުކާރެއް ކަމަށެވެ. ސަރުކާރު ހިންގުމަށް ޖޭޕީގެ ހިއްސާ އޮތް އިރު، ކުރިއަށް އޮތް ތަނުގައި އެކަން ސަރުކާރަށް ވާގިވެރިވުމަކީ ގައުމާއި ރައްޔިތުންނަށް އެންމެ ފައިދާ ހުރި ގޮތްކަމަށް ދެކިވަޑައިގަންނަވާ ކަމަށެވެ.

ރިޔާސީ އިންތިޚާބަށް ގޮތް ނިންމުމަށް ކުރާ ބަހުސް ފޯރިއާއެކު ކުރިއަށް ދާއިރު، މިރޭ އެ ގަރާރަށް ބަހުސްކުރެއްވުމަށް އެދިވަޑައިގަންނަވާ ހުރިހާ ބޭފުޅުންނަށްވެސް އެ ފުރުސަތު ދޭނެކަމަށް ޖޭޕީން ވަނީ ބުނެފައެވެ.

ޤަރާރަށް ކުރެވޭ ބަހުސަށްފަހު، މިރޭގެ ކުރިއަށް އޮތް ރިޔާސީ އިންތިޚާބަށް ޖޭޕީން ނިކުތުމާމެދު ގޮތް ނިންމާނެއެވެ. ޖުމްހޫރީ ޕާޓީގެ މި ނިންމުމަކީ ރައްޔިތުން ވަރަށް ގާތުން ބަލާ އިންތިޒާރު ކުރާ ނިންމުމަކަށް ވަނީ ވެފައެވެ. އަދި ޖޭޕީން ނިންމާ ގޮތެއްގެ ސަބަބުން ސިޔާސީ މަޝްރަހަށް ބޮޑެތި ބަދަލުތަކެއް އަންނާނެކަމަށް މަޝްރަހު ދިރާސާ ކުރައްވާ ބޭފުޅުން ދަނީ ވިދާޅުވަމުން ނެވެ.