"ދަ ޑިމޮކްރެޓްސް" އުފެއްދުމަށް ޖަލްސާ ބޭއްވުމުގެ ހުއްދަ ދޭން ނިންމައިފި
"ދަ ޑިމޮކްރެޓްސް" ގެ ނަމުގައި ސިޔާސީ ޕާޓީއެއް އުފެއްދުމަށް ޖަލްސާ ބޭއްވުމުގެ ހުއްދަ ދިނުމަށް ނިންމައިފިކަމަށް އިލެކްޝަންސް ކޮމިޝަންގެ ނައިބު ރައީސް އިސްމާއިލް ޙަބީބް ވިދާޅުވެއްޖެއެވެ.
ޙަބީބް މިހެން ވިދާޅުވީ އޭނާ ކުރެއްވެވި ޓްވީޓެއްގައެވެ.
"ދަ ޑިމޮކްރެޓްސް ގެ ނަމުގައި ސިޔާސީ ޕާޓީއެއް އުފެއްދުމަށް، ޖަލްސާ ބޭއްވުމުގެ ހުއްދަ، ޖުލައި 2 ވާ އާދީއްތަ ދުވަހު ދިނުމަށް، އިލެކްޝަންސް ކޮމިޝަނުން ނިންމާފައިވާނޭ ކަމުގައި، ޕާޓީ އުފެއްދުމުގެ ހުއްދަ އަށް އެދިވަޑައިގަތް، ހ ސީވީޑް އަލްއުސްތާޛް ހެންވޭރު ޙަސަން ލަތީފަށް މިހާރުވާނީ ދަންނަވާފައި" ޙަބީބު ވިދާޅުވެފައިވެއެވެ.
ޕާޓީ ރަޖިސްޓްރީކުރަން ބޭނުންވާ އަދަދަށް މެމްބަރުންގެ ފޯމު ހަމަކޮށް، ޑިމޮކްރެޓްސްއިން އީސީއަށް ހުށަހެޅީ މި މަހުގެ ކުރީކޮޅުގައެވެ. ނަމަވެސް އަދިވެސް ޕާޓީ ރަޖިސްޓްރީ ކޮށްދީފައެއް ނުވެއެވެ.
ޕާޓީ ރަޖިސްޓަރ ކޮށްދީފައި ނުވާތީ މިމަހުގެ 18 ވަނަ ދުވަހު އެޕާޓީގެ މެމްބަރުން ވަނީ އީސީއަށް ގޮސް ރަޖިސްޓްރީ ނުލިބެނިސް ނުނިކުންނާނެ ކަމަށްބުނެ އިހްތިޖާޖެއްވެސް ކޮށްފައެވެ.
އެހެންނަމަވެސް އެކަމާ ގުޅިގެން އީސީގެ ރައީސް ފުއާދު ތައުފީގު ޑިމޮކްރެޓްސްގެ މެމްބަރުންނަށް މައުލޫމާތު ދެއްވަމުން ވިދާޅުވީ، އޭރު ތިބީ އީސީގެ ހަތަރު މެމްބަރުން ކަމަށާއި ރަޖިސްޓްރީ ކޮށްދޭން އޭރު ވޯޓު ދިނީ ދެ މެމްބަރުން ކަމަށާއި އަނެއް ދެ މެމްބަރުން ވޯޓު ދިނީ ރަޖިސްޓްރީ ކޮށް ނުދިނުމަށް ކަމަށެވެ.
ރަޖިސްޓްރީ ކޮށް ނުދިނުމަށް ވޯޓުދިން މެމްބަރުން ސަބަބެއް ކަމުގައި ދެއްކީ، އަދި ބަލަންޖެހޭ ކަންތައްތައް ހުރުން ކަމަށް ފުއާދު ވިދާޅުވިއެވެ.
ޑިމޮކްރެޓްސް ރަޖިސްޓަރީ ކޮށް ނުދިނުމަށް ވޯޓު ދީފައިވަނީ އީސީގެ މެމްބަރު ޢަލީ ނަޝާޠުއާއި މުހައްމަދު ޢާސިފްއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
