ރައީސް ޞާލިހް ޤާސިމަށް: ކިތަންމެ ކޯފާވެގެން ވާހަކަ ދެއްކެވިޔަސް ޤާނޫނުން ބޭރަކަށް ނުދާނަން

ވިލާ ކުންފުންޏަށް ދީފައި އޮތް ކ. ވާވެއްދި ފަޅު ވިއްކުން އެންޓި ކޮރަޕްޝަން ކޮމިޝަން (އޭސީސީ) އިން އެދިގެން ހުއްޓުވާފައިވާ މައްސަލައިގައި ޖުމްހޫރީ ޕާޓީގެ ލީޑަރު ޤާސިމް އިބްރާހީމް، ރައީސް އިބްރާހީމް މުޙައްމަދު ސާލިޙަށް އަމާޒު ކުރެއްވި ބަހުގެ ހަމަލާތަކަށް އެމަނިކުފާނު ރައްދު ދެއްވާފިއެވެ.

އެގޮތުން އިއްޔެ ރޭ ބޭއްވުނު ޖުމްހޫރީ ޕާޓީގެ 158 ވަނަ ކައުންސިލް ބައްދަލުވުމުގައި ޤާސިމް ވަނީ ވާވެއްދި ފަޅުގެ މައްސަލާގައަާއި އެހެނިހެން ކަންކަމުގައި ހިތްހަމަ ނުޖެހުން ފާޅުކުރައްވާ ރައީސް ޞާލިހުއަށް ބަހުގެ ހަމަލާތަކެއް އަމާޒު ކުރައްވާފައެވެ.

މިއަދު ބޭއްވުނު ނޫސްވެރިންގެ ބައްދަލުވުމެއްގައި މިކަމާއި ގުޅިގެން ނޫސް ވެރިއަކު ކުރެއްވި ސުވާލަށް ޖަވާބު އަރުވަމުން ރައީސް ޞާލިހު ވިދާޅުވީ އެމަނިކުފާނުގެ ވެރިކަމުގައި މިހާތަނަށް ހޭދަ ކުރެއްވި ވަގުތުގައި އެމަނިކުފާނު މަސައްކަތް ކުރައްވަމުން އައީ ޤާނޫނު އަސާސީ އާއި ޤާނޫނުގެ އިމުގެ ތެރެއިން ކަމަށާއި މި އިމުން ބޭރަށް އެމަނިކުފާނު ވަޑައިނުގަންނަވާނެ ކަމަށެވެ.

"އިރާދަކުރެއްވިއްޔާ ކުރިއަށް އޮތް ތަނުގައިވެސް އަޅުގަނޑު މަސައްކަތް ކުރާނީ ޤާނޫނުއަސާސީއާއި ޤާނޫނުގެ އިމުގެ ތެރޭގައި، އެއީ އަޅުގަނޑު ކިތަންމެ ގާތް މީހެއްގެ ކަމެއް ވިޔަސް. އަދި އަޅުގަނޑުގެ ޕާޓީގެ މީހެއްގެ ކަމެއް ވިޔަސް. އާއިލާގެ މީހެއްގެ ކަމެއް ވިޔަސް. އަޅުގަނޑަކަށް ޤާނޫނުއަސާސީން ބޭރަކަށް ނުދެވޭނެ. އޭގައި އޮތް ގޮތަށް އެކަން ކުރިއަށްދާނީ." އެމަނިކުފާނު ވިދާޅުވިއެވެ.

މިއާއިއެކު ރައީސް ޞަލިހު ވިދާޅުވީ މިނިވަން މުއައްސަސާތަކުން ކުރާ ކަންތައްތައް އެ އޮތްގޮތަށް ކުރިއަށްދާނެ ކަމަށާއި މިކަމުގެ ތެރެއަށް އެމަނިކުފާނުގެ ނުފޫޒު ފޯރުވުމަކީ މިހާތަނަށްވެސް ކުރި ކަމެއްނޫން ކަމަށެވެ.

އަދި ކުރިއަށް އޮތް ތަނުގައިވެސް މިކަން ނުކުރައްވާނެ ކަމަށް ރައީސް ޞާލިހު ފާހަގަކުރެއްވިއެވެ.

"އެހެންވީމަ މި މައްސަލާގަވެސް އަޅުގަނޑު ހުންނާނީ ޤާނޫނީ އިމުގެ ތެރޭގައި. ގާނޫނުން ބޭރަކަށް ނުދާނަން. އެއީ ކޮންމެ ބޭފުޅަކު ކިތަންމެ ކޯފާވެގެން ވާހަކަ ދެއްކެވިޔަސް. އެއީ އެބޭފުޅެއްގެ ކަމެއް." ރައީސް ޞާލިހު ވިދާޅުވިއެވެ.

ޓޫރިޒަމް މިނިސްޓްރީން ދޫކުރި ބޭނުމާ އެއްގޮތަށް މަސައްކަތް ކުރިއަށް ނުދާ ކަމަށް ބުނެ ވާވެއްދި ފަޅު ވިލާ ކުންފުނީގެ އަތުން އަތުލީ ކުރީގެ ރައީސް އަބްދުالله ޔާމީންގެ ވެރިކަމުގައި 2015 ގައެވެ.  އޭރު އަތުލި ތަންތަނުގެ ތެރޭގައި ވާވެއްދި ފަޅާއި ކ. ބޮލިދިއްފަރާއި ރ. މާނެންފުއްޓާއި ގދ. ގަޒީރާ އާއި ކ. މާދިއްގަރުފަޅު ހިމެނެއެވެ. ނަމަވެސް މި މައްސަލައިގައި ސަރުކާރުން އެއްބަސްވުން އުވާލީ ގާނޫނާ ހިލާފަށް ކަމަށް ބުނެ ސުޕްރީމް ކޯޓުން ވަނީ އެ މައްސަލަ ވިލާއާ އެއްކޮޅަށް ފަހުން ނިންމައިފައެވެ.

އެފަދައިން ކަން ހިނގާފައިވަނިކޮށް، ވާވެއްދިފަޅާއި ގުޅިގެން އެއްވެސް މުޢާމަލާތެއް ނުހިންގުމަށް ދާދިފަހުން އެންޓި-ކޮރަޕްޝަން ކޮމިޝަނުން ވިލާ އަށް ވަނީ އަންގާފައެވެ.