ރަނިންމޭޓަކަށް ވަކި ބޭފުޅަކު އަދި ކަނޑަނާޅާ؛ އެކަން ކުރުމުގެ އިޚްތިޔާރު ދިނީ ރައީސް ޔާމީނަށް: ޕީޕީއެމް

ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމްގެ ރަނިން މޭޓަކަށް ވަކި ބޭފުޅަކު ކަނޑައަޅާފައި ނުވާ ކަމަށް އެ ޕާޓީން ބުނެފި އެވެ.

ރައީސް ޔާމީންގެ ރަނިންގ މޭޓަކަށް ބޭފުޅަކު ހަމަޖައްސަވައިފި ކަމަށް ބައެއް މީޑިއާ ތަކުން ރިޕޯޓް ކުރުމާއި ގުޅިގެން އެކަން ދޮގުކޮށް ޕީޕީއެމުން ނެރުނު ބަޔާނެއްގައި ބުނީ، އެ ޕާޓީގެ އަސާސީ ގަވާއިދުގައި ވާގޮތުން ރަނިންގ މޭޓަކު ކަނޑައެޅުމަކީ ރިޔާސީ ކެންޑިޑޭޓަށް ލިބިދޭ އިޚުތިޔާރެއް ކަމަށެވެ.

އެހެން ނަމަވެސް، އެމަގާމަށް ބޭފުޅަކު ކަނޑައެޅުއްވުމަށް ލީޑަރޝިޕްގެ ފަރާތުން ނަންތަކެއް ފޮނުވުމަށް ރައީސް ޔާމީން  ލީޑަރޝިޕްގައި އެދިވަޑައިންފައިވާ ކަމަށްވެސް ޕީޕީއެމުން ވަނީ ބުނެފަ އެވެ.

"އެހެންނަމަވެސް، ރަނިންގމޭޓު ކަނޑައެޅުމަކީ ޕާޓިގެ އަސާސީ ޤަވާއިދުން ރިޔާސީ ކެންޑިޑޭޓަށް ލިބިދޭ އިޚުތިޔާރަކަށް ވާތީ، ލީޑަރޝިޕްގެ ފަރާތުން ވަކި ނަންތަކެއް ދިނުމުގެ ބަދަލުގައި ރިޔާސީ ކެންޑިޑޭޓް ބޭފުޅަކު ޚިޔާރު ކުރެއްވުމަށް ދަންނަވަން ލީޑަރޝިޕްގެ އިއްތިފާޤުން މިރޭ ނިންމާފައިވާތީ، އެވާހަކަ ދެންނެވީމެވެ." ޕީޕީއެމުން ބުނެފައިވެއެވެ.

އެހެންކަމުން ޕީޕީއެމްގެ ރިޔާސީ ކެންޑިޑޭޓްގެ ރަނިންގ މޭޓަކަށް ވަކި ބޭފުޅަކު އަދި ކަނޑައެޅިފައި ނުވާކަމަށްވެސް އެ ޕަޓީން ވަނީ ހާމަކޮށްފައެވެ.

މިއަހަރުގެ ސެޕްޓެމްބަރު 9 ވަނަ ދުވަހު ބާއްވާ ރިޔާސީ އިންތިހާބުގައި އިދިކޮޅު ޕީޕީއެމް/ޕީއެންސީގެ ފަރާތުން ވާދަކުރައްވާ ކުރީގެ ރައީސް އަބްދުالله ޔާމީން އަބްދުލްގައްޔޫމްގެ ކެންޑިޑެސީ ފޯމު ހުށަހެޅުމަށް ބޭނުންވާ ލިޔެކިޔުންތަކުގައި އެމަނިކުފާނު ސޮއި ކުރައްވައި، އެ ލިޔެކިޔުންތައް ކަރެކްޝަންސް މެދުވެރިކޮށް އަނބުރާ ޕީޕީއެމް އޮފީހަށް އިއްޔެގެ ވަގުތެއްގައި ފޮނުވާފައިވާ ކަމަށް އެ ޕާޓީން ވަނީ ބުނެފަ އެވެ.

ކެންޑިޑެސީ ފޯމުގައި ސޮއި ކުރައްވައި، ރަނިންމޭޓަކު ކަނޑައެޅުމާއި ހިސާބަށް ގޮސްފައިވާއިރު، އިދިކޮޅުުގެ ރިޔާސީ ކެންޑިޑޭޓް ރައީސް ޔާމީން ހުންނެވީ، ވ. އާރަށް ކުއްޔަށް ދިނުމާއި ގުޅޭ މައްސަލާގައި އެމަނިކުފާނުގެ މައްޗަށް އުފުލާފައިވާ ދައުވާތައް ސާބިތުވާ ކަމަށް ކަނޑައަޅައި ކްރިމިނަލް ކޯޓުން ކޮށްފައިވާ 11 އަހަރުގެ ޖަލު ހުކުމް ތަންފީޒް ކުރައްވަން ޖަލުގައެވެ.

ނަމަވެސް އާރަށު މައްސަލައިގައި ރައީސް ޔާމިނުގެ މައްޗަށް ކޮށްފައިވަނީ ނުހައްގު ހުކުމެއް ކަމަށާއި، ހައި ކޯޓު މަރުހަލާއިން ރައީސް ޔާމިން މިނިވަންވެ ވަޑައިގަންނަވާނެ ކަމުގެ ފުރިހަމަ ޔަގީންކަން އޮތްކަމަށް އެމަނިކުފާނުގެ އިސް ޤާނޫނީ ވަކީލު ޑރ މުޙައްމަދު ޖަމީލު އަހުމަދު ވަނީ ވިދާޅުވެފަ އެވެ.