ފުލުހުންގެ އަމުރަށް ނުކިޔަމަންތެރިވެ ހަޑިހުތުރުބަހުން މުއާމަލާތް ކުރުމުން އާމިރު ހައްޔަރުކޮށްފި!

ފުލުހުންގެ އަމުރަށް ނުކިޔަމަންތެރިވެ, ހަޑިހުތުރުބަހުން ފުލުހުންނާއި މުއާމަލާތް ކުރި މައްސަލާގައި ރައްޔިތުންގެ މަޖިލީހުގެ ކުޑަހުވަދޫ ދާއިރާގެ މެމްބަރު އަހުމަދު އާމިރު ރޭ ދަންވަރު ހައްޔަރުކޮށް ފުލުސް އޮފީހަށް ގެންގޮސްފި އެވެ.

އާމިރު ހައްޔަރު ކުރަން މަސައްކަތް ކުރުމުން ގަދަ ދައްކައި، "އަނިޔާ ނުކުރޭ" "އަނިޔާ ނުކުރޭ" ގޮވަމުންދިޔަ މަންޒަރު ފެންނަ ވީޑިއޯ އެއް ރޭ މީސްމީޑިއާގައި ވަނީ ދައުރުވެފައެވެ. ގަދަ ދެއްކުމުގެ ސަބަބުން ފުލުހުން އާމިރު ހައްޔަރު ކޮށްފައި ވަނީވެސް ގަދަ ކަމުންނެވެ. އެކަމާއި ގުޅިގެން ގިނަ ބައެއްގެ ފާޑުކިޔުންތައް ފުލުހުންނަށް ވަނީ އަމާޒުވެފައެވެ.

އެކަން ހިނގައި ދިޔަގޮތާއި ގުޅިގެން، "ވޮއިސް" އަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލް ވިދާޅުވީ، ހުޅުމާލޭ ދެވަނަ ފިޔަވަހީގައި ރޭ 12:55 ކަން ހާއިރު، ވީ.ސީ.ޕީ ޖަހައި، ފުލުހުން އުޅަނދުތައް ޗެކު ކުރަމުން ދިޔައިރު، އާމިރުގެ ސައިކަލު އައީ ހިތިގަަސް މަގުން ދެކުނަށް ދުއްވާފައި ކަމަށެވެ.

އަދި އޭނާ ގާތުގައި މަޑުކުރަން އެންގުމުން ވެސް ވީސީޕީއަށް މަޑު ނުކޮށް، ހަޑި ހުތުރު ބަހުން ފުލުހުންނާއި މުއާމަލާތް ކުރުމަށްފަހު، ނުރައްކާތެރިކޮށް އަދި ބާރު ސްޕީޑުގައި ސައިކަލް ދުއްވާފައި ދިޔުމުން ފުލުހުން ގޮސް އެ ސައިކަލް ހުއްޓުވާފައިވާ ކަމަށްވެސް އޮފިޝަލް ވިދާޅުވި އެވެ.

މިއާއެކު މީޑިއާ އޮފިޝަލް ވިދާޅުވީ، އޭނާ ހުއްޓުވައި ފުލުހުން އޭނާއާއި ސުވާލު ކުރުމުން މައުލޫމާތު ދިނުމަށް އިންކާރުކޮށް ފުލުހުންގެ އަމުރަށް ނުކިޔަމަންތެރިވެފައިވާ ކަމަށެވެ.

"އަދި އޭނާ ފުލުހުންގެ ބެލުމުގެ ދަށުން، ހުޅުމާލޭ ފޭސް 2 ޕޮލިސްޓޭޝަނަށް ގެންގޮސް މައުލޫމާތު ސާފުކުރުމަށްފަހު ވަނީ ދޫކޮށްލައިފަ. އޭނާ ދުއްވި ސައިކަލް ވަނީ ޓޯ ކޮށްފައި" މީޑިއާ އޮފިޝަލް ވިދާޅުވި އެވެ.

މިމައްސަލަ ފުލުހުން ތަހުގީގު ކުރަމުންދާ ކަމަށްވެސް އޮފިޝަލް ވިދާޅުވި އެވެ.