ވ. އާރަށް މައްސަލަ: ދައުލަތުން ހުށައެޅި އީ.ވައި.ސީގެ ޔައުމިއްޔާ ސައްހަ ނޫންކަމަށް ޒުހޫރުވެސް ހެކިވެއްޖެ!

ވ. އާރަށުގެ މުއާމަލާތާއި ގުޅިގެން ކުރީގެ ރައީސް ޔާމީން އަބްދުލްގައްޔޫމުގެ މައްޗަށް ދައުލަތުން އުފުލާފައިވާ ދެ ދައުވާ ސާބިތުކުރުމަށް ދައުލަތުން ހެއްކެއްގެ ގޮތުގައި ހުށައަޅާފައިވާ އިކޮނޮމިކް އެންޑް ޔޫތު ކައުންސިލް(އީ.ވައި.ސީ) ގެ ބައްދަލުވުމެއްގެ ޔައުމިއްޔާއަކީ ސައްހަ ޔައުމިއްޔާއެއް ނޫންކަމަށް ވިދާޅުވެ އަހުމަދު ޒުހޫރު ހެކިބަސް ދެއްވައިފިއެވެ.

ވ. އާރަށުގެ މައްސަލައާއި ގުޅިގެން މިއަދު ކުރިއަށް ގެންދިޔަ ޝަރީއަތުގެ އަޑުއެހުމުގައި ވަނީ ރައީސް ޔާމީންގެ ފަރާތްޕުޅުން ހުށައަޅާފައިވާ ހެކިންގެ ހެކިބަސް ނަގާފައެވެ.

ޒުހޫރު ކޯޓަށް ހާޒިރުކޮށްފައިވަނީ އެ މައްސަލައިގައި ދައުލަތުން ހެއްކެއްގެ ގޮތުގައި ހުށައަޅާފައިވާ އީ.ވައި.ސީގެ ޔައިމުއްޔާއަކާއި ގުޅޭގޮތުންނެވެ.

ޒުހޫރަކީ ރައީސް ޔާމީންއާއެކު ވަރަށް ގިނަ ދުވަސްތަކެއްގައި މަސައްކަތްޕުޅުކުރައްވާފައިވާ ބޭފުޅެކެެވެ. އެގޮތުން ޒުހޫރު ވަނީ ރައީސް އޮފީހުގެ ކެބިނެޓު މެމްބަރުކަންވެސް ކުރައްވާފައެވެ. އޭރު ޔޫތު މިނިސްޓަރުގެ ޙައިސިއްޔަތުން އިކޮނޮމިކް އެންޑް ޔޫތު ކައުންސިލް (އީވައިސީ) ގައި މަސައްކަތް ކުރައްވާފައިވެއެވެ.

ޒުހޫރު ވިދާޅުވީ އީ.ވައި.ސީއިން ވަކި ގޮތަކަށް ކަމެއް ނިންމައިފިނަމަ އެކަން ފެންނާނެހެން ޔައުމިއްޔާގެ ގޮތުގައި އޮންނަ ލިޔުމެއް އޮންނާނެކަމަށެވެ.

އެޖެންޑާގައި ނުހިމެނޭ އެއްވެސްކަމެއް އެ ކައުންސިލްގެ ބައްދަލުވުމުގައި ނުނިންމާނެކަމަށާއި، އެފަދަ މައްސަލައެއް މެމްބަރުންގެ ބޭނުމަށް މަޝްވަރާކުރެވިފައި އޮވެދާނެކަމަށެވެ.

އާރަށުގެ މައްސަލައާއި ގުޅިގެން ދައުލަތުން ހުށައަޅާފައިވާ ޔައުމިއްޔާއަކީ ސައްހަ ޔައުމިއްޔާއެއް ނޫންކަމަށް ޒުހޫރު ވަނީ ވިދާޅުވެފައެވެ. ދައުލަތުން ހުށައަޅާފައިވާ އެ ކަރުދާސް މިއަދުގެ އަޑުއުހުމުގައި ވަނީ އޭނާ އަށް ދައްކާފައެވެ. އެއީ ސައްހަ ލިޔުމެއް ނޫންކަމަށް ޒުހޫރު ވިދާޅުވީ، އެ ލިޔުން ބެއްލެވުމަށްފަހުގައެވެ.

އެކަން ކަށަވަރުކޮށްދެއްވަމުން ޒުހޫރު ވިދާޅުވީ އީ.ވައި.ސީގެ ޔައުމިއްޔާތަކަކީ ގަވައިދުން ބަލަހައްޓާ ލިޔެކިޔުންތަކެއްކަމަށެވެ. އެގޮތުން ބައްދަލުވުމުގެ ޔައުމިއްޔާތަކުގައި ބައިވެރިވާ ވަޒީރުންގެ ސޮއި ކުރައްވާކަމަށް އޭނާ ވިދާޅުވިއެވެ. އަދި ޔައުމިއްޔާގެ ކޮންމެ ކަރުދާހެއްގައި ބައިވެރިވާ މެމްބަރުންގެ އިނީޝަލް ޖައްސަވާނެކަމަށް އޭނާ ވިދާޅުވިއެވެ.

ކޮންމެ ދުވަހެއްގެ ބައްދަލުވުމުގެ ޔައުމިއްޔާ ޖެހިގެން އަންނަ ޔޫތު ކައުންސިލް ބައްދަލުވުމަށް ގެންނަވާ އެ ޔައުމީތައް ޗެކުރުމަށްފަހު މެމްބަރުން ސޮއިކުރައްވާނެކަމަށް އޭނާ ވިދާޅުވިއެވެ. ޔައުމިއްޔާއަކީ ވަކިން އެއްވެސް މެމްބަރަކަށް ފޮނުއްވާ އެއްޗެއް ނޫންކަމަށާއި، ޔައުމިއްޔާ ކަރުދާސް(ހާޑް ކޮޕީ) ކައުންސިލް ބައްދަލުވުންތަކަށް ގެނެސް މެމްބަރުންލައްވާ ސޮއި ކުރުވުމަށްފަހު ފައިލްކުރާކަމަށް އޭނާ ވިދާޅުވިއެވެ.

އެ ކައުންސިލްގެ ޔައުމިއްޔާތައް ބެލެހެއްޓުމުގެ މަސައްކަތްޕުޅަކީ އޭނާ ކުރައްވާ މަސައްކަތްޕުޅެއްކަމަށާއި، ބައްދަލުވުންތަކުގެ ޔައުމިއްޔާ ގައިވައިދުން ފާސްކުރާކަމަށާއި، އެއްވެސް ބައްދަލުވުމެއްގެ ޔައުމިއްޔާ ސޮއި ނުކުރެވި ނޯންނާނެކަމުގެ ޔަގީންކަން ޒުހޫރު ވަނީ ދެއްވާފައެވެ.

އެއާއެކު އޭނާ ވިދާޅުވީ، ޔޫތު ކައުންސިލްގެ މެމްބަރުން ސޮއިކުރައްވާފައި ނެތް ޔައުމިއްޔާއަކީ ސައްހަ ޔައުމިއްޔާއެއް ނޫންކަމަށެވެ.

ޒުހޫރު މިފަދައިން ވިދާޅުވެފައިވާއިރު، މިއަދު ކޯޓުގައި ހެކިބަސް ދެއްވަމުން އީ.ވައި.ސީގައި އިންނެވި ކުރީގެ އިކޮނޮމިކް މިނިސްޓަރު މުހައްމަދު ސައީދުވެސް ވަނީ ދައުލަތުން ހުށައެޅި ޔައުމިއްޔާއަކީ ސައްހަ ޔައުމިއްޔާއެއް ނޫންކަމަށް ވިދާޅުވެ ހެކިބަސް ދެއްވާފައެވެ.

ސައީދު ހެކިބަހުގައިވެސް އެއީ ސައްހަ ޔައުމިއްޔާއެއް ނޫންކަމަށް ވިދާޅުވެފައިވަނީ، އެ ޔައުމިއްޔާގައި މެމްބަރުންގެ ސޮއި ނެތުމުންނެވެ.