ނާޒިމު ނެތަސް ޖުމްހޫރީ ޕާޓީގެ ހިތްވަރު އަދިވެސް ދައްކާނެ: އަލީ ސޯލިހު
ރައްޔިތުންގެ މަޖިލީހުގެ ދަނގެތީ ދާއިރާގެ މެމްބަރު މުހައްމަދު ނާޒިމް ޖުމްހޫރީ ޕާޓީއިން ނެތް ނަމަވެސް، އެ ޕާޓީއިން އަދިވެސް ހިތްވަރު ދައްކާނެކަމަށް ޕާޓީގެ ސްޕޯކްސް ޕާރސަން އަލީ ސޯލިހު ވިދާޅުވެއްޖެއެވެ.
އަލީ ސޯލިހު މިފަދައިން ވިދާޅުވީ ދާދިފަހުން މޯލްޑިވަސް ނެޝަނަލް ޕާޓީ (އެމް.އެން.ޕީ) ގެ ޖަލްސާއެއްގައި ޖުމްހޫރީ ޕާޓީއާއި އެ ޕާޓީގެ ލީޑަރު ގާސިމް އިބްރާހިމްއަށް ވަރަށް ބޮޑަށް ނާޒިމު ފާޑުވިދާޅުވުމާއި ގުޅިގެން ކުރެއްވި ޓްވީޓެއްގައެވެ.
އަލީ ސޯލިހު ވިދާޅުވީ ނާޒިމު މަޖިލީހުގެ ގޮނޑި ކާމިޔާބުކުރެއްވީ ޖޭޕީގެ ސްލޮޓެއްގައިކަމަށެވެ. ގޮނޑި ކާމިޔާބުކުރުމަށްފަހު ޕާޓީއިން ނިކުމެމަޑައިގެން ތާއީދު އޮތްކަމަށް ވިދާޅު ނަމަވެސް އެއީ ގަބޫލުކުރެވޭނެ ވާހަކައެއް ނޫންކަމަށް އޭނާ ވިދާޅުވިއެވެ.
އެއާއެކު އަލީ ސޯލިހު ވަނީ ރައްޔިތުންނަށް ތާއީދު އޮތް މިންވަރު ދެއްކެވުމަށް އިސްތިއުފާދެއްވުމަށްފަހު އަލުން އަމިއްލަފުޅަށް ކުރިމަތިލައްވާ ގޮނޑި ކާމިބާރު ކުރެއްވުމަށް ނާޒިމްއަށް ގޮވާލައްވާފައެވެ.
"ޖޭޕީއިން ނިކުންނަވާ ބުރަކަށިމަތީގައި ހިންގަވާ، ޖޭޕީ ނަމުގައި ގޮނޑިއެއް ލިބުނީމާ ޖޭޕީއިން ވަކިވެ ޖޭޕީއިން ނޫންކަމަށް ތިމާ ހޮވުނީ ވިދާޅުވާ ބޭފުޅުން ނިކަން ކެރިވަޑައިގަންނަވަންޏާ އިސްތިއުފާދީ އަލުން އެ ދާއިރާއަށް ވާދަކުރައްވާ"
ޖޭޕީގެ ސްޕޯކްސް ޕާރސަން އަލީ ސޯލިހު
އަލީ ސޯލިހު އިތުރަށް ވިދާޅުވީ ނާޒިމް ޕާޓީ ދޫކުރައްވާ ވަޑައިގެންނެވި ނަމަވެސް ޕާޓީ އަދި އެ ޕާޓީގެ ލީޑަރު އަދިވެސް ހިތްވަރު ދައްކާނެކަމަށެވެ. އަލީ ސޯލިހުގެ ޓްވީޓުގައި ވަނީ ޕާޓީ ދޫކުރައްވާ ވަޑައިގެން ނާޒިމް އަމިއްލަފުޅު ސިޔާސީ ޕާޓީއެއް ހެއްދުވުމާއި ގުޅިގެން ގާސިމް އިބާރާހިމް ދެއްކަވާފައިވާ ވާހަކަފުޅެއްވެސް ހިއްސާކުރައްވާފައެވެ.
އެ ކަމާއި ގުޅިގެން ގާސިމް ވިދާޅުވީ، ޕާޓީ ދޫކުރައްވާ ވަޑައިގަންނަވާ ފަރާތްތައް ބޭކާރު ނުވެ، އަމިއްލަ ސިޔާސީ ޕާޓީތައް ހެދުމަކީ ޖުމްހޫރީ ޕާޓީއަކީ މީހުން ބިނާކުރާ ޕާޓީއެއްކަން ދަލީލުކޮށްދޭކަމެއްކަމަށެވެ. އަދި އެއީ އުފާކުރައްވާކަމެއްކަމަށް ގާސިމް ވަނީ ވިދާޅުވެފައެވެ.
ޖުމްހޫރީ ޕާޓީގެ ސްލޮޓެއްގައި މަޖިލީހަށް ވަޑައިގަތުމަށްފަހު، ދަނގެތީ ދާއިރާގެ މެމްބަރު އަދި މަޖިލީހުގެ ކިނބިދޫ ދާއިރާގެ މެމްބަރު ރިޔާޒު ވަނީ ޕާޓީއިން ވަކިވެވަޑައިގަންނަވާފައެވެ. އެފަހުން އެ ބޭފުޅުންވެގެން އެމްއެންޕީ އުފައްދަވާފައިވާއިރު، ކުރިއަށް އޮތް ރިޔާސީ އިންތިޚާބުގައި އެ ޕާޓީއިން ވާދަކުރާނެކަންވެސް ވަނީ އިއުލާނުކުރައްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
