ފޯޅަވަހި މައްސަލައިގައި ރައީސް ހަނު ހުންނަވަނީ ކުށް ކުރެވުނުކަން ގަބޫލު ކުރާތީ: ރައީސް ޔާމީން

ފޯޅަވަހި މައްސަލައިގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ހަނު ހުންނަވަނީ އެ މައްސަލައިގައި ގޯސްތަކެއް ހައްދަވާ ކުށް ކުރެވުނުކަން އަމިއްލަފުޅަށް ގަބޫލުކުރެވޭތީކަމަށް ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމު ވިދާޅުވެއްޖެއެވެ.

ރައީސް ޔާމީން މިފަދައިން ވިދާޅުވެފައިވަނީ ނ ހޮޅުދޫގައި ބޭއްވި ޕީޕީއެމްގެ ޖަލްސާއެއްގައި ވާހަކަދައްކަވަމުންނެވެ.

އެ ޖަލްސާގައި ވާހަކަދައްކަވަމުން ރައީސް ޔާމީން ވަނީ ފޯޅަވަހި މައްސަލައިގައި ސަރުކާރުން ސްޓޭންޑް ބަދަލުކުރުމާއި ގުޅިގެން ބޮޑެތި ކަންބޮޑުވުންތަކެއް ހިއްސާކުރައްވާފައެވެ.

އެގޮތުން އެމަނިކުފާނު ވިދާޅުވީ ފޯޅަވަހި މައްސަލައިގައި ސަރުކާރުން ނިންމި ނިންމުމާއި ގުޅިގެން ރާއްޖޭގެ ސަރަހައްދުން ބޮޑު ބައެއް ގެއްލިގެން ދިއުމުގެ ފުރުސަތު އޮތްކަމަށެވެ. ރާއްޖޭގެ ސަރަހައްދުން ގެއްލޭނެ ސަރަހައްދުގެ ބޮޑުމިން ރައްޔިތުންނަށް ފަސޭހައިން ވިސްނައިދެއްވުމަށް މިސާލު ޖައްސަވަމުން ރައީސް ޔާމީން ވިދާޅުވީ ފޯޅަވަހި މައްސަލައިގައި ސަރުކާރުން މޮރިޝަސްކޮޅަށް ޖެހުމުގެ ސަބަބުން ރާއްޖޭގެ ސަރަހައްދުން ޕޯޗުގީޒު ވަރުގެ ބޮޑު ސަރަހައްދެއް ގެއްލިގެންދާނެކަމަށެވެ.

އެކަން ސަރުކާރުން ކޮށްފައިވަނީ ގަވައިދާއި ޚިލާފަށްކަމަށާއި، އެކަމުގައި ޝާމިލްވާ ހުރިހާ ފަރާތްތައް އެކަމުގެ ޒިންމާ ދަންގަވަން ޖެހޭނެކަމަށް ރައީސް ޔާމީން ވިދާޅުވިއެވެ.

އެއާއެކު އެމަނިކުފާނު ވިދާޅުވީ ރައްޔިތުންގެ ކަންބޮޑުވުން މިހާ ބޮޑަަށް ފޯޅަވަހި މައްސަލައާއި ގުޅިގެން އޮތް އިރު ރައީސުލް ޖުމްހޫރިއްޔާ ހުންނަވަނީ ހަނުކަމަށެވެ.

އެގޮތަށް ރައީސް ހަނު ހުންނަވާ ހުންނެވުމުން އެމަނިކުފާނު އަމިއްލަފުޅަށް ކުށަށް އިއުތިރާފުވާކަން ދަލީލުކޮށްދޭކަމަށް ރައީސް ޔާމީން ވިދާޅުވިއެވެ. ފޯޅަވަހި މައްސަލައިގައި ރައީސް ހަނު ހުންނަވަނީ ކުށްވެރިންނަށް ލިބިދޭ ހަނު ހުރުމުގެ ހައްގުގެ ބޭނުން ހިއްޕަވައިގެންކަމަށް ރައީސް ޔާމީން ވިދާޅުވިއެވެ.

ރައީސް ޔާމީން އިތުރަށް ވިދާޅުވީ، ދިވެހިރާއްޖޭގެ ސަރަހައްދުން އަކަ އިންޗިއެއްވެސް ދޫކޮށްލުމަކީ ދިވެހިން ބޭނުންވާނެ ގޮތެއް ނޫންކަމަށެވެ. އަދި ރާއްޖޭގެ ސަރަހައްދުން ބޮޑު ބައެއް ގެއްލޭގޮތަށް ސަރުކާރުން މޮރިޝަސްއަށް އެއްކޮޅަށް ވޯޓުދިނުމަށް ނިންމީ ޑީލްއެއް ހަދައިގެން ނުވަތަ އިންޑިއާގެ ނުފޫޒު ފޯރުވައިގެންކަމަށް ބެލެވޭކަމަށް ރައީސް ޔާމީން ވިދާޅުވިއެވެ.