ނައިފަރުގެ ފުލެޓް ތަކުން މައްސަލަ ހުރި ފުލެޓްތައް މަރާމާތު ކުރިން: މިނިސްޓްރީ

ޅ.ނައިފަރުގަައި މި ސަރުކާރުން އަޅާފައިވާ ފުލެޓް ތަކުގެ ތެރެއިން، މައްސަލަ ހުރެގެން ރިޕޯޓު ކުރި ހުރިހާ ފުލެޓެއް ވެސް މަރާމާތުކޮށްފައިވާ ކަމަށް ޕްލޭނިންގ މިނިސްޓްރީން ބުނެފިއެވެ.

ނައިފަރުގެ ފުލެޓުތަކަށް، ވާރޭ ވެހޭ ކޮންމެ ފަހަރަކު ފެންވަދެ، ސީލިންގުންވެސް ފެން އޮހި ގިނަ ގެއްލުން ތަކެއް ވެފައިވާ ކަމުގެ ޝަކުވާ  ފުލެޓް ތަކުގައި ދިރިއުޅެމުންދާ މީހުން ކުރަމުން ދަނިކޮށް، އެކަމާއި ގުޅިގެން ޕްލޭނިންގ މިނިސްޓްރީން ނެރުނު ނޫސް ބަޔާނެއްގައި ބުނީ، ޅ. ނައިފަރުގައި ޑިޒައިން އެންޑް ބިލްޑް އުސޫލުން 100 ހައުސިން ޔުނިޓް އިމާރާތްކުރުމަށްޓަކައި ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑްއާ ދެމެދު ޖެނުއަރީ 26، 2020 ގައި ވެފައިވާ އެއްބަސްވުމުގެ ދަށުން މަސައްކަތް ނިންމުމަށްފަހު މި އަހަރުގެ ފެބްރުއަރީ 19 ގައި 100 ހައުސިން ޔުނިޓް ހިމެނޭ 4 އިމާރާތް މިނިސްޓްރީއާ ހަވާލުކޮށްފައިވާ ކަމަށެވެ. އަދި އެއަށްފަހު އެ އިމާރާތްތައް ބެލެހެއްޓުމާއި އިމާރާތާ ގުޅޭ ކަންކަން އެ ރަށު ކައުންސިލާ ހަވާލުކޮށްފައިވާ ކަމަށްވެސް އެ ބަޔާނުގައި ބުނެފައިވެއެވެ.

މިނިސްޓްރީއިން އިތުރަށް ބުނީ އެ މަޝްރޫއުގެ ކޮންޓްރެކްޓަރާއެކުވެފައިވާ އެއްބަސްވުމުގައިވާ ގޮތުން މަސައްކަތް ނިންމުމަށްފަހު 1 އަހަރު ދުވަހުގެ މުއްދަތުގައި އިމާރާތަށް ލިބޭ ގެެއްލުންތައް މިނިސްޓްރީއިން ބެލުމަށްފަހު އެކަން ކޮންޓްރެކްޓަރަށް އެނގުމުން އެ މަރާމާތުތައްކުރާނީ މަސައްކަތުގެ ކޮންޓްރެކްޓަރުން ކަމަށެވެ.

އެގޮތުން ފްލެޓުތަކުގެ މައްސަލަތަކެއް ހުރި ކަމަށް މޭ 19 ގައި ކައުންސިލްގެ ފަރާތުން މިނިސްޓްރީއަށް ހުށަހެޅުމުން ކޮންޓްރެކްޓަރުގެ ޓީމެއް ޖޫން 10 ގައި ނައިފަރަށް ގޮސް ކައުންސިލާއެކު މަޝްވަރާކުރުމަށްފަހު އެ މަހުގެ 12 ވަނަ ދުވަހު މައްސަލަ ހައްލުކުރުމުގެ މަސައްކަތް ފަށާފައިވާ ކަމަށާއި ކައުންސިލުން ފާހަގަކުރި ހުރިހާ މަރާމާތުތައް ނިންމާ ކައުންސިލްގެ އެޕްރޫވް ހޯދާފައިވާ ކަމަށް މިނިސްޓްރީއިން ފާހަގަކުރިއެވެ.

މިއާއެކު އެ މިނިސްޓްރީއިން ބުނީ އެ މަރާމާތުގެ އިތުރުން ބޮޑު މަރާމާތެއްކުރުމަށް ކައުންސިލުން މިނިސްޓްރީއަށް ހުށަހަޅާފައެއް ނުވާ ކަމަށާއި އެއްވެސް ފަރާތަކުން ފުލެޓްރަކުގެ މަރާމާތާގުޅޭ އެއްވެސް ކަމެއްގައި މިނިސްޓްރީއަށް ހުށަހަޅައިފިނަމަ ނުވަތަ އެފަދަކަމެއް މިނިސްޓްރީގެ ސަމާލުކަމަށް ގެެނެސްފިނަމަ ވަގުތުން އެކަމަކަށް އެޓެންޑްވަމުން ގޮސްފައިވާނެ ކަމަށެވެ.