ރިޗާލިސަންގެ އާދަޔާހިލާފު ލަނޑާއެކު ބްރެޒިލްއަށް ފުރިހަމަ މޮޅެއް

ވޯލްޑްކަޕުގެ އެންމެ ކާމިޔާބު ޓީމުތަކުގެ ތެރޭގައި ހިމެނޭ ބްރެޒިލް މިފަހަރުގެ ވޯލްޑްކަޕުގެ ފުރަތަމަ މެޗުގައި ސާބިއާ އަތުން މޮޅުވެ ފެށުން ރަނގަޅުކޮށްފި އެވެ.

ލުސައިލް ސްޓޭޑިއަމުގައި ބުރާސްފަތި ދުވަހުގެ ރޭ ކުޅުނު މެޗު ބްރެޒިލް ކާމިޔާބުކޮށްފައިވަނީ 2-0 ގެ ނަތީޖާއަކުންނެވެ. ބްރެޒިލްގެ ފަރާތުން މި މެޗުގައި ވަނީ މޮޅު ކުޅުމެއް ފެނިގެންގޮސްފައެވެ.

ފުރަތަމަ ހާފުގައި އެއްވެސް ލަނޑެއް ނުފެނުނު ނަމަވެސް ބްރެޒިލް ދިޔައީ ފަހަރަކަށް ފަހު ފަހަރެއް ނުރައްކާކުރަމުންނެވެ. އަދި ސާބިއާ އިން ވަނީ ވަރަށް ރަނގަޅަށް އެ ޓީމުގެ ފަހަތް ބަލަހަައްޓާފައެވެ. ނަމަވެސް ސާބިއާ އަށް މާ ގިނައިރަކު އެގޮތަށް ކެތް ނުކުރެވުނެވެ. ދެވަނަ ހާފުގައި ބްރެޒިލް ވަނީ އެ ޓީމުން ވަރަށް ރަނގަޅަށް ފެންވަރު ދައްކާލާފައެވެ.

މެޗުގެ 62 ވަނަ މިނެޓުގައި ބްރެޒިލުން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބު ކޮށްދިނީ ރިޗާލްސަންއެވެ. އަދި މެޗުގެ 73 ވަނަ މިނެޓުގައި ރިޗާލްސަން ވަނީ ބައިސްކަލް ކިކަކުން ލަނޑެއް ޖަހާ ބްރެޒިލްގެ ލީޑު ފުޅާކޮށްދީފައެވެ. މި ލަނޑު އޭނާ ކާމިޔާބުކުރީ ވިނީޝިއަސްގެ އެހީތެރިކަމާއެކުގައެވެ.

ރިޗާލިސަން ޖެހި މި ލަނޑަކީ ގްރޫޕް ފިޔަވަހީގައި މިހާތަނަށް މި މުބާރާތުގައި ކުޅުންތެރިއަކު ޖެހި އެންމެ ރީތި ލަނޑެވެ. މި މެޗުގެ ވަކި ހިސާބަކުން އެ ޓީމުގެ ތަރި ނޭމާ ވަނީ އަނިޔާވެގެން ބާލާފައެވެ.

މި މެޗާއެކު ވޯލްޑް ކަޕުގެ ގްރޫޕް ފިޔަވަހީގެ ފުރަތަމަ ބުރު ވަނީ ނިމިފައެވެ. ކޮންމެ ޓީމަކަށް ވެސް މެޗެއް ލިބުނުއިރު ހުކުރު ދުވަހުން ފެށިގެން ކުރިޔަށްދާނީ ގްރޫޕް ސްޓޭޖުގެ ދެވަނަ ފިޔަވަހީގެ މެޗުތަކެވެ. ދެވަނަ މެޗުގައި މި މަހުގެ 28 ވަނަ ދުވަހު ބްރެޒިލުން ނިކުންނާނީ ސްވިޓްޒަލެންޑާއި ދެކޮޅަށެވެ. އަދި މި މެޗުން ބަލިވި ސާބިއާ ގްރޫޕް ސްޓޭޖުގެ ދެވަނަ މެޗުގައި މި މަހުގެ 28 ވަނަ ދުވަހު ނުކުންނާނީ ކެމަރޫންއާ ދެކޮޅަށެވެ.