ފީފާ ވޯލްޑްކަޕް އިން، ޔޫރަޕް މީހުން މުސްލިމުންނާއި މެދު އަދާވާތްތެރިވާ މިންވަރު ކަށަވަރުވޭ: ޝެއިޚް ސަމީރު

ޤަޠަރުގައި މިހާރު ކުރިއަށްދާ ފީފާ ވޯލްޑްކަޕް 2022 އިން، ޔޫރަޕު މީހުން އިސްލާމް ދީނާއި މުސްލިމުންނަށް އޮތް ޢަދާވަާތްތެރި ކަން އެނގި ކަށަވަރުވާ ކަމަށް މަޝްހޫރު ދީނީ އިލްމުވެރިޔާ އައްޝައިޚް އަޙްމަދު ސަމީރު ވިދާޅުވެއްޖެއެވެ.

ވޯލްޑްކަޕާއި ގުޅިގެން ޤަތަރުން އަޅާފައިވާ ފިޔަވަޅު ތަކަށް ހުޅަނގުން ގިނަ ފާޑުކިޔުން ތަކެއް އަމާޒުވެފައި ވަނިކޮށް ޝެއިޚް ސަމީރު ކުރެއްވި ޓުވީޓެއްގައި ވިދާޅުވީ، ޤަޠަރުގައި މިހާރު ކުރިއަށްދާ ފީފާ ވޯލްޑްކަޕް 2022 އިން، ޔޫރަޕު މީހުންގެ ނާތަހުޒީބު ކަމާއި، އަޚުލާޤީގޮތުން އެމީހުން ވެއްޓިިފައިވާ ދަށު ދަރަޖައާއި، އިންސާނީ ޙައްޤުތަކުގެ ނަމުގައި ހިންގަމުންދާ ބޮޑުވެގެންވާ ޖަރީމާއާއި، އިސްލާމް ދީނާއި މުސްލިމުންނަށް އޮތް ޢަދާވަާތްތެރި ކަން އެނގި ކަށަވަރުވާ ކަމަށެވެ.

ވޯލްޑް ކަޕް ފެށުމުގެ ކުރިން ގަތަރުން ވަނީ ސްޓޭޑިއަމް ތަކުގައި އެއް ޖިންސުން ގުޅުން ހިންގުން ޕްރޮމޯޓް ކޮށް، ދަނޑު އެތެރޭގައި ބަނގުރާ ބޭނުން ނުކުރެވޭނެކަމަށް އަންގާފައެވެ. އަދި އެ އެއްޖިންސުން ގުޅުން ހިންގުން ޕްރޮމޯޓް ކުރަން މަސައްކަތް ކޮށްފިނަމަވެސް އެކަން ހުއްޓުވައި ފިޔަވަޅު އެޅޭނެކަން އެ ގައުމުން ވަނީ އަންގާފައެވެ.

އެހެންނަމަވެސް، ހުޅަނގުގެ ގައުމުތަކުން، އެ އަޑު ނާހައި އަންނަނީ އެކަންކަމަށް ގޮންޖަހަން މަސައްކަތް ކޮށްފައެވެ. އެގޮތުން، އެއްޖިންސުން ގުޅުން ހިންގުން ޕްރޮމޯޓް ކުރުމަށް "ވަން ލަވް" އާމް ބޭންޑް އަޅައިގެން މެޗްތަކަށް އެރުމަށް ހުޅަނގުގެ ބައެއް ޓީމްތަކުން ވަނީ ނިންމާފައެވެ. އެހެންނަމަވެސް، ފީފާގެ އިންޒާރާއެކު އެ ގައުމުތަކުން އެކަން ނުކުރި ނަމަވެސް، ޖަރުމަނުން ކުޅުނު މެޗުގައި އެ ޓީމުގެ ކުޅުންތެރިން ވަނީ މެޗު ފެށުމުގެ ކުރިން ނެގި ފޮޓޯގައި، އެ އާމް ބޭންޑް ނޭޅޭތީ އެކަމާއި ދެކޮޅަށް ނުރުހުން ފާޅުކުރުމުގެ ގޮތުން އަނގަމަތީގައި އަތް އަޅާފައެވެ.

އަދި މީގެ އިތުރުންވެސް ބީބީސީ ފަދަ ބައެއް މަޝްހޫރު ހުޅަނގުގެ ޕްރޮޕެގެންޑާ ތައް ފަތުރާ ޗެނަލްތަކުން ގަތަރުގެ ވޯލްޑް ކަޕް ފެށުމުގެ ރަސްމިއްޔާތު ލައިވްވެސް ކޮށްފައިނުވާއިރު، އެ ރަސްމިއްޔާތު ފެށުމުގެ ގޮތުން ގުރުއާނުގެ އާޔަތެއް ކިޔާލުމުން ވެސް އެ ޗެނަލްތަކުން އެ ރަސްމިއްޔާތު ސިފަކުރީ އެއީ މުބާރާތުގެ ތާރީހުގައި ވެސް ފެނުނު އެންމެ ފެންވަރު ދަށް ރަސްމިއްޔާތުގެ ގޮތުގައެވެ.

އެ ހުރިހާ ކަމަކުން ހުޅަނގުގެ ގައުމު ތަކުގެ ދެފުށް ދެގޮތް ކަން ހާމަވަމުންދާ ކަމަށް މުސްލިމުންގެ އިތުރުން ޣައިރު މުސްލިމުން ވެސް އަންނަނީ ބުނަމުންނެވެ.