މިއީ އިންޑިއާ ސަރުކާރުން ބުނެގެން ކުރި ހަރާމް ހުކުމެއް؛ ހުރިހާ ސަޕޯޓަރުން މާލެ އަރާ: އިދިކޮޅު

ކުރީގެ ރައީސުލްޖުމްހޫރިއްޔާ އަދި އިދިކޮޅު އިއްތިހާދުގެ ލީޑަރު ރައީސް ޔާމީނުގެ މައްޗަށް ދައުވާކޮށްފައިވާ އާރަށް މައްސަލާގައި ރިޝްވަތު ގަބޫލުކުރުމުގެ ކުށާއި، މަނީ ލޯންޑަރިންގެ ކުށް އެމަނިކުފާނުގެ މައްޗަށް ސާބިތުވާ ކަމަށް މިއަދު ކްރިމިނަލް ކޯޓުން ނިންމި ނިންމުމާއި ދެކޮޅަށް އެމަނުކުފާނުގެ ހުރިހާ ސަޕޯޓަރުން ނުކުތުމަށް އިދިކޮޅު ޕީޕީއެމް ޕީއެންސީ ކޯލިޝަނުން ގޮވާލައިފިއެވެ.

ރައީސް ޔާމީނުގެ މައްޗަށް ދެ ދައުވާ ސާބިތުވެއްޖެކަމަށް ކުރިމިނަލް ކޯޓުން މިއަދު ކަނޑައެޅުމާ ގުޅިގެން ދައުލަތުން އަދަބާމެދު ވާހަކަދައްކަމުން އެދިފައިވަނީ އެމަނިކުފާނުގެ މައްޗަށް 19 އަހަރުގެ ޖަލު ހުކުމެއް އިއްވުމަށެވެ. އެގޮތުން ރައީސް ޔާމީނުގެ މައްޗަށް ރިޝްވަތު ގަބޫލުކުރުމުގެ ކުށް ސާބިތުވުމާ ގުޅިގެން އެމަނިކުފާނުގެ މައްޗަށް 8 އަހަރުގެ ޖަލު ހުކުމެއް އިއްވުމަށް ދައުލަތުން އެދުނެވެ. އަދި މަނީ ލޯންޑަރިންގެ ކުށް ސާބިތުކުރުމާ ގުޅިގެން 11 އަހަރުގެ ޖަލު ހުކުމެއް އިއްވުމަށް އެދިފައިވެއެވެ.

މިކަމާއި ގުޅިގެން އިދިކޮޅު ކޯލިޝަންގައި ހިމެނޭ ޕީއެންސީންގެ ރައީސް އަބްދުއްރަހީމް (އަދުރޭ) ވިދާޅުވީ މިއަދު ރައީސް ޔާމީންގެ މައްޗަށް އިއްވި ހުކުމަކީ އިންޑިއާ އަޑީގައި އޮވެ މާކުރިއްސުރެން ރާވައިގެން ކޮށްފައިވާ، ހަރާމް ހުކުމެއް ކަމަށެވެ. އަދި އެހުކުމާއި ދެކޮޅަށް ހުރިހާ ސަޕޯޓަރުން ވެސް ނުކުތުމަށް އޭނާ ވަނީ ގޮވާލާފައެވެ.

"އަޅުގަނޑުމެން މިފަހަރު މި ނުކުންނަނީ ދެ އެތިން އެކައްޗަށް. އަތޮޅުތަކުގައި ތިއްބެވި އަޅުގަނޑުމެންގެ ސަޕޯޓަރުންނަށް ދަންނަވާލަން ބޭނުންވަނީ. ލަސް ނުކުރައްވައި ފުރާވަޑައިގެން މާލެ ވަޑައިގެންނަވާށޭ. ރައީސް ޔާމީން ސަލާމަތް ކުރަން ޖެހެޔޭ."

"މިއީ 9 ޖަހާއިރު ތާވަލް ކުރި ޝަރީއަތް 11 ޖަހަންދެން ލަސްކުރީ ކީއްވެގެންކަން މި އެނގުނީ ދެންމެ އަޅުގަނޑުމެންނަށް އިވިގެން އެ ދިޔަ ހުކުމުން. އިންޑިއާ އިން ބޭނުންވި ގޮތަށް ހުކުމް އެ ބަދަލު ކުރީ. މިއީ އިންސާފުވެރި ހުކުމެއް ނޫން. މިއީ ނަހައްގު ހުކުމެއް. މިއީ ހަރާމް ހުކުމެއް. މި ހުކުމް ޕީޕީއެމް ޕީއެންސީ އަކުން ބަލައެއް ނުގަންނަން. އެންމެ ފުރަތަަމަ ކަމަކަށް އެވާހަކަ ދަންނަވާލަން ބޭނުންވަނީ." އަދުރޭ ވިދާޅުވިއެވެ.

އަދުރޭ ވަނީ ރައީސް ޔާމީން ހުންނެވީ "ގަދަކޮށް" ކަމަށާއި, އެމަނިކުފާނާއި ދެކޮޅަށް ކުރި ހުކުމާއި ގުޅިގެން ސަޕޯޓަރުން އެއްވެސް ވަރަކަށް މާޔޫސް ނުވުމަށް އެމަނިކުފާނު އެދިވަޑައިގަންނަވާ ކަމަށެވެ. އަދި ރައީސް ޔާމީންގެ އެދުމަކީ އެމަނުކުފާނުގެ ސަޕޯޓަރުން ކުރިއަށްވުރެ ވަރުގަދައަށް ނުކުމެ ވަޑައިގެން އިންސާފު ހޯދައި ގައުމު ސަލާމަތް ކުރުމުގެ މަސައްކަތް އެންމެހާ ފަރާތްތަކުން ކުރުން ކަމަށްވެސް އޭނާ ވިދާޅުވިއެވެ.

މިއީ ރައީސް ޔާމީންނަކަށް ނޫނޑ މި ހުކުމް ކުރަނީ. ދިވެހިންނަށް މި ހުކުމް ކުރަނީ. ދިވެހިންގެ މިނިވަންކަން މި ގެއްލުވާލަނީ. އަޅުގަނޑުމެންގެ މާތްވެގެންވާ އިސްލާމް ދީނަށް މި ގޮންޖަހަނީ. އަޅުގަނޑުމެންގެ އެއްބައިވަންތަ ކުރާ ހުރިހާ ކަމެއް ނައްތާލަން މި ސަރުކަާރުން އިންޑިއާ އާއި ގުޅިގެން މި މަސައްކަތް ކުރަނީ.

ޕީއެންސީގެ ރައީސް އަބްދުއްރަހީމް

އެހެން ކަމުން، މި ދަނޑިވަޅުގައި އެންމެންވެސް ވިސްނުން އިސްކޮށް ޢަޒުމް ވަރުގަދަކޮށް، ކަމަށްވެސް އަދުރޭ ވިދާޅުވިއެވެ.

މިއާއެކު ރައީސް ޔާމީން އަކީ މައުސޫމް ބޭފުޅެއް ކަން ފާހަގަކުރައްވައި އަދުރޭ ވިދާޅުވީ, މިއަދު އެ މަނިކުފާނާއި ދެކޮޅަށް ހުކުމް ކުރި ނަމަވެސް މާދަމާ ގާނޫނު އެބޭފުޅުންނާއި އަރާ ހަމަކުރާނެ ކަމަށާ، 2023 ވަނަ އަހަރު ރައީސް ޔާމީން ވެރިކަމަށް ވަޑައިގަންނަވާނެ ކަމަށެވެ. އަދި އެންމެ ފަހުވަގުތާއި ޖެހެންދެންވެސް އިދިކޮޅުން ތިއްބަވާނީ އެމަނިކުފާނުގެ ފަހަތްޕުޅުގައި ކަމަށްވެސް އޭނާ ވިދާޅުވިއެވެ.

"ރައީސް ޔާމީން ހަރުގެއަށް ލިޔަސް އެއީ އަޅުގަނޑުމެންގެ ކެންޑިޑޭޓް. ޕީޕީއެމްގެ ސަޕޯޓެއް އެހެން އެއްވެސް ކެންޑިޑޭޓަކަށް ނުދޭނަމޭ. ނުލިބޭނޭ. ވަރަށް ކެރިގެން މިދަންނަވަނީ." އަދުރޭ ވިދާޅުވިއެވެ.