އައްޑޫ ސިޓީ ހިތަދޫން 500 ގޯތި ދޫކުރަން އިއުލާނުކޮށްފި

އައްޑޫ ސިޓީ ހިތަދޫން 500 ގޯތި ދޫކުރަން އިއުލާނުކޮށްފިއެވެ.

އައްޑޫ ހިތަދޫން ގޯތި ދޫކުރަން ރޭ 11:30 އެހާއިރު ގެޒެޓް ކޮށްފައިވާއިރު، އެރަށުން ދޫކުރަނީ 1500 އަކަފޫޓުގެ ގޯއްޗެވެ.

އަދި އެ 500 ގޯތީގެ ތެރެއިން 450 ގޯތި ހާއްސަކޮށްފައިވަނީ ހިތަދޫ ރައްޔިތުންނަށެވެ. އަދި 50 ގޯތި ހާއްސަކުރީ އައްޑޫ ސިޓީ އެހެން ރަށްރަށުގެ މީހުންނަށެވެ.

އައްޑޫ ސިޓީ ހިތަދޫން 500 ގޯތި ދޫކުރަން އިއުލާން ކޮށްފައިވާއިރު، އެ ސިޓީގެ ހުޅުދޫއިން 2،000 އަކަފޫޓުގެ 100 ގޯތި، މީދޫއިން 2،000 އަކަފޫޓުގެ 100 ގޯތި އަދި ފޭދޫއިން 1،500 އަކަފޫޓުގެ 300 ގޯތި ދޫކުރާކަން މިމަހު 24 ވަނަ ދުވަހު ވަނީ އިއުލާންކޮށްފަ އެވެ.

ފޭދޫއިން ދޫކުރާ 300 ގޯތީގެ ތެރެއިން 90 ޕަސެންޓް، 270 ގޯތި ފޭދޫގެ ރައްޔިތުންނަށް ދިނުމަށް ހަމަޖެހިފައިވާ އިރު، 30 ގޯތި ދޫކުރަނީ ފޭދޫ ފިޔަވައި އައްޑޫގެ އެހެން ރަށްތަކުގެ ރައްޔިތުންނަށެވެ.

މީދޫ އިން ދޫކުރާ 100 ގޯތީގެ ތެރެއިން 90 ގޯތި އަދި ހުޅުދޫއިން ދޫކުރާ 90 ގޯތި އެ ރަށްތަކުގެ ރައްޔިތުންނަށް ދޭއިރު މީދޫއިން 10 ގޯތި އަދި ހުޅުދޫއިން 10 ގޯތި ދެނީ އެހެން ރަށްތަކުގެ ރައްޔިތުންނަށެވެ.