ލިޓަންގެ މަރުގެ މައްސަލައިގައި ނިޒާމްގެ މައްޗަށް 3 ހުކުމެއް

މިދިޔަ ޑިސެމްބަރ މަހު ވީނުވީ އެއް ނޭނގި ގެއްލުނު ބަންގްލަދޭޝްގެ ރައްޔިތެއް ކަމަށްވާ މުހައްމަދް ލިޓަންގެ ގެ މައްސަލައިގައި އޭނާ އާއި އެކު ގެއްލުނު ކަމަށް ބަލައި ހޯދި ގދ ތިނަދޫ މަނާރް، މުހައްމަދް ނިޒާމް ގެ މައްޗަށް ތިން ދައުވާ އެއް އުފުލުމަށް މަސައްކަތް ކުރަމުންދާ ކަމަށް ޕްރޮސިކިޔުޓާ ޖެނެރަލް ހުސެއިން ޝަމީމް ވިދާޅުވެއްޖެއެވެ.

ޝަމީމް މިހެން ވިދާޅުވީ މިއަދު ޕީޖީ އޮފީހުން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުންނެވެ. ޕީޖީ ޝަމީމް ވިދާޅުވީ ނިޒާމުގެ މައްޗަށް ގަސްތުގައި މީހަކު މެރުމާއި، ވައްކަމާއި، މަސްތުވާތަކެތީގެ މުއާމަލާތު ކުރުމުގެ ކުށުގެ ދައުވާ ކުރުމަށް ތައްޔާރުވަމުން އަންނަ ކަމަށެވެ.

މިގޮތުން ނިޒާމު ދައްކާފައި ހުރި ވާހަކަތަކުގެ އިތުރުން އެހެން ހެކިތަކުން ވެސް ޤަބޫލު ކުރެވެނީ އޭނާގެ ޢަމަލަކުން ލިޓަން މަރުވިކަމަށެވެ. އަދި މީގެ އިތުރުން މިމައްސަލައާއި ގުޅުންހުރި ތެޔޮ ބޯޓުގައި ހުރި ފައިސާ ވަގަށް ނެގިކަމުގެ ތުހުމަތު ނިޒާމުގެ މައްޗަށް ކުރެވޭ ކަމަށާއި އެކަމަށް ބާރު ލިބިދޭ ހެކިވެސް ލިބިފައިވާ ކަމަށް ޕީޖީ ޝަމީމް ވިދާޅުވިއެވެ. މީގެ އިތުރުން ނިޒާމު ހައްޔަރުކުރި އިރު، ނިޒާމުގެ އަތުގައި މަސްތުވާތަކެތި ހުރި ކަން ވެސް ޝަމީމް ފާހަގަކުރެއްވިއެވެ.

"އަޅުގަނޑުމެން ކޯޓުގައި ސާބިތުކޮށްދޭނަން އޭނާ އެކުރި ކަމަކީ މީހަކު މަރުވެދާނެ ކަމެއްކަން, އަދި އެއީ އެހެން ނަތީޖާއެއް ނުނިކުންނަކަމެއްކަން." ޝަމީމް ވިދާޅުވިއެވެ.

ލިޓަން އާއި ނިޒާމް ތެޔޮ ބޯޓެއްގައި ކަނޑުމައްޗަށް ނިކުމެ އުޅެނިކޮށް ހަބަރެއް ނުވެގެން އެ މީހުން ހޯދަން ފެށީ ޑިސެމްބަރުމަހުގެ 28 ވަނަ ދުވަހުއެވެ. އަދި އެމީހުން ހޯދަމުންދަނިކޮށް ދެ މީހުން ދަތުރުކުރި ތެޔޮބޯޓު ވަނީ ކ. ހުޅުލެ ނެރު ކައިރިން ފެނިފައެވެ. އަދި ގެއްލުނުކަމަށް ބުނާ ނިޒާމް މާލެއިން ފެނިގެން ފުލުހުން އޭނާ ހައްޔަރުކުރީ ޖެނުއަރީމަހުގެ 3 ވަނަ ދުވަހުއެވެ. އެނާ ހައްޔަރުކުރީ މާލެގެ ގެސްޓް ހައުސްއަކުންނެވެ.

ނިޒާމް ފެނުމުގެ އެއް ދުވަސް ކުރިން ކާކުކަން ނޭނގޭ މީހެއްގެ ހަށިގަނޑެއް ވ. އަތޮޅު ކަނޑުމަތިން ވަނީ ފެނިފައެވެ. ނަމަވެސް އެ ހަށިގަނޑުގެ ޑީއެންއޭ ޓެސްޓު ހެދުމަށް ފަހު ފުލުހުން ވިދާޅުވެފައިވަނީ އެއީ ލިޓަންގެ ހަށިގަނޑު ނޫން ކަަމަށެވެ.