ފަލާހާއި ބައްދަލުކުރިޔަސް ނުފޫޒު ނުފޯރުވޭނެ: ޝަމީމް
ރައްޔިތުން މަޖިލީހުގެ މާފަންނު ހުޅަނގު ދާއިރާގެ މެމްބަރު އަހްމަދު ފަލާހާއި ބައްދަލު ކުރެއްވި ކަމަށާއި ނަމަވެސް އެމަނިކުފާނުގެ މައްޗަށް ނުފޫޒު ނުފޯރުވެވޭނެ ކަމަށް ޕްރޮސިކިޔުޓާ ޖެނެރަލް ހުސެއިން ޝަމީމް ވިދާޅުވެއްޖެއެވެ.
މިއަދު ޕީޖީ އޮފީހުން ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު މެމްބަރު ފަލާހާއި ބައްދަލުކުރެއްވިންތޯ ކުރި ސުވާލަށް ޖަވާބުދެއްވަމުން ޕީޖީ ޝަމީމް ވިދާޅުވީ މީހުންނާއި ބައްދަލު ކުރަން އޮންނަ އުސޫލުގެ ދަށުން މެމްބަރު ފަލާހާއި ބައްދަލު ކުރެއްވެވި ކަމަށެވެ.
"އެހެން ބޭފުޅުންނާވެސް ބައްދަލުކުރަން. ބައްދަލުކުރަން ބޭފުޅަކު ރިކުއެސްޓު ކުރީމަ އެކަންކުރާ ވަކި އުސޫލެއް އޮވޭ" ޝަމީމް ވިދާޅުވިއެވެ.
ޕީޖީ ޝަމީމް ވިދާޅުވީ މީހަކު ޕީޖީ އާއި ބައްދަލުކުރަން ބޭނުން ވާނަމަ އެކަމަށް އެދި ހުށައަޅަންޖެހޭ ފޯމެއް އޮންނަ ކަމަށާއި، އެފޯމު ފުރައި ހުށަހެޅުމުން އެމީހަކާއި ބައްދަލުކުރައްވާ ކަމަށެވެ. އަދި އެބައްދަލު ވުމެއްގައި ދެކެވޭ ވާހަކަތައް އެފޯމުގައި ލިޔެވިފައި ހުންނާނެ ކަމަށް ޝަމީމް ވިދާޅުވިއެވެ.
ނޫސްވެރިންގެ ބައްދަލުވުމުގައި ޝަމީމްއާއި މިގޮތަށް ސުވާލު މިކުރެވުނީ މެމްބަރު ފަލާހުގެ ދަރިފުޅު މަސްތުވާ ތަކެތީގެ މައްސަލައެއްގައި ހައްޔަރު ކޮށް ކޯޓަށް ހާޒިރު ނުކޮށް ފަލާހުގެ ދަރިފުޅު ދޫކޮށްލައިފައި ވާ ދަނޑިވަޅެއްގައެވެ.
ނޫސްވެރިންގެ ބައްދަލުވުމުގައި ޕީޖީ ޝަމީމާއި މި ސުވާލު ކުރިމަތި ކުރެވުމުން ޝަމީމް އިތުރަށް ވިދާޅުވީ މީހަކާއި ބައްދަލުކުރި ނަމަވެސް އޭނާއަށް ނުފޫޒު ނުފޯރުވޭނެ ކަމަށާއި، ދައުވާ ކުރަން ނިންމިއަސް، އަދި ނުކުރަން ނިންމިއަސް އެކަން ލިޔުމުން ފެންނަން އޮންނާނެ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
