ރައީސް ޔާމިނުގެ މެސެޖެއް: މީ ހުއްބުލް ވަތަން އިސްކޮށް ޕީޕީއެމަށް ވޯޓުދޭ ފަހަރުކަމުގައި ހައްދަވާ!
ކުރިއަށް އޮތް ރިޔާސީ އިންތިޚާބުގައި ވޯޓުދެއްވާއިރު، ސިޔާސީ ޅިޔާލު ތަފާތުވުންތައް އެއް ފަރާތްކޮށް ޤައުމީ ވިސްނުން އިސްކުރުމަށް ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމު އިލްތިމާސް ކުރައްވައިފި އެވެ.
ރައީސް ޔާމިނުގެ އެ އިލްތިމާސް ރައްޔިތުންނާއި ހަމަޔަށް ހިއްސާކުރައްވާފައި ވަނީ ރައީސް ޔާމިނުގެ ކެމްޕޭނު މެނޭޖަރު ކެޕްޓަން މުހައްމަދު އަމީނު އާދިއްތަ ދުވަހު ބޭއްވި ޕްރެސް ކޮންފަރެންސްގަ އެވެ.
ކެޕްޓަން އަމީން ވިދާޅުވީ ކުރިއަށް އޮތް ރިޔާސީ އިންތިޚާބުގައި ވާދަކުރައްވާ، އިންތިޚާބު ކާމިޔާބުކުރައްވާ ގައުމަށް ލިބުނު ގެއްލުން އަނބުރާ އިޔާދަކުރައްވާނެކަމަށް އެމަނިކުފާނު ވިދާޅުވާކަމަށެވެ.
އެމަނިކުފާނު ބޭނުންފުޅުވަނީ ރާއްޖޭގެ ދެކުނުން ވިއްކާލި މަސްކަނޑު އަނބުރާ ހޯއްދުވުމާއި، ރައްޔިތުންގެ ހާލަތު ރަނގަޅު ކުރެއްވުމަށް ގައުމުގެ އިގްތިސާދު ކޮޅަށް ޖެއްސެވުމަށް މަސައްކަތް ކުރެއްވުމާއި، ރާއްޖޭގައި ތިބި އިންޑިއާ ޖާސޫސުންނާއި ސިފައިން ބޭލުމަށްކަން އެމަނިކުފާނުގެ މެސެޖުގައި ފާހަގަކުރެއްވި އެވެ.
އެއާއެކު އެމަނިކުފާނު ވަނީ މި ރިޔާސީ އިންތިޚާބުގައި ދީނާއި ގައުމު އިސްކޮށް ވޯޓުދެއްވުމަށް ރައްޔިތުންނަށް އިލްތިމާސް ކުރައްވާފަ އެވެ.
ރައީސް ޔާމިނުގެ އެ ޚާއްސަ މެސެޖާއެކު ކެޕްޓަން އަމީނު ވަނީ ރައީސް ޔާމިނުގެ ކެމްޕޭނުގެ މަސައްކަތްތަކާއި ގުޅޭ މުހިންމު މައުލޫމާތުތައް ވެސް ހިއްސާކުރައްވާފަ އެވެ.
އެގޮތުން މި އީދު ބަންދަށް ފަހު ޕީޕީއެމްގެ ރިޔާސީ މެނެފެސްޓޯ ރަސްމީކޮށް އިއުލާނުކޮށް، ރައީސް ޔާމިނުގެ ކެމްޕޭނު މުޅި ރާއްޖޭގައި ފައްޓަވާނެކަމަށް ކެމްޕޭނު މެނޭޖަރު ވިދާޅުވި އެވެ. އަދި އެކަމަށްޓަކައި ވާން ޖެހޭ ހުރިހާ ތައްޔާރީތަކާއި އިދާރީ މަސައްކަތްތައް ނިމިފައިވާކަމަށް ކެމްޕޭނު މެނޭޖަރު ވަނީ ވިދާޅުވެފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
