މިދިޔަ 5 އަހަރު ރައީސަކީ ކާކުކަން އޮޅޭ ހިސާބަށް ދިޔަ: އަލީ ހުސެއިން
މިދިޔަ 5 އަހަރު ރައީސުލްޖުމްހޫރިއްޔާ އަކީ ކާކުކަން އޮޅޭ ހިސާބަށް ކަންކަން ބޮއްސުންލައިގެން ދިޔަކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސެއިން ވިދާޅުވެއްޖެ އެވެ.
އަލީ ހުސެއިން މިފަދައިން ވިދާޅުވެފައި ވަނީ ޖުމްހޫރީ ޕާޓީގެ ރިޔާސީ ކެންޑިޑޭޓު އަދި ޕާޓީގެ ލީޑަރު ޤާސިމް އިބްރާހިމް އދ ދިގުރަށަށް ކުރެއްވި ރިޔާސީ ކެމްޕޭނު ދަތުރުފުޅުގައި ބޭއްވި ޖަލްސާއެއްގައި ވާހަކަދައްކަވަމުން ނެވެ.
އެގޮތުން އޭނާ ވިދާޅުވީ މި ހިނގާ ފަސް އަހަރުގައި ރައީސުލްޖުމްހޫރިއްޔާ އަކީ ކާކުކަން އޮޅޭ ހިސާބަށް ކަންކަން ގޮސްފައިވާ ކަމަށެވެ. އެގޮތުން ރައީސުލްޖުމްހޫރިއްޔާގެ މަސްއޫލިއްޔަތުތަކާއި ޒިންމާތައް ވަޒީރުންނާއި، ކުންފުނިތަކުގެ މެނޭޖިން ޑިރެކްޓަރުން ވެސް ނަންގަވަމުން ގޮސްފައިވާ ކަމަށާއި، ރައީސުލްޖުމްހޫރިއްޔާ ހުންނެވީ އެ ބާރުތައް ވާނެ ގޮތެއްވާން ދޫކޮށްލައިގެން އަޅާ ނުލައްވާ ކަމަށް އަލީ ހުސެއިން ވިދާޅުވި އެވެ.
"މިދިޔަ 5 އަހަރު މި ވާ ގޮތަކީ، އިންޖީނުގެއަކާއި ބެހޭ ކަމެއް ވެއްޖެއްޔާ ރައީސުލްޖުމްހޫރިއްޔާ އަކީ ފެނަކައިގައި ހުންނަވާ އެމްޑީ. ޚާރިޖީ ކަމަކާއި ގުޅޭ ކަމެއް ވެއްޖެއްޔާ ރައީސުލްޖުމްހޫރިއްޔާ އަކީ ޚާރިޖީ ވަޒީރު. އިކޮނޮމިކް ކަމާއި ބެހޭ ކަމަށް ވަންޏާ، އިޤްތިޞާދީ ކަމަކާއި ބެހޭ މައްސަލައެއް ވެއްޖެއްޔާ ހީވަނީ ރައީސުލްޖުމްހޫރިއްޔާ އަކީ އިކޮނޮމިކް މިނިސްޓަރުހެން. އެހެންވީމަ ރައީސުލްޖުމްހޫރިއްޔާ އަކީ ކާކުކަން އޮޅޭ ހިސާބަށް ހަގީގަތުގައި ކަންކަން ވަނީ ގޮސްފައި. އަޅާނުލައްވާ ހުރީ"
މެމްބަރު އަލީ ހުސެއިން
އެކަން ފާހަގަކުރައްވާ އަލީ ހުސެއިން ވިދާޅުވީ މި ރިޔާސީ އިންތިޚާބުގައި ރައީސުލްޖުމްހޫރިއްޔާގެ ޒިންމާ އަދާކުރައްވާނެ ބޭފުޅަކު އައްޔަންކުރުން މުހިންމު ކަމަށެވެ.
9 ސެޕްޓެމްބަރުގައި ލަާ ވޯޓަކީ ހަމައެކަނި ވެރިއަކު އައްޔަންކުރާ ލާ ވޯޓެއް ނޫން ކަމަށާއި، އެއީ މި ގައުމުގައި ދެން އުފައްދާނީ ދިވެހިންގެ ސަރުކާރެއް ތޯ ނޫނީ ބައެއްގެ ގޮނޑިކޮއްކޮ ސަރުކާރެއް ނިންމާނެ ވޯޓެއްކަމަށް އަލީ ހުސެއިން ވިދާޅުވި އެވެ.
އެކަން ފާހަގަކުރައްވާ އޭނާ ވިދާޅުވީ ރިޔާސީ އިންތިޚާބުގައި މީހަކަށް ވޯޓުލާއިރު، އެމީހަކު ނިސްބަތްވާ ސިޔާސީ ޕާޓީގެ ބޮޑު ކުޑަމިނާއި، ތައުލީމަށް ބެލުމަށްވުރެ މުހިންމީ ރައްޔިތުންނާއި ގުޅޭ، ރައްޔިތުން ގޮވައިގެން މަސައްކަތް ކުރެވޭނެ ލީޑަރަކު އައްޔަންކުރުން ކަމަށެވެ.
އެ އުސޫލުން ބަލާއިރު، އެ ގާބިލުކަން ހުރި ކެންޑިޑޭޓަކީ ޖުމްހޫރީ ޕާޓީގެ ލީޑަރު ޤާސިމް އިބްރާހިމް ކަމާއި މެދު ޝައްކު ނުކުރައްވާކަމަށް އަލީ ހުސެއިން ވަނީ ވިދާޅުވެފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
