ގާސިމް ފިޔަވައި އިތުރު ބޭފުޅަކު ރައީސުލްޖުމްހޫރިއްޔާ ކަމަށް ގެންނަން ވިސްނަންވީވެސް ކީއްވެތޯ: ޑރ. ވަހީދު

ޖުމްހޫރީ ޕާޓީގެ ލީޑަރު އަދި ރިޔާސީ ކެންޑިޑޭޓް ގާސިމް އިބްރާހިމް ފިޔަވައި އެހެން އެއްވެސް ކެންޑިޑޭޓަކު ވެރިކަމަށް ގެނައުމަށް ދިވެހި ރައްޔިތުން ވިސްނަންވީވެސް ކީއްވެތޯ، ކުރީގެ ރައީސް ޑރ. މުހައްމަދު ވަހީދު ސުވާލުކުރައްވައިފި އެވެ.

ރިޔާސީ ކެމްޕެއިނަށް ޖުމްހޫރީ ޕާޓީގެ ލީޑަރާއި ޓީމުން އދ. ދިގުރަށަށް ކުރެއްވި ދަތުރުފުޅުގައި އެ ރަށު ރައްޔިތުންނާ ބައްދަލު ކުރައްވާ ވާހަކަ ދައްކަވަމުން ރައީސް ޑރ. ވަހީދު ވިދާޅުވީ، ރައީސުލްޖުމްހޫރިއްޔާގެ މަގާމު އަދާކުރުމުގެ ގާބިލްކަން ނެތް މީހަކަށް އެ މަގާމު ދީފި ނަމަ ކަންކަން ވާނެގޮތް ހުރިހާ ދިވެހި ރައްޔިތުންނަށް ވެސް މިހާރު އެނގޭނެ ކަމަށެވެ. އަދި އެހެން ދެވަނަ ފަހަރަށް ވާން، ދިވެހި ރައްޔިތުން ބޭނުން ނުވާނެ ކަމަށްވެސް ޑރ. ވަހީދު ވިދާޅުވިއެވެ.

މިއާއެކު ޑރ. ވަހީދު ވިދާޅުވީ، ގާސިމަކީ ހުރިހާ ގޮތަކުންވެސް ރަނގަޅު، މަސައްކަތްތެރި އަދި ތަޖުރިބާކާރު ބޭފުޅެއް ކަމަށެވެ.

އަޅުގަނޑުމެންނަށް ވަރަށް ސާފުކޮށް ފެންނަން އެބަހުރި، ގާސިމް އަކީ ހުރިހާ ރޮނގަކުން ވެސް، ގައުމަށް ބޭނުންވާ ހުރިހާ ރޮނގަކުން ވެސް، މަސައްކަތް ކުރައްވާފައިވާ، ތަޖުރިބާކާރު ބޭފުޅެއް. އެކަން (ވެރިކަން) ކުރުމުގެ ގާބިލުކަން އެބަހުރި އެބޭފުޅާގެ. އެ ދެން ކީއްވެގެންތޯ އަޅުގަނޑުމެން އެހެން ބޭފުޅަކަށް ވިސްނަންވެސް ޖެހެނީ. އަޅުގަނޑު ގަބޫލުކުރާ ގޮތުގައި، ހަގީގަތުގައި މިފަހަރު، ރައީސުލްޖުމްހޫރިއްޔާ ކަމުގެ މަގާމަށް ގެންނަން ވިސްނަންޖެހޭ އެހެން އެއްވެސް ކެންޑިޑޭޓެއް ނެތް.

ޑރ. މުހައްމަދު ވަހީދު

ޑރ. ވަހީދު ވިދާޅުވީ، އެމަނިކުފާނު ވެސް ރައީސުލްޖުމްހޫރިއްޔާ ކަމުގެ މަގާމުގައި 2 އަހަރެއްހާ ދުވަހު ހުންނެވި ކަމަށާ، އެއީ ވަރަށް އުނދަގޫ ކަމެއް ކަމަށެވެ. އަދި "އެއީ ކޮންމެ ކޮންމެ މީހަކު ކުރަން އުޅޭ ވަރުގެ ކަމެއް ނޫން" ކަމަށްވެސް އެމަނިކުފާނު ވިދާޅުވި އެވެ. އެހެންކަމުން ވެރިކަން ކުރުމަކީ ކޮންމެ ކޮންމެ މީހަކަށް ކުރެވިދާނެ ކަމެއް ކަމަށް ހީކޮށްގެން ނުވާނެ ކަމަށް ޑރ. ވަހީދު ވިދާޅުވިއެވެ.

އަޅުގަނޑަށް ޔަގީން، ގާސިމް އެކަން ( ވެރިކަން ) ކޮށްދެއްވަން ހުރިއްޔާ ގާސިމް ވަރުގެ ބޭފުޅެއް ނެތް ކަން. މިހާރު (ގާސިމް) ވަނީ ކުރިމަތި ލާފައި. އޭގެ މާނަ އަކީ ގާސިމް ހުންނެވީ އެކަން ކޮށްދެއްވާށޭ. އެހެންވީމާ އެކަމާ ކުރިމަތިލާފައި ހުރީމާ، އަޅުގަނޑުމެން ޖެހޭނެ އެކަމަށް ޝުކުރުވެރިވާން. އަޅުގަނޑުމެން ޝުކުރުވެރި ވުމަކީ ގާސިމަށް އަޅުގަނޑުމެން ވޯޓު ދިނުން.

ޑރ. މުހައްމަދު ވަހީދު

އެހެން މ، ޖުމްހޫރީ ޕާޓީގެ އިތުރުން ހުރިހާ ޕާޓީއެއްގެ ބޭފުޅުންވެސް، އެ އެންމެހައި ކަންކަމާއި މެދު ވިސްނަވާ، ގާބިލު ބޭފުޅަކަށް ވޯޓު ދެއްވުމަށް ޑރ. ވަހީދު ވަނީ އެދިލައްވާފައެވެ.