މަސްވެރިންނަށް ދިމާވެފައިވާ މައްސަލަތައް ހައްލުކޮށްދިނުމަށް ގޮވާލާ ކުއްލި މައްސަލައެއް!

މަސްވެރިކަން ތިޔާގިވެފައިވާ މޫސުމުގައި މަސްވެރިންނަށް ކުރިމަތިވަމުންދާ މައްސަލަތައް ހައްލުކޮށްދިނުމަށް ސަރުކާރަށް ގޮވާލާ ރައްޔިތުންގެ މަޖިލީހަށް ކުއްލި މައްސަލައެއް ހުށައަޅުއްވައިފިއެވެ.

މަޖިލީހަށް މި މައްސަލަ ހުށައަޅުއްވާފައިވަނީ ނައިފަރު ދާއިރާގެ މެމްބަރު އަހުމަދު ޝިޔާމެވެ.

ޝިޔާމު ހުށައެޅުއްވި މަސްލައިގަވަނީ މަސްވެރިކަން ތިޔާގިވެފައިވާ ދުވަސްވަރު މަސް ކިރާ މިންވަރު ލިމިޓުކޮށްފައިވާތީއާއި، މަސްވެރިން ބާނާ މަސްކޮޅު ކިރަން އެތައް ދުވަހެއް ކިއުގައި މަޑުކުރަންޖެހޭކަން ފާހަގަކުރައްވާފައެވެ.

ބައެއް ދޯނިތަކުން ބާނާ މަހުގެ 90 އިންސައް މަހަށް ލިބެންޖެހޭ އަގު ނުލިބި ބަހައިލަންޖެހިފައިވާ ކަމަށާއި މަސްވެރިންނަށް ރަނގަޅު އަގެއްގައި އައިސްވެސް ނުލިބުމުގެ އިތުރުން، އައިސް ކިޔުއާއި ތެޔޮ ކިޔުއާއި މަސްކިޔުގައި ރެއާއި ދުވާލު މަސްވެރިން ތިބެންޖެހުމުގެ ސަބަބުން ގޮތް ހުސްވެފައިވާކަމަށް އެ މައްސަލައިގައި ބަޔާންކޮށްފައިވެއެވެ.

އެކަން ފާހަގަކުރައްވާ ޝިޔާމު ވިދާޅުވީ ތިން ކިއުގައި މަސްވެރިން މަޑުކުރަންޖެހޭ ދުވަސްތައް ގިނަވެ، މަސްވެރިން ބާނާ މަހަށް އެކަށީގެންވާ އަގެއް ނުލިބުމުގެ ސަބަބުން ދޯނީގެ ޚަރަދުތައް ހަމަޖައްސަން ދަތިވެފައިވާކަމަށެވެ. އަދި އެހާ ދުވަހު ކިއުގައި މަޑުކުރަންޖެހުމުން މަސްވެރިން ބާނާ މަސް ހަލާކުވެ ކިރޭ ގޮތް ނުވާ ކަމަށެވެ.

އޭގެ އިތުރުން އެ ކުއްލި މައްސަލައިގައި ވަނީ މަސްވެރިން އުފުލަމުންދާ ތަކުލީފުތަކަކީ މަސްވެރިކަން ތިޔާގިވާ ކޮންމެ މޫސުމެއްގައި ކުރިމަތިވާ މައްސަލަތައްކަމަށް ވިދާޅުވެފައެވެ. އަދި އެކަން އެނގޭއިރުވެސް މަސްވެރިކަން ތިޔާގިވާ ދުވަސްވަރުގައި އެ މައްސަލަތައް ހައްލުކުރަން ސަރުރާކަށް ތައްޔާރުނުވެވޭ ކަމަށާއި ވެރިކަމަށް އަންނަންވީ އެންމެ ބޮޑު ވައުދު ކަމުގައިވާ މަސްވެރިންނަށް ހަމަ އަގު ހޯދައިދިނުމަށް ސަރުކާރުން އެއްވެސް ކަމެއް ނުކުރާކަމުގެ ޝަކުވާ މަސްވެރިން ކުރަމުންދާ ކަމަށް ޝިޔާމު ވިދާޅުވިއެވެ.

މަސް ޕްރޮސެސްކުރާ ތަންތަން އެޅުމަށާއި، ގޭދޮށު މަސްކާރުޚާނާތައް އެޅުމާއި އައިސް ޕްލާންޓުތައް ޤާއިމުކުރުމުގައި އަމަލުކުރަންޖެހޭ އުސޫލުތައް މަސްވެރިކަމުގެ ޤާނޫނުގައި ތަފުސީލުކޮށް ބަޔާންކުރި ނަމަވެސް އެއިން އެއްވެސް ކަމެއް ތަންފީޒުނުކުރެވި އެކަންކަން ކުރުމުގެ އިޚުލާސްތެރި ނިޔަތެއް ސަރުކާރުގައި ނެތުމަކީ މަސްވެރިން އިތުރަށް މާޔޫސްވެފައިވާ ސަބަބެއް ކަމަށްވެސް ޝިޔާމު ވިދާޅުވިއެވެ.

އޭގެ އިތުރަށް މަސްވެރިން މޫސުމާ ދިމާކޮށް ރާއްޖޭގެ ސަރަހައްދަށް ވަންނަ ބޭރުގެ މަސްވެރި ބޯޓުތަކުގެ އަދަދު ކަންބޮޑުވާ މިންވަރަށް އިތުރުވަމުންދާކަން ފާހގަަކުރައްވައި، އެ ބޯޓުތަކުން ރާއްޖޭގެ ކަނޑުތަކުން ދާޖަހައިގެން މަސްވެރިކަން ފުޅާދާއިރާއެއް ކުރަމުންދާއިރު ފިޔަވަޅެއް ނޭޅޭކަމަށް ވިދާޅުވެ ޝިޔާމުގެ މައްސަލައިގައި ވަނީ ކަންބޮޑުވުން ފާޅުކޮށްފައެވެ.

އަދި އެ މައްސަލަތައް ވަގުތުން ވަގުތަށް ހައްލުކޮށްދެއްވުމަށްވެސް ޝިޔާމު ވަނީ ސަރުކާރަށް ގޮވާލައްވާފައެވެ.