ޓެކްސް ބޮޑުކުރުމަށް މަޓީ އާއި ގެސްޓްހައުސް އެސޯސިއޭޝަންގެ ތާއީދެއް ނެތް

މި ދަނޑިވަޅުގައި، މުދަލާއި ހިދުމަތުގެ އަގުން ނަގާ ޓެކްސް ބޮޑުކުރުމަށް ތާއިދުނުކުރާ ކަމަށް މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) އާއި ގެސްޓްހައުސް އެސޯސިއޭޝަނުން ބުނެފިއެވެ.

ޓީޖީއެސްޓީއާއި ޖީއެސްޓީ ބޮޑުކުރުމަށް ސަރުކާރުން ހުށަހަޅާފައިވާ ބިލް މުޅި މަޖިލީހުގެ ކޮމެޓީން ދިރާސާ ކުރުމަށް ކަމާއިގުޅޭ ފަރާތްތައް ހާޒިރުކޮށް މައުލޫމާތު ސާފް ކުރުން މިއަދުގެ ކުރިއަށް ގެންގޮސްފައިވާއިރު، އެކަމާއި ގުޅޭގޮތުން މަޓީގެ ފަރާތުން ފޮނުވި ސިޓީ ވަނީ މަޖިލީހުގައި އިއްވާފައެވެ.

އެސިޓީގައި، މަޓީ އިން ވަނީ މި ދަނޑިވަޅުގައި ޓެކްސް ބޮޑު ކުރަން ތާއީދު ނުކުރާ ކަމަށް ބުނެފައެވެ. އޭގެ ސަބަބެއްގެ ގޮތުގައި މަޓީ އިން ބުނީ، ރާއްޖޭގެ ފަތުރުވެރިކަމުގެ ސިނާއަތް މިހާރު ވެސް އަންނަނީ އެކިއެކި ލޮޅުންތަކުން އަރައިގަތުމަށް މަސައްކަތް ކުރަމުން ކަމަށެވެ. އަދި ޓެކްސްއަށް އަންނަ ކޮންމެ ބަދަލެއް ތަންފީޒުކުރުމަށް އެންމެ މަދުވެގެން 12 މަސް ދުވަސް ދިނުމަށް ރައްޔިތުންގެ މަޖިލީހުގެ ރައީސް މިއަދުގެ ޖަލްސާގައި އިއްވި ސިޓީގައި މަޓީން ބުނެފައި ވެ އެވެ.

މީގެ އިތުރުން، ޓެކްސް ބޮޑު ކުރުމާއި ގުޅޭގޮތުން ގެސްޓު ހައުސް އެސޯސިއޭޝަންގެ ބޭފުޅުން ވެސް ވަނީ މިއަދު ކޮމިޓީއަށް ހާޒިރުކޮށްފަ އެވެ. އެގޮތުން ހާޒިރު ކޮށްފައިވަނީ ގެސްޓުހައުސް އެސޯސީއޭޝަންގެ ފައިނޭންޝަން ކޮންޓްރޯލާ ހަސަން އަލިމަނިކާއި އެސޯސިއޭޝަންގެ އެކްސްކޯ މެންބަރު އަހުމަދު ވަހީދެވެ.

ކޮމިޓީގައި ވާހަކަ ދައްކަވަމުން، ހަސަން އަލިމަނިކު ވިދާޅުވީ، ޓެކްސް ބޮޑު ކޮށްފިނަމަ، ގެސްޓްހައުސް ތަކަށް އޮތް ޑިމާންޑް 20 ނުވަތަ 25 ޕަސެންޓުން ޑީމާންޑު ދަށަށް ދާނެ ކަމަށެވެ. އެހެނީ ގެސްޓުހައުސް ވިޔަފާރީގައި ރާއްޖެގޭ އެންމެ ބޮޑު ކޮމްޕެޓިޓަރުންގެ ތެރޭގައި ހިމެނޭ ގައުމުތަކުން ނަގަނީ ކުޑަ ޓެކްސްއެއް ކަމަށް އޭނާ ވިދާޅުވިއެވެ.

"ގެސްޓުހައުސް ކޮމިއުނިޓީގަ ކޮންސާނެއް އެބެއް މީތި [ޓީޖީއެސްޓީ] ބޮޑުވެއްޖިއްޔާމު ފުދޭވަރަކަށް އިފެކްޓު ކުރާނެ ކަމަށް. އެއީ އެންމެ ކޮމްޕެޓިޓިވް މާކެޓަނަށް މީނި ބާލީއާއި ޕުކެޓު ތަންތަން، އެބޭފުޅުން ވަރަށް ބޮޑަށް މީތި [ޓީޖީއެސްޓީ] ކުޑަކޮށްގެން ކުރިއަށް ގެންދަނީ،" އަލިމަނިކު ވިދާޅުވި އެވެ.

މީގެ އިތުރުން ގެސްޓް ހައުސް އެސޯސިއޭޝަންގެ އެކްސްކޯ މެންބަރު އަހުމަދު ވަހީދު ވިދާޅުވީ، މި ވަގުތުގައި ޓެކްސް ބޮޑު ކޮށްފިނަމަ ގެސްޓް ހައުސްތަކަށް ބޮޑެތި ގެއްލުންތައް ވާނެ ކަމަށެވެ.

އެގޮތުން، ގެސްޓް ހައުސް އޭނާ ވިދާޅުވީ، މިހާރު ހުޅުމާލޭގެ ގެސްޓް ހައުސް ތަކުގެ އެވްރެޖް ރޭޓަކީ 49 ޑޮލަރު ކަމަށެވެ. އަދި އޮންލައިން ޕްލެޓްފޯމް ތަކުގައި އެ ރޭޓް އަޕްލޯޑް ކޮށްލުމަށްފަހު ޓެކްސް ކަނޑާލުމުން ޖެހެނީ 44 ޑޮލަރު ކަމަށެވެ. އަދި އެއިންވެސް 10 ޑޮލަރު ނުވަތަ 100 ރުފިޔާ އެއާރޕޯރޓް އިން ގެސްޓްހައުސް އަށް ގެނައުމަށް ހޭދަވާ ކަމަށާ، އެއީވެސް ހޭދަވާ އިތުރު ޚަރަދުކަމަށް އޭނާ ފާހަގަކުރެއްވިއެވެ.

ޚަރަދު ކަނޑާލީމާ އަޅުގަނޑުމެންނަށް ވަނީ ކަނޑައެޅިގެން ގެއްލުން. ދެން ވިދާޅުވާނެ ކީއްވެގެންތޯ އޮޕަރޭޓް ކުރަނީ. ޚާއްސަކޮށް ގްރޭޓަރ މާލެ އޭރިއާގެ ވާހަކަ މިދައްކަނީ. އަޅުގަނޑުމެންގެ ގެސްޓް ހައުސް އެއް ފެހެންދޫގައި ވެސް އެބަހުރި. އަޅުގަނޑުމެންނަށް ނުކުރެވިގެން ބަންދު ކުރާ ހިސާބުގައި އެ އޮތީ. އޭގެތެރެއިން ވަރަށް ގިނަ މައްސަލަ ތައް އެބަ ދިމާވޭ ޓްރާންސްޕޯޓް ކަނެކްޓިވިޓީ މައްސަލަ ވެސް.

ގެސްޓް ހައުސް އެސޯސިއޭޝަން އެކްސްކޯ މެންބަރު އަހުމަދު ވަހީދު

އެހެންކަމުން ޓީޖީއެސްޓީ 12 އިންސައްތަ އިން 16 އިންސައްތަ އަށް ބޮޑު ކުރުމުން، ލޯކަލް ޓޫރިޒަމަށް ވާނީ 100 އިންސައްތަ ގެއްލުން ކަމަށްވެސް އޭނާ ވިދާޅުވިއެވެ.

ގެސްޓް ހައުސް އެސޯސިއޭޝަނާއި މަޓީއިން ޓެކްސް ބޮޑު ކުރުމާއި ދެކޮޅަށް ވާހަކަ ދެއްކެވި ނަމަވެސް، ސަރުކާރަށް ތާއީދު ކުރައްވާ އެމްޑީީޕީ މެންބަރުން ވަނީ ޓެކްސް ބޮޑުކުރުމަށް ސަރުކާރުން ނިންމާފައިވާ ނިންމުން ދިފާއުކޮށް ވާހަކަދައްކަވާފައެވެ.