އާޖެންޓީނާ ބަލިކުރަން ސައުދީ ކުޅުންތެރިންނަށް ހިތްވަރު ލިބުނީ ކޯޗުދިން ވަރުގަދަ ސްޕީޗުން!

މިއަހަރުގެ ވޯލްޑް ކަޕްގައި ސައުދީ އަރަބިޔާއާއި އާޖެންޓީނާ ބައްދަލުކުރި މެޗަކީ ވަރަށް ގިނަ ބަޔަކު ސިއްސުވާލި މެޗެކެވެ. އާޖެންޓީނާގެ މައްޗަށް ސައުދީ ކުރި ހޯދާނެކަމަށް ކުޅިވަރު ދަންނަ އެއްވެސް މީހަކު ގަބޫލެއް ނުކުރެއެވެ. އެއީ ދުނިޔޭގެ މޮޅެތި ކުޅުންތެރިން ތިބުމާއެކު އާޖެންޓީނާއަކީ ވޯލްކަޕްގައި ފާހަގަކޮށްލެވޭ ގަދަ ޓީމަކަށް ވާތީއެވެ.

އެއާއެކު މެޗުގެ ފުރަތަމަ ހާފް އާޖެންޓީނާ ނިންމާލީ ސައުދިއަރަބިޔާ ކޮޅަށް ލަނޑެއް ޖަހާފައެވެ. އެ ލަނޑު ޖަހާފައިވަނީ ލިބުނު ޕެނަލްޓީއެއްގައި މެސީއެވެ. އެހެންކަމުން މާބޮޑު ޕްރެޝަރަކާއި ނުލާ ދެވަނަ ހާފުގައި އާޖެންޓީނާ ސައުދީ ޓީމު ބަލިކުރާނެކަމަށް ގިނަ ބަޔަކު ދެކުނެވެ.

އެހެން ނަމަވެސް ކަންވެސް ދިމާ އިދިކޮޅަށެވެ. ފެނުނީ ފުރަތަމަ ހާފާއި ޚިލާފަށް ސައުދީއިން ވަރުގަދަ ކުޅުމެއް ދެއްކި ތަނެވެ. އާޖެންޓީނާއަށް ބޮޑެތި ޕްރެޝަރުތައް ކުރިމަތިކޮށް، ސައުދީގެ ކުޅުން ތެރިންގެ ހޫނު ހަމަލާތައް އާޖެންޓީނާގެ ގޯލު ފޫއަޅުވާލާ އާޖެންޓީނާ ކޮޅަށް ދެ ގޯލު ޖެހި މަންޒަރެވެ.

މިއީ ވޯލްޑްކަޕް ބަލާ ފަރާތްތަކަށްވެސް ސިހުން ގެނުވި ތާރީހީ މެޗެކެވެ.

ސައުދީ ކުޅުންތެރިންގެ "އެޓިޓިއުޑް" އައި އެ ބަދަލާއި، އެ ކުޅުންތެރިން ދެއްކި ތަފާތުގެ އަސްލަކީ ހާފް ޓައިމްގައި ސައުދީ ކޯޗު ދިން ވަރުގަދަ ސްޕީޗުކަމުގައި ބައިނަލްއަގުވާމީ ކުޅިވަރު މީޑިއާތަކުން ވަނީ ރިޕޯޓުކޮށްފައެވެ.

މެސީގެ ޕެނަލްޓީއާއެކު މާޔޫސްވެފައިވާ ކުޅުންތެރިންނަށް ހިތްވަރު ދިނުމަށް ހާފް ޓައިމްގައި ސައުދީ ކޯޗު ހާވޭ ރެނާޑް ވަރަށް ވަރުގަދަ ސްޕީޗެއް ދީފައިވެއެވެ. އޭނާ ގެ ބޭނުމަކަށްވީ ކުޅުންތެރިންގެ ގާބިލްކަން މެޗުތެރެއިން ދައްކާލުމަށް ހޮތްވަރު ދިނުމެވެ. އާޖެންޓީނާއަކީ ސަޕޯޓަރުން ގިނަ އަދި މޮޅު ޓީމަކަށް ވީނަމަވެސް، އެ ޓީމު ބަލިކުރެވޭނެ ފެންވަރު ސައުދީ ކުޅުންތެރިންގެ ކިބައިކަން ހުރިކަން އެ ކުޅުންތެރިންނަށް އިހުސާސް ކޮށްދިނުމެވެ.

އެގޮތުން ހާފް ޓައިމްގައި ކުޅުންތެރިންނަށް މުޚާތަބުކޮށް ވާހަކަދައްކަމުން ހާވޭ ވަނީ ވޯލްޑްކަޕްއަށް ކުރި ދަތުރު ހަނދާންކުރުމަށް ކުޅުންތެރިންނަށް ނަސޭހަތްތެރިވެފައެވެ. އަދި މި މުބާރާތް ކާމިޔާބުކުރުމަށް ކުރެވުނު ހުރިހާކަމެއް އެންމެ ފަހު ވަގުތާއި ޖެހެންދެން ކުރުމަށް އޭނާ ނަސޭހަތްތެރިވެފައިވެއެވެ.

ހާވޭގެ ސްޕީޗުގައި އޭނާ ވަނީ ސައުދީ ކުޅުންތެރިން ދަނޑުމައްޗަށް އެރީ މެސީއާއެކު ފޮޓޯއެއް ނަގަންތޯ ސުވާލުކޮށްފައެވެ. އަދި އެމީހުން މި މުބާރާތް ކުޅުމުގެ މަގްސަދަކީ ކޮބައިތޯ ތަކުރާރުކޮށް ކޯޗު ސުވާލުކުރަމުން ދިޔަކަމަށް ބައެއް ރިޕޯޓުތަކުގައިވެއެވެ.

އެއާއެކު ހާވޭ ވަނީ އާޖެންޓީނާ ބަލިކުރުމުގެ ގާބިލްކަން ސައުދީ ޓީމުގެ ކިބައިގައި ހުރިކަން ތަކުރާރުކޮށް ކުޅުންތެރިންނަށް ވިސްނައިދީފައެވެ. އަދި ކުޅުންތެރިންގެ ހުނަރާއި މެދު ސުވާލު އުފެއްދުމުގެ ބަދަލުގައި އެ ހުނަރު މުބާރާތުގެ ތެރެއން ދައްކާލުމަށް ހިތްވަރު ދީފައެވެ.

ބައެއް މީޑިއާތަކުން ރިޕޯޓުކޮށްފައިވާ ގޮތުގައި ހާވޭގެ އެ ސްޕީޗު ސައުދީގެ ކުޅުންތެރިން ރޮށްވާލިއެވެ. އަދި ދެވަނަ ހާފަށް ކުޅުންތެރިން ނިކުތީ އާ އަޒުމަކާއެކު ސީދާ އާޖެންޓީނާ ބަލިކުރަންކަމަށް ކުޅުންތެރިން ބުނެފައިވާކަމަށްވެސް ރިޕޯޓުކޮށްފައިވެއެވެ.

ހާވޭގެ އެ ސްޕީޗަށް ފަހު ސައުދީގެ އަސްލުކުޅުން ފެނިގެން ދިޔައެވެ. އަދި ދުނިޔެއިން ފާހަގަކޮށްލެވޭ އެންމެ މޮޅެތި ޓީމުތަކުގެ ތެރޭގައި ހިމެނޭ އާޖެންޓީނާގެ މައްޗަށް ސައުދީ ޓީމުން ވަނީ ކޯޗު އެދުނު ގޮތަށް ކުރި ހޯދާފައެވެ.