ޔާމީނުގެ ހުކުމް ނުލިބި، ހުކުމުގެ ވީޑިއޯ ޑިލިޓްކޮށްލާފައި ވާތީ ލޯޔަރުން ކޯޓު ސަރަހައްދުގައި
ކުރީގެ ރައީސުލްޖުމްހޫރިއްޔާ އަދި އިދިކޮޅު އިއްތިހާދުގެ ލީޑަރު ރައީސް ޔާމީނަށް އިއްވި ހުކުމް އަދިވެސް ނުލިބޭތީއާއި ހުކުމްގެ ވީޑިއޯ، ކްރިމިނަލް ކޯޓުގެ ޔޫޓިއުބް ޗެނަލްއިން ޑިލިޓްކޮށްލާފައި ވާތީ ޔާމީންގެ ލޯޔަރުންގެ ޓީމާއެކު ލީޑަރޝިޕް ކްރިމިނަލް ކޯޓު ސަރަހައްދުގައި ހަރަކާތްތެރިވާން ފަށައިފިއެވެ.
ޔާމީނުގެ މައްޗަށް ދައުވާކޮށްފައިވާ އާރަށް މައްސަލާގައި ރިޝްވަތު ގަބޫލުކުރުމުގެ ކުށާއި، މަނީ ލޯންޑަރިންގެ ކުށް އެމަނިކުފާނުގެ މައްޗަށް ސާބިތުވާ ކަމަށް ކަނޑައަޅައި އެމަނިކުފާނުގެ މައްޗަށް 11 އަހަރުގެ ޖަލު ހުކުމެއް އިއްވާފައި ވަނީ އިއްޔެއެވެ.
ޖަލު ހުކުމްތަކުގެ އިތުރަށް ރައީސް ޔާމީނުގެ މައްޗަށް ފަސް މިލިއަން އެމެރިކާ ޑޮލަރުން (77 މިލިއަން ރުފިޔާއިން) ޖޫރިމަނާކޮށް ހަ މަސްދުވަހުގެ ތެރޭގައި އެ ފައިސާ ދައްކަންވެސް ކުރިމިނަލް ކޯޓުން ހުކުމްކޮށްފައިވެއެވެ.
ޖަލު ހުކުމް ތަންފީޒު ކުރުމަށް ޔައީސް ޔާމީނު ވަނީ ރޭ މާފުށީ ޖަލަށް ގެންގޮސްފައެވެ.
ނަމަވެސް، އެމަނިކުފާނުގެ މައްޗަށް އިއްވާފައިވާ 11 އަހަރުގެ ޖަލު ހުކުމް އިސްތިއުނާފް ކުރައްވާނެ ކަމަށް އެމަނިކުފާނުގެ ވަކީލުންގެ ޓީމުން ވަނީ ހާމަކޮށްފައެވެ.
ކްރިމިނަލް ކޯޓުގެ ބޭރުގައި ހުންނަވައި ނޫސްވެރިންނާ ވާހަކަ ދައްކަވަމުން ޔާމީންގެ ވަކީލުންގެ ޓީމުގައި ހިމެނިވަޑައިގަންނަވާ ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު އިއްޔެ ވިދާޅުވީ ކްރިމިނަލް ކޯޓުން ޔާމީންއާ ދެކޮޅަށް ހުކުމް ކުރި ނަމަވެސް އިސްތިއުނާފީ މަރުހަލާތަކުގައި އެ ކުށް ބާތިލް ކުރެވޭނެ ކަމަށާ އެހެން ކަމުން ކުރިއަށް އޮތް ދުވަސްތަކުގެ ތެރޭގައި އެ މައްސަލަ ހައި ކޯޓުގައި އިސްތިއުނާފް ކުރައްވާނެ ކަމަށެވެ.
"ރައީސް ޔާމީނުގެ ޝަރީޢަތް ހިންގީ ލައިވްކޮށް. މި ޝަރީޢަތުގެ މަރުހަލާގައި ދިފާއުން ހުށަހެޅި ހެކިތަކަކީ ކޮބައިކަން އަދި ކުރި މަސައްކަތް ދިވެހިރާއްޖޭގެ ހުރިހާ ރައްޔިތުންނަށް ފެންނާނެ. ޝަރީޢަތް ފަށަނީ ކޮންމެ މީހަކީ މައުސޫމު މީހެއްކަމަށް ބަލައިގެން. އެ މީހެއްގެ މައުސޫމުކަން ނެތްކަން ސާބިތުކުރުމަކީ ދައުލަތުގެ ކަމެއް. މި ޝަރީޢަތުގައި ކުރި ދެ ތުހުމަތު ސާބިތުކުރަން އެންމެ ހެއްކެއްވެސް ހުށަހެޅިފައިނުވޭ. ރައީސް ޔާމީނުގެ މަޤާމުގެ ނުފޫޒު ހިންގަވައިގެން ކުރެއްވި އަމަލަކީ ކޮބައިކަމެއް އަދި އެ އަމަލު ކުރެއްވިކަމުގެ އެއްވެސް ހެއްކެއް ހުށަހެޅިފައިނުވޭ،" ޑރ.ޖަމީލު ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
